.jpg)
គម្រោងវិនិយោគឯកជននៅក្រៅតំបន់សេដ្ឋកិច្ចពិសេសចំនួន ៨៣ ត្រូវបានក្រុមប្រឹក្សាអភិវឌ្ឍន៍កម្ពុជា (CDC) អនុម័តក្នុងរយៈពេល ៩ ខែដើមឆ្នាំ ២០២១ ធ្លាក់ចុះជាង ៣០គម្រោង។ ហេង ជីវ័ន
ភ្នំពេញៈ គម្រោងវិនិយោគឯកជននៅក្រៅតំបន់សេដ្ឋកិច្ចពិសេសចំនួន ៨៣ ត្រូវបានក្រុមប្រឹក្សាអភិវឌ្ឍន៍កម្ពុជា (CDC) អនុម័តក្នុងរយៈពេល ៩ ខែដើមឆ្នាំ ២០២១ ធ្លាក់ចុះជាង ៣០គម្រោង បើធៀបនឹងរយៈពេលដូចគ្នាឆ្នាំ ២០២០។ នេះបើយោងតាមក្រសួងសេដ្ឋកិច្ច និងហិរញ្ញវត្ថុ។
របាយការណ៍និន្នាការសេដ្ឋកិច្ច-សង្គម ប្រចាំខែកញ្ញា ឆ្នាំ ២០២១ បានឱ្យដឹងថា ចាប់ពីខែមករា ដល់ខែកញ្ញា ឆ្នាំ ២០២១ ស្ថានភាពវិនិយោគនៅកម្ពុជា នៅមិនទាន់មានភាពល្អប្រសើរនៅឡើយទេ ដោយគម្រោងវិនិយោគឯកជនក្រៅតំបន់សេដ្ឋកិច្ចពិសេស ដែលទទួលបានការអនុញ្ញាតពី CDC មានចំនួនសរុប ៨៣ គម្រោង ធ្លាក់ចុះ ៣៨ គម្រោង។ គម្រោងទាំង ៨៣ មានលទ្ធភាពបង្កើតការងារថ្មីបានប្រមាណ ៦៤ ០០០ កន្លែង ធ្លាក់ចុះ ៣៣,៥ ភាគរយធៀបនឹងរយៈពេលដូចគ្នាឆ្នាំ ២០២០ ខណៈទុនវិនិយោគ មានចំនួន ១ ១៣៥ លានដុល្លារ ធ្លាក់ចុះ ៨០,៦ ភាគរយ។
ទោះយ៉ាងណា រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន បានលើកឡើងក្នុងពិធីបិទសន្និបាតបូកសរុបការងារក្រសួងពាណិជ្ជកម្ម កាលពីថ្ងៃទី ២៣ ខែធ្នូ ថា ឈរលើមូលដ្ឋាននៃសមិទ្ធផលដែលសម្រេចបានក្នុងឆ្នាំ ២០២១ ជាពិសេសការសម្រេចបាននូវអត្រាការចាក់វ៉ាក់សាំងខ្ពស់ដែលបង្កើតបាននូវ «ភាពស៊ាំសហគមន៍» ដ៏រឹងមាំ និងការបិទបញ្ចប់ «ព្រឹត្តិការណ៍សហគមន៍ ២០ កុម្ភៈ ២០២១» ក៏ដូចជាការបើកប្រទេស និងសកម្មភាពសង្គម-សេដ្ឋកិច្ច ក្នុងស្រុកពេញលេញឡើងវិញ សេដ្ឋកិច្ចកម្ពុជាក្នុងឆ្នាំ ២០២១ នេះអាចនឹងសម្រេចបានកំណើនក្នុងអត្រាប្រមាណ ៣ ភាគរយ ដែលប្រសើរជាងការរំពឹងទុក ក្នុងអត្រា ២,៤ ភាគរយ នៅក្នុងការវាយតម្លៃពីពាក់កណ្តាលឆ្នាំ។
លោកបានថ្លែងថា៖ «ជាមួយនឹងវឌ្ឍនភាព និងនិន្នាការជាវិជ្ជមានទាំងនេះ កំណើនសេដ្ឋកិច្ចនៅក្នុងរយៈពេលមធ្យម ត្រូវបានព្យាករថា នឹងបន្តងើបឡើងវិញលឿន ដែលគាំទ្រដោយការរំពឹងទុកនៃការកើនឡើងតម្រូវការសកល និងទំនុកចិត្តរបស់វិនិយោគិនបរទេស ដោយសារការគ្រប់គ្រងបានល្អនូវស្ថានភាពនៃការរីករាលដាលជំងឺកូវីដ ១៩ ជាពិសេសការដាក់ឱ្យអនុវត្តនូវក្របខ័ណ្ឌយុទ្ធសាស្ត្រ និងកម្មវិធីស្តារ និងជំរុញកំណើនសេដ្ឋកិច្ចកម្ពុជា ក្នុងការរស់នៅជាមួយកូវីដ ១៩ តាមគន្លងប្រក្រតីភាពថ្មី សម្រាប់ឆ្នាំ ២០២១-២០២៣ ដែលនឹងពង្រឹងឡើងវិញនូវចន្ទល់សេដ្ឋកិច្ចកម្ពុជា ដែលរងផលប៉ះពាល់អវិជ្ជមានពីវិបត្តិជំងឺកូវីដ ១៩ ព្រមទាំងអភិវឌ្ឍបន្ថែមនូវចន្ទល់សេដ្ឋកិច្ចថ្មីប្រកបដោយសក្តានុពល ដើម្បីពន្លឿនការស្តារ និងការជំរុញកំណើនសេដ្ឋកិច្ចកម្ពុជា ឱ្យវិលត្រឡប់ទៅស្ថិតនៅលើវិថីនៃកំណើនជាសក្តានុពលរបស់ខ្លួនវិញ»៕
