ភ្នំពេញៈ និយតករមូលបត្រកម្ពុជា និងសភាពាណិជ្ជកម្មកម្ពុជាបានជំរុញឱ្យសហគ្រាសធុនតូច និងមធ្យមនៅកម្ពុជា បោះផ្សាយលក់មូលបត្រ និងចុះបញ្ជីមូលបត្រនៅផ្សារមូលបត្រកម្ពុជា ដើម្បីទទួលបានជម្រើសហិរញ្ញប្បទានថ្មី និងមានរយៈពេលវែង ការលើកទឹកចិត្តពន្ធ និរន្តរភាពអាជីវកម្មជាមួយនឹងអភិបាលកិច្ចសាជីវកម្ម និងការគ្រប់គ្រងដែលរឹងមាំជាងមុន។
នៅក្នុងសិក្ខាសាលាស្តីពី «ជម្រើសហិរញ្ញប្បទានសម្រាប់សហគ្រាសធុនតូច និងមធ្យមនៅកម្ពុជា» នាថ្ងៃទី ២៧ ខែធ្នូ ឆ្នាំ ២០២១ លោក ស៊ូ សុជាតិ អគ្គនាយកនិយតករមូលបត្រកម្ពុជា (ន.ម.ក.) បានលើកឡើងថា សហគ្រាសធុនតូច និងមធ្យម (SME) បានជួបប្រទះនឹងបញ្ហាប្រឈមមួយចំនួនពាក់ព័ន្ធនឹងជំនាញ ចំណេះដឹង បច្ចេកទេស ការបំពេញកាតព្វកិច្ចស្របច្បាប់ ការប្រកួតប្រជែងជាមួយសហគ្រាសបរទេស ពិសេសកង្វះខាតដើមទុន។ លោកបានបន្ថែមថា ដើម្បីរួមចំណែកជំរុញការអភិវឌ្ឍសហគ្រាសធុនតូច និងមធ្យមនៅកម្ពុជា និយតករមូលបត្រកម្ពុជា បានធ្វើវិសោធនកម្មបទប្បញ្ញត្តិមួយចំនួន ដើម្បីអនុញ្ញាតឱ្យ SME បោះផ្សាយលក់មូលបត្រ និងចុះបញ្ជីមូលបត្រជាសាធារណៈ នៅលើទីផ្សារកំណើននៃផ្សារមូលបត្រកម្ពុជា។
លោកថ្លែងថា៖ «តាមរយៈការបោះផ្សាយលក់មូលបត្រជាសាធារណៈនឹងផ្តល់អត្ថប្រយោជន៍ច្រើនលើសលប់ដល់ SME មានដូចជាការពង្រឹងកេរ្តិ៍ឈ្មោះ ការកាត់បន្ថយចំណាយលើហិរញ្ញប្បទានបើទោះបីតាមរយៈការខ្ចីពីធនាគារក៏ដោយ ហើយថែមទាំងពង្រឹងអភិបាលកិច្ចល្អ ការអនុវត្តដែលអនុលោមតាមច្បាប់ មានការលើកទឹកចិត្តពន្ធ និងជួយឱ្យក្រុមហ៊ុនដំណើរការប្រកបដោយតម្លាភាព និងយូរអង្វែង»។
លោក គិត ម៉េង ប្រធានសភាពាណិជ្ជកម្មកម្ពុជាបានលើកឡើងថា ការបង្កើនទុនតាមរយៈទីផ្សារមូលធន គឺជាជម្រើសដ៏ល្អ ដើម្បីរៀបចំខ្លួនទៅជាក្រុមហ៊ុនស្តង់ដាមួយដែលមានអភិបាលកិច្ចល្អ និងតម្លាភាព ទោះបីជាវាមានតម្លៃក្នុងការធ្វើវាក៏ដោយ។ លោកបានបន្តថា បន្ទាប់ពីបានសិក្សាពីអត្ថប្រយោជន៍នៃការចុះបញ្ជីក្រុមហ៊ុននៅលើផ្សារមូលបត្រ លោកក៏សម្រេចចិត្តចុះបញ្ជីក្រុមហ៊ុន Telcotech ដែលជាក្រុមហ៊ុន ១ ក្នុងចំណោមក្រុមហ៊ុនជាច្រើនរបស់ Royal Group ដោយបានបោះផ្សាយមូលបត្របំណុល ២០ លានដុល្លារ ជាមួយនឹងការធានាពី Credit Guarantee and Investment Facility (CGIF) ក្នុងអត្រាបណ្ណ ៤,៥ ភាគរយ ក្នុង ១ ឆ្នាំ ហើយមានកាលកំណត់ ៥ ឆ្នាំ។
លោកបន្ថែមទៀតថា៖ «នៅក្នុងនាមសភាពាណិជ្ជកម្មកម្ពុជា ខ្ញុំសូមលើកទឹកចិត្តអ្នកទាំងអស់គ្នាឱ្យពិចារណាប្រមូលទុនតាមរយៈទីផ្សារមូលធន ទោះជាមានឧបសគ្គមួយចំនួនដែលត្រូវដោះស្រាយមែន ប៉ុន្តែសូមកុំបារម្ភ ព្រោះយើងមាននិយតករមូលបត្រគាំទ្រខ្លាំងលើការងារនេះ ហើយទីផ្សារមូលធនគឺជាកន្លែងដ៏ល្អមួយសម្រាប់ដាក់ប្រាក់របស់អ្នក ជាពិសេសការវិនិយោគរយៈពេលវែង»។
កាលពីពេលថ្មីៗនេះ ក្រុមហ៊ុនអ៊ិនធើ ឡូជីស្ទិក (ខេមបូឌា) ដែលជាបុត្រសម្ព័ន្ធរបស់ក្រុមហ៊ុន រ៉ូយ៉ាល់ គ្រុប ក៏បានទិញយកភាគហ៊ុនចំនួន ៤៥,០៩ ភាគរយនៃភាគហ៊ុនសរុបរបស់ក្រុមហ៊ុនភ្នំពេញ អេសអ៊ីហ្សិត ភីអិលស៊ី (PPSP) ផងដែរ ដើម្បីក្លាយជាភាគហ៊ុនដែលមានសិទ្ធិបោះឆ្នោតចំនួនច្រើនលើសលប់។
បើតាម អគ្គនាយកនៃនិយតករមូលបត្រកម្ពុជា ទីផ្សារថ្មីសម្រាប់សហគ្រាសខ្នាតតូច និងមធ្យម ឬមានឈ្មោះថា «ទីផ្សារកំណើន» ត្រូវបានផ្តួចផ្តើមឡើងដោយរដ្ឋាភិបាលកម្ពុជា ដើម្បីបន្ថែមនូវជម្រើសហិរញ្ញប្បទានមួយទៀតសម្រាប់ក្រុមហ៊ុនអាជីវកម្មទាំងនោះ ដែលមានផលរបរសរុបប្រចាំឆ្នាំលើសពី ១០ ពាន់លានដុល្លារ និងបង្កើតការងារចំនួន ១,៣ លាន។
បច្ចុប្បន្នមានក្រុមហ៊ុន ២ ដែលបានបោះផ្សាយមូលបត្រកម្មសិទ្ធិនៅលើផ្សារកំណើននេះ គឺក្រុមហ៊ុនសំណង់ DBD Engineering និងក្រុមហ៊ុន Telcotech។
ដើម្បីអាចចុះបញ្ជីនៅផ្សារមូលបត្រកម្ពុជាបាន និយតករមូលបត្រកម្ពុជាតម្រូវឱ្យសហគ្រាសធុនតូច និងមធ្យមទាំងនោះត្រូវបំពេញលក្ខខណ្ឌមួយចំនួនដូចជា ត្រូវមានប្រវត្តិប្រតិបត្តិការអាជីវកម្មយ៉ាងតិច ១ ឆ្នាំ នៃកំណត់ត្រាអាជីវកម្ម, មូលធនភាគហ៊ុនិកយ៉ាងតិច ២ ពាន់លានរៀល (៥០ ម៉ឺនដុល្លារ), ប្រាក់ចំណេញសុទ្ធមិនមានការខាតបង់សម្រាប់ឆ្នាំសារពើពន្ធចុងក្រោយ ឬមានលំហូរសាច់ប្រាក់ពីប្រតិបត្តិការអាជីវកម្មវិជ្ជមាន ជាមួយនឹងចំណេញដុលយ៉ាងតិច ១០ ភាគរយ៕