The Phnom Penh Post Search

Search form




Logo of Phnom Penh Post newspaper Phnom Penh Post - ការនាំចេញ​អង្ករ​កម្ពុជា​ទៅ​ទីផ្សារ​អឺរ៉ុប​ ​នឹង​ងើប​ឡើងវិញ​ ចាប់ពី​ឆ្នាំ​ ២០២២

ការនាំចេញ​អង្ករ​កម្ពុជា​ទៅ​ទីផ្សារ​អឺរ៉ុប​ ​នឹង​ងើប​ឡើងវិញ​ ចាប់ពី​ឆ្នាំ​ ២០២២

Content image - Phnom Penh Post
របាយការណ៍​ក្រសួង​កសិកម្ម រុក្ខាប្រមាញ់ និង​នេសាទ​បាន​ឱ្យ​ដឹងថា ចាប់ពី​ខែមករា ដល់​ខែវិច្ឆិកា ឆ្នាំ​ ២០២១ កម្ពុជា​នាំចេញ​អង្ករ​សរុប ៥៣២ ១៧៩ ​តោន ថយចុះ ១១,៤៦ ​ភាគរយ​ធៀប​នឹង​រយៈពេល ១១ ​ខែ ឆ្នាំ​ ២០២០ ដែលមាន​ចំនួន ៦០១ ០៤៥ ​តោន​។ ប្រាក់​ទទួល​ពី​ការនាំចេញ​អង្ករ​មាន​ចំនួន ៤៥៤ ៤៨០ ៨៦៦ ​ដុល្លារ​។ ហេង ជីវ័ន

ការនាំចេញ​អង្ករ​កម្ពុជា​ទៅ​ទីផ្សារ​អឺរ៉ុប​ ​នឹង​ងើប​ឡើងវិញ​ ចាប់ពី​ឆ្នាំ​ ២០២២

ភ្នំពេញៈ កម្ពុជា​នឹង​ចាប់ផ្តើម​ជំរុញ​ការនាំចេញ​អង្ករ​ឡើងវិញ​ទៅ​ទីផ្សារ​អឺរ៉ុប​ចាប់ពី​ខែមករា​ឆ្នាំក្រោយ បន្ទាប់ពី​វិធានការ​ការពារ​ដោយ​គណៈកម្មការ​អឺរ៉ុប​នឹង​បិទ​បញ្ចប់​ត្រឹម​ថ្ងៃទី​ ១៨ មករា ខាងមុខ​។

កាលពី​ថ្ងៃទី​ ១៧ ខែមករា ឆ្នាំ​ ២០១៩ គណៈកម្មការ​អឺរ៉ុប​បាន​ហូតពន្ធ​នាំចូល​រយៈពេល ៣ ​ឆ្នាំ លើ​អង្ករ​ដែល​នាំ​ចេញពី​ប្រទេស​កម្ពុជា និង​មីយ៉ាន់ម៉ា​តាមរយៈ​ការអនុវត្ត​វិធានការ​ការពារ​ដោយសារ​តែ​ការកើនឡើង​ការនាំចូល​អង្ករ​ប្រភេទ Indica ពី​ប្រទេស​ទាំង​ ២ បាន​ប៉ះពាល់​ដល់​សេដ្ឋកិច្ច​បណ្ដា​ប្រទេស​ផលិត​អង្ករ​នៅ​សហភាព​អឺរ៉ុប​។

ជាមួយ​នឹង​វិធានការ​ការពារ​នេះ​តម្រូវឱ្យ​កម្ពុជា​ត្រូវ​បង់ពន្ធ​នាំចូល​ចំនួន ១៧៥ ​អឺរ៉ូ​ក្នុង​ ១ ​តោន នៅ​ឆ្នាំ​ដំបូង​,១៥០ ​អឺរ៉ូ​ក្នុង​ ១ ​តោន​នៅ​ឆ្នាំ​ទី ២ និង​ចំនួន ១២៥ ​អឺរ៉ូ​ក្នុង​ ១ ​តោន នៅ​ឆ្នាំ​ទី​ ៣​។

លោក ប៉ែន សុវិជាតិ អ្នកនាំពាក្យ​ក្រសួង​ពាណិជ្ជកម្ម​បាន​ប្រាប់​ភ្នំពេញ​ប៉ុស្តិ៍​ថា វិធានការ​ការពារ​នេះ​នឹង​បញ្ចប់​នៅត្រឹម​ពាក់កណ្តាល​ខែមករា ឆ្នាំ​ ២០២២ ដែល​នឹង​ក្លាយជា​ការត្រួសត្រាយ​ផ្លូវ​សម្រាប់​ការនាំចេញ​អង្ករ​ពី​កម្ពុជា​ទៅកាន់​ទីផ្សារ​អឺរ៉ុប​ជាធម្មតា​ឡើងវិញ​។

លោក​អះអាងថា​៖ «​យើង​នឹង​ឃើញ​ការនាំចេញ​អង្ករ​របស់​យើង​ទៅ​សហភាព​អឺរ៉ុប​កាន់តែច្រើន​នៅ​ឆ្នាំក្រោយ ខណៈ​រយៈពេល ៣ ​ឆ្នាំ​នៃ​វិធានការ​ការពារ​នឹងត្រូវ​បញ្ចប់​ពេល​ឆាប់ៗ​»​។

លោក សុង សារ៉ន ប្រធាន​សហព័ន្ធ​ស្រូវ​អង្ករ​កម្ពុជា​បាន​និយាយថា វិធានការ​ការពារ​អង្ករ​នឹងត្រូវ​បញ្ចប់​នៅ​ថ្ងៃទី​ ១៧ ខែមករា ឆ្នាំ​ ២០២២​។

លោក​បាន​ថ្លែងថា​៖ «​កម្ពុជា​នឹង​ទទួលបាន​អត្ថប្រយោជន៍​ពី​ក្របខ័ណ្ឌ​អនុគ្រោះ​ពាណិជ្ជកម្ម​ស្ថិតក្រោម​ផែនការ​ទំនិញ​គ្រប់យ៉ាង​លើកលែង​តែ​អាវុធ​ (EBA) ​ដើម្បី​ប្រកួតប្រជែង​នៅ​ទីផ្សារ​សហភាព​អឺរ៉ុប​។ អង្ករ​កម្ពុជា​មិន​ស្ថិតនៅក្នុង​បញ្ជី​នៃ​ការដក EBA មួយផ្នែក​នោះទេ វា​មានន័យថា កម្ពុជា​នឹង​ទទួល​បាន​ពន្ធ​សូន្យ​ចាប់ពី​ថ្ងៃទី​ ១៨ ខែមករា ឆ្នាំ​ ២០២២​។ ខ្ញុំ​ក៏បាន​ឃើញ​តម្រូវការ​កុម្មង់​ទិញ​អង្ករ​ពី​កម្ពុជា​យើង​កាន់តែ​ច្រើន​ពី​បណ្តា​ប្រទេស​សហភាព​អឺរ៉ុប​ក្នុង​រយៈពេល​ជាច្រើន​សប្ដាហ៍​ថ្មីៗ​នេះ​»​។

នាយក​ក្រុមហ៊ុននាំចេញ​អង្ករ Signature of Asia Co., Ltd លោក ចាន់ សុខឃាំង បានឱ្យដឹងថា ចាប់តាំងពី​សហភាព​អឺរ៉ុប​ដាក់​វិធានការ​ការពារ​មក​បាន​ធ្វើឱ្យប៉ះពាល់​ដល់​ការនាំ​ចេញ​អង្ករ​របស់​កម្ពុជា​ប្រមាណ ៧០ ​ភាគរយ​។

លោក​លើកឡើង​ថា​៖ «​វា​ជា​ដំណឹង​ល្អ​សម្រាប់​វិស័យ​ស្រូវ​អង្ករ​កម្ពុជា​។ វា​នឹង​បើក​ទំព័រ​ថ្មី​សម្រាប់​អង្ករ​សែន​ក្រអូប និង​អង្ករ​ផ្កាម្លិះ​កម្ពុជា​អាច​ចូល​ទីផ្សារ​អឺរ៉ុប​សាជាថ្មី​»​។ លោក​បន្តថា ក្នុង​ខែ​នេះ លោក​ទទួល​បាន​ការបញ្ជាទិញ​ពី​ដៃគូ​ចាស់ៗ​ពី​អឺរ៉ុប​ជាច្រើន​»​។

យោងតាម​លោក សារ៉ន មុន​ឆ្នាំ​ ២០១៦ ការនាំចេញ​របស់​កម្ពុជា​ទៅ​ទីផ្សារ​សហភាព​អឺរ៉ុប​បាន​គ្របដណ្តប់​ពី ៦០ ​ទៅ​ ៦៥ ​ភាគរយ​នៃ​ការនាំចេញ​សរុប ហើយ​ចន្លោះ​ឆ្នាំ​ ២០១៧ ដល់​ឆ្នាំ​ ២០១៩ ការនាំចេញ​មាន​ប្រមាណ​ត្រឹម ៤៣ ​ភាគរយ​។ បន្ទាប់ពី​វិធានការ​ការពារ​ត្រូវបាន​ធ្វើឡើង ការនាំចេញ​អង្ករ-កម្ពុជា​ទៅ​ទីផ្សារ​សហភាព​អឺរ៉ុប​មាន​ប្រហែល​តែ ៣០ ​ភាគរយ​ប៉ុណ្ណោះ​នៃ​ការនាំចេញ​សរុប​។

លោក​បាន​បន្តថា ភាគច្រើន​នៃ​ប្រភេទ​អង្ករ​ដែល​ធ្លាក់ចុះ គឺ​អង្ករស ដែល​តម្លៃ​មិនអាច​ប្រកួតប្រជែង​បាន ដោយ​មានតែ​អង្ករ​ក្រអូប និង​អង្ករ​សរីរាង្គ​ប៉ុណ្ណោះ​ដែល​អាច​ប្រកួតប្រជែង​បាន​។ ការធ្លាក់ចុះ​អង្ករស បាន​កើតឡើង​មុនពេល​មាន​វិធានការ​ការពារ​ត្រូវបានធ្វើ​ចាប់ពី​ឆ្នាំ​ ២០១៧ ហើយ​ប្រភេទ​អង្ករ​ទាំងនេះ​កម្ពុជា​មិនអាច​ប្រកួតប្រជែង​ជាមួយ​ប្រទេស​ឥណ្ឌា វៀតណាម និង​ប៉ាគីស្ថាន បានឡើយ​។ ខណៈ​បច្ចុប្បន្ន អង្ករស​នៅ​ទីផ្សារ​អន្តរជាតិ​មានតម្លៃ​ប្រហែល ៣៨០ ​ដុល្លារ អង្ករស​កម្ពុជា​មានតម្លៃ​ប្រហែល​ ៤៧០ ទៅ ៥០០ ដុល្លារ​ក្នុង​ ១ ​តោន​។

លោក​បញ្ជាក់ថា​៖ «​ការរំពឹងទុក​ចាប់ពី​ថ្ងៃទី​ ១៩ ខែមករា ឆ្នាំ​ ២០២២ អង្ករ​ក្រអូប​កាន់តែច្រើន​ដូចជា អង្ករ​សែន​ក្រអូប និង​ផ្កាម្លិះ រំដួល ដែល​ផលិត​ពី​អង្ករ​ផ្ការំដួល នឹង​នាំចេញ​កាន់តែ​ច្រើនឡើង​ជាមួយ​តម្លៃ​ប្រកួតប្រជែង​នៅ​ទីផ្សារ​អឺរ៉ុប​»​។

ទោះយ៉ាងណា លោក​បារម្ភ​ថា បញ្ហា​ប្រឈម​សំខាន់ៗ​ភាគច្រើន គឺ​បណ្តាល​មកពី​ការដឹកជញ្ជូន​តាម​សមុទ្រ ពិសេស​កង្វះ​ទូកុងតឺន័រ និង​តម្លៃ​ដឹកជញ្ជូន​កើនឡើង​ខ្ពស់​៕ LA

អត្ថបទគួរចាប់អារម្មណ៍

  • កោះកុងៈ កូនអណ្តើក​ហ្លួង​ចំនួន ៣០ ​ក្បាល​បាន​ញាស់​ចេញពី​សម្បុក​នៅលើ​ឆ្នេរ​ខ្សាច់​សិប្បនិម្មិត​ក្នុង​មជ្ឈមណ្ឌល​អភិរក្ស​សត្វ​ល្មូន​ខេត្តកោះកុង កាលពី​សប្តាហ៍​កន្លងទៅ ហើយ​នេះ​គឺជា​លើក​ទី​ ២ ​ហើយ ដែល​អណ្តើក​ហ្លួង​ចិញ្ចឹម​ក្នុង​មជ្ឈមណ្ឌល​នេះ​បាន​ពង​កូន​។ នេះ​បើតាម​អង្គការ​សមាគម​អភិរក្ស​សត្វព្រៃ​នៅ​កម្ពុជា (WCS)​។

  • ភ្នំពេញៈ ការបញ្ចូល​មីក្រូ​សារជាតិ​ក្នុង​អង្ករ គឺជា​ជំហាន​ចម្បង​មួយ​ក្នុងការ​ដោះស្រាយ​បញ្ហា​អាហារូបត្ថម្ភ​ក្នុង​ប្រទេស​កម្ពុជា ដែល​ប្រជាជន​ភាគច្រើន​ទទួលទាន​បាយ ក្នុង​បរិមាណ​ច្រើន​ជា​រៀងរាល់ថ្ងៃ​។ នេះ​បើតាម​មន្ត្រី​ក្រុមប្រឹក្សា​ស្តារ​អភិវឌ្ឍន៍​វិស័យ​កសិកម្ម និង​ជនបទ​។

  • ភ្នំពេញ: ក្នុង​ចំណោម​ភោជនីយដ្ឋាន​ពោរពេញ​ដោយ​សិល្បៈ​ចម្អិន​ម្ហូបអាហារ ការ​គិតគូរ​ពី​និរន្តរភាព​បរិស្ថាន​ភព​ផែន​ដី និង​បង្កប់​រឿង​រ៉ាវ​ប្រពៃណី​វប្បធម៌​ដ៏​អស្ចារ្យ​នៅ​អេស្ប៉ាញ ប៉េរូ​សហរដ្ឋអាមេរិក​ ថៃ ដាណឺម៉ាក​ នូវែលសេឡង់ ចិន ជប៉ុន អ៊ីតាលី និង​ម៉ិកស៊ិក អាហារ​នៅ​​ផ្ទះ​ប្រពៃណី​បុរាណ​មួយ​​​តាម​ដង​ទន្លេ​មេគង្គ

  • ភ្នំពេញៈ ទាំង​អ្នកនយោបាយ អ្នកវិភាគ និង​ស្ថាប័ន​គណៈកម្មាធិការ​ជាតិ​រៀបចំ​ការបោះឆ្នោត​បានចាត់ទុក​ដំណើរការ​ឃោសនា​រក​សំឡេងឆ្នោត ក្នុង​រយៈពេល ៣ ​ថ្ងៃ​របស់​គណបក្ស​នយោបាយ ដែល​បាន​ចុះបញ្ជី​បេក្ខជន​ចូលរួម​បោះឆ្នោត​ជ្រើសរើស​ក្រុមប្រឹក្សាឃុំ សង្កាត់​អាណត្តិ​ទី​ ៥ ដែល​នឹង​ប្រព្រឹត្តទៅ​នៅ​ថ្ងៃទី​ ៥ ខែមិថុនា ថា មាន​ភាពចាស់ទុំ​ផ្នែក​នយោបាយ និង​មិនមាន​អំពើហិង្សា​ណាមួយ​កើតឡើង​នោះ

  • ភ្នំពេញៈ សាលាឧទ្ធរណ៍​ភ្នំពេញ​នៅ​ថ្ងៃទី​ ២៣ ​ឧសភា បានប្រកាស​សាលដីកា​កំបាំង​មុខមន្ត្រី​សមាគម​ការពារ​សិទ្ធិមនុស្ស​អាដហុក​ ៤ ​រូប និង​អតីត​មន្ត្រី​ ១ ​រូប​ទៀត​សម្រេច​តម្កល់​សាលក្រម​របស់​សាលាដំបូង​រាជធានី​ភ្នំពេញ​ដដែល បន្ទាប់ពី​បាន​កាត់ក្តី​ឱ្យ​ពួកគេ​ជាប់ពន្ធនាគារ​ក្នុង​ម្នាក់​ ៥ ​ឆ្នាំ តែ​ឱ្យ​អនុវត្ត​ទោស ​១៤ ​ខែ​ពាក់ព័ន្ធ​បទចោទ​សូកប៉ាន់​សាក្សី និង​សមគំនិត​សូកប៉ាន់​សាក្សី​ដល់​ នាង ខុម ចាន់តារាទី ហៅ​ ស្រីមុំ​។

  • បន្ទាយមានជ័យៈ ក្នុង​មួយ​ថ្ងៃៗ​មាន​ប្រជាពលរដ្ឋ​នៅតាម​ព្រំដែន ជាពិសេស​ពលករ​ខ្មែរ​ពី ​៤០០ ទៅ​ ៥០០​ នាក់​បាន​ទៅ​ស្នើសុំ​ធ្វើ​បណ្ណ​ឆ្លងដែន ដើម្បី​បាន​ចូលទៅ​ធ្វើការ ឬ​លក់ដូរ​ស្របច្បាប់ នៅក្នុង​ប្រទេស​ថៃ បន្ទាប់ពី​ភាគី​ទាំង​ ២​ បាន​ឯកភាព​គ្នា​បើក​ច្រកព្រំដែន​ឡើងវិញ កាលពី​ថ្ងៃទី​ ១ ខែឧសភា ក្នុង​កម្រិត​ថ្នាក់​តំបន់​។