ភ្នំពេញៈ ក្រុមប្រឹក្សាអភិវឌ្ឍន៍កម្ពុជា (CDC) បានអនុម័តគម្រោងវិនិយោគឯកជននៅក្រៅតំបន់សេដ្ឋកិច្ចពិសេសចំនួន ៨៣ ក្នុងរយៈពេល ៩ ខែដើមឆ្នាំ ២០២១ ធ្លាក់ចុះជាង ៣០ គម្រោងបើធៀបទៅនឹងរយៈពេលដូចគ្នាឆ្នាំ ២០២០។ នេះបើយោងតាមក្រសួងសេដ្ឋកិច្ច និងហិរញ្ញវត្ថុ។
របាយការណ៍នៃនិន្នាការសេដ្ឋកិច្ចសង្គមបានឱ្យដឹងថា ចាប់ពីខែមករា ដល់ខែកញ្ញា ឆ្នាំ ២០២១ ស្ថានភាពវិនិយោគនៅកម្ពុជានៅមិនទាន់មានភាពល្អប្រសើរទេ ដោយគម្រោងវិនិយោគឯកជនក្រៅតំបន់សេដ្ឋកិច្ចពិសេសដែលទទួលបានការអនុញ្ញាតពី CDC មានចំនួន ៨៣ គម្រោងធ្លាក់ចុះ ៣៨ គម្រោង។ គម្រោងទាំង ៨៣ មានលទ្ធភាពបង្កើតការងារបានប្រមាណ ៦៤ ០០០ កន្លែង ធ្លាក់ចុះ ៣៣,៥ ភាគរយធៀបរយៈពេលដូចគ្នាឆ្នាំមុន ខណៈទុនវិនិយោគមាន ១ ១៣៥ លានដុល្លារ ធ្លាក់ ៨០,៦ ភាគរយ។
លោក ហុង វណ្ណៈ អ្នកស្រាវជ្រាវសេដ្ឋកិច្ចអន្តរជាតិនៃវិទ្យាស្ថានទំនាក់ទំនងអន្តរជាតិនៃកម្ពុជា (រាជបណ្ឌិត្យសភាកម្ពុជា) បានប្រាប់ភ្នំពេញប៉ុស្តិ៍កាលពីថ្ងៃទី ២៦ ខែធ្នូថា ការធ្លាក់ចុះចំនួនគម្រោងវិនិយោគនៅក្នុងអំឡុងពេលសកម្មភាពសេដ្ឋកិច្ច និងសង្គម ទទួលរងឥទ្ធិពលអវិជ្ជមានពីវិបត្តិជំងឺកូវីដ ១៩ គឺជារឿងចៀសមិនផុត ព្រោះគ្រប់គម្រោងវិនិយោគមុននឹងចាប់ផ្តើម វិនិយោគិនតែងតែចុះទៅសិក្សាលម្អិត និងត្រូវការពិនិត្យ ព្រមទាំងរៀបចំឯកសារជាច្រើន ដើម្បីចាប់ផ្តើម។ ក្តីបារម្ភពីសុវត្ថិភាពពីជំងឺកូវីដ ១៩ បានធ្វើឱ្យផែនការវិនិយោគភាគច្រើនត្រូវថមថយសកម្មភាព ឬពន្យារពេល។
លោកបន្ថែមទៀតថា បើទោះបីការធ្លាក់ចុះនេះជាព័ត៌មានមិនល្អ ប៉ុន្តែអ្វីដែលគេត្រូវពិនិត្យមើលនោះ ថាតើគម្រោងដែល CDC អនុម័តទាំងអស់នោះភាគច្រើនជាគម្រោងវិនិយោគលើវិស័យអ្វី? បើភាគច្រើនជាគម្រោងវិនិយោគធំៗ ហើយប្រើប្រាស់បច្ចេកវិទ្យាទំនើបៗ និងមិនមែនវិស័យកាត់ដេរនោះ វាមិនមែនជាសញ្ញាអាក្រក់ទេ ព្រោះវាជាការធ្វើពិពិធកម្មថ្មីមួយទៀតនៃវិស័យផលិតកម្មនៅកម្ពុជា។
លោកបញ្ជាក់ថា៖ «ប្រសិនបើបែបនេះ ខ្ញុំគិតថា មានលក្ខណៈល្អប្រសើរ ព្រោះវានឹងធ្វើឱ្យការផលិតនៅកម្ពុជាកាន់តែមានភាពចម្រុះ មានគុណភាពស្តង់ដាកម្រិតខ្ពស់ និងមានបច្ចេកទេសរីកចម្រើន»។
សម្រាប់ឆ្នាំ ២០២២ ខាងមុខ លោកអះអាងថា កំណើនគម្រោងវិនិយោគចូលមកកម្ពុជានឹងមានសញ្ញាវិជ្ជមានឡើងវិញ ព្រោះការបើកដំណើរការប្រទេសឡើងវិញចាប់ពីខែវិច្ឆិកា ឆ្នាំ ២០២១ ព្រមទាំងការចូលជាធរមាននៃច្បាប់វិនិយោគថ្មី ក៏ដូចជាកិច្ចព្រមព្រៀងពាណិជ្ជកម្មថ្មីៗនឹងធ្វើឱ្យវិនិយោគិនជាច្រើនចាប់អារម្មណ៍ក្នុងការចូលមកបណ្តាក់ទុននៅកម្ពុជា។
រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន បានលើកឡើងក្នុងពិធីបិទសន្និបាតបូកសរុបការងារក្រសួងពាណិជ្ជកម្ម កាលពីថ្ងៃទី ២៣ ខែធ្នូថា ឈរលើមូលដ្ឋាននៃសមិទ្ធផលដែលសម្រេចបានក្នុងឆ្នាំ ២០២១ ជាពិសេសការសម្រេចបាននូវអត្រាការចាក់វ៉ាក់សាំងខ្ពស់ដែលបង្កើតបាននូវ «ភាពស៊ាំសហគមន៍» ដ៏រឹងមាំ និងការបិទបញ្ចប់ «ព្រឹត្តិការណ៍សហគមន៍ ២០ កុម្ភៈ» ក៏ដូចជាការបើកប្រទេស និងសកម្មភាពសង្គមសេដ្ឋកិច្ច ក្នុងស្រុកពេញលេញឡើងវិញ សេដ្ឋកិច្ចកម្ពុជាក្នុងឆ្នាំ ២០២១ នេះអាចនឹងសម្រេចបានកំណើនក្នុងអត្រាប្រមាណ ៣ ភាគរយដែលប្រសើរជាងការរំពឹងទុកក្នុងអត្រា ២,៤ ភាគរយកាលពីពាក់កណ្តាលឆ្នាំ។
លោកថ្លែងថា៖ «ជាមួយនឹងវឌ្ឍនភាព និងនិន្នាការជាវិជ្ជមានទាំងនេះ កំណើនសេដ្ឋកិច្ចក្នុងរយៈពេលមធ្យម ត្រូវបានព្យាករថា នឹងបន្តងើបឡើងវិញលឿន ដែលគាំទ្រដោយការរំពឹងទុកនៃការកើនឡើងតម្រូវការសកល និងទំនុកចិត្តរបស់វិនិយោគិនបរទេស ដោយសារការគ្រប់គ្រងបានល្អនូវស្ថានភាពនៃការរីករាលដាលជំងឺកូវីដ-១៩ ជាពិសេសការដាក់ឱ្យអនុវត្តនូវក្របខ័ណ្ឌយុទ្ធសាស្ត្រ និងកម្មវិធីស្តារ និងជំរុញកំណើនសេដ្ឋកិច្ចកម្ពុជាក្នុងការរស់នៅជាមួយកូវីដ ១៩ តាមគន្លងប្រក្រតីភាពថ្មី សម្រាប់ឆ្នាំ ២០២១-២០២៣ ដែលនឹងពង្រឹងឡើងវិញនូវចន្ទល់សេដ្ឋកិច្ចកម្ពុជា ដែលរងផលប៉ះពាល់អវិជ្ជមានពីវិបត្តិជំងឺកូវីដ ១៩ ព្រមទាំងអភិវឌ្ឍបន្ថែមនូវចន្ទល់សេដ្ឋកិច្ចថ្មីប្រកបដោយសក្តានុពល ដើម្បីពន្លឿនការស្តារ និងការជំរុញកំណើនសេដ្ឋកិច្ចកម្ពុជា ឱ្យវិលត្រឡប់ទៅស្ថិតនៅលើវិថីនៃកំណើនជាសក្តានុពលរបស់ខ្លួនវិញ»៕