ភ្នំពេញៈ កម្ពុជាបានផ្តល់លិខិតបញ្ជាក់ឱ្យនាំចេញ-នាំចូល ត្បូងពេជ្រមិនទាន់កែច្នៃ និងសល់ពីការកែច្នៃក្នុងទឹកប្រាក់សរុប ២៤ លានដុល្លារ ក្នុងឆ្នាំ ២០២១ ថយជិតពាក់កណ្តាលបើធៀបនឹងរយៈពេលដូចគ្នាឆ្នាំ ២០២១។ នេះបើយោងតាមក្រសួងពាណិជ្ជកម្ម។
របាយការណ៍របស់ក្រសួងពាណិជ្ជកម្មចេញផ្សាយកាលពីពេលថ្មីៗនេះបង្ហាញថា ក្នុងឆ្នាំ ២០២១ ក្រសួងពាណិជ្ជកម្មបានផ្តល់លិខិតអនុញ្ញាតឱ្យនាំចូល-នាំចេញ ត្បូងពេជ្រមិនទាន់កែច្នៃ និងសល់ពីការកែច្នៃ សរុប ៣៦ ច្បាប់ ស្មើនឹងទឹកប្រាក់ ២៤ លានដុល្លារ ធ្លាក់ចុះប្រមាណ ៤៥ ភាគរយបើធៀបនឹងឆ្នាំ ២០២០ ដែលមានទឹកប្រាក់សរុប ៤៣,៧ លានដុល្លារ និងមានចំនួនលិខិតអនុញ្ញាតសរុប ៤៥ ច្បាប់។
បើតាមក្រសួងពាណិជ្ជកម្ម សម្រាប់ឆ្នាំ ២០២១ លិខិតអនុញ្ញាតឱ្យនាំចូលត្បូងពេជ្រមិនទាន់កែច្នៃ និងសល់ពីការកែច្នៃមានចំនួន ១៥ ច្បាប់ ស្មើទឹកប្រាក់ ១៥ លានដុល្លារ ខណៈកាលពីឆ្នាំ ២០២០ មានចំនួន ២៣ ច្បាប់ និងទឹកប្រាក់ ២៣,៩ លានដុល្លារ។ ចំណែកលិខិតនាំចេញក្នុងឆ្នាំ ២០២១ មាន ២១ ច្បាប់ ស្មើនឹងទឹកប្រាក់ ៩ លានដុល្លារ រីឯឆ្នាំ ២០២០ មានលិខិត ២២ ច្បាប់ និងទឹកប្រាក់ ១៩,៨២ លានដុល្លារ។
អនុប្រធានសភាពាណិជ្ជកម្មកម្ពុជា លោក លឹម ហេង បានប្រាប់ភ្នំពេញប៉ុស្តិ៍ក្នុងថ្ងៃទី ២៨ ខែធ្នូថា ការធ្លាក់ចុះចំនួនប្រាក់នាំចូល-នាំចេញ ត្បូងពេជ្រក្នុងឆ្នាំ ២០២១ គឺបណ្តាលមកពីស្ថានភាពការរីករាលដាលជំងឺកូវីដ ១៩ ព្រោះក្នុងអំឡុងពេលនេះប្រទេសកម្ពុជាមិនបានរៀបចំព្រឹត្តិការណ៍តាំងពិព័រណ៍គ្រឿងអលង្ការ និងត្បូងពេជ្រ ដូចបណ្តាឆ្នាំនៅមុនពេលមានវិបត្តិជំងឺកូវីដ ១៩ ទេ។ លោកបន្តថា ម្យ៉ាងទៀតដោយសារក្នុងឆ្នាំនេះ មិនមានការរៀបចំពិធីបុណ្យ ឬរៀបអាពាហ៍ពិពាហ៍ច្រើន ដូច្នេះតម្រូវការប្រើប្រាស់គ្រឿងអលង្ការក៏ធ្លាក់ចុះទៅតាមនោះដែរ។
លោកនិយាយថា៖ «ការធ្លាក់ចុះនេះជារឿងធម្មតា ព្រោះក្នុងបរិបទនៃការរីករាលដាលកូវីដ ១៩ គ្រប់គ្នាសុទ្ធតែផ្តោតទៅលើបញ្ហាសុខភាព និងស្បៀងអាហារ ខណៈការប្រើគ្រឿងត្បូងពេជ្រ ដើម្បីចូលរួមកម្មវិធីផ្សេងៗក៏មិនសូវមានដែរ»។
ទោះបីយ៉ាងណាចំនួនទឹកប្រាក់នាំចូល-នាំចេញ នឹងកើនឡើងវិញនៅពេលសេដ្ឋកិច្ច និងសកម្មភាពធ្វើដំណើរនៅតាមប្រទេសនីមួយៗត្រូវបានបើកទូលាយឡើងវិញ។
លោក លឹម ហេង បញ្ជាក់ថា៖ «កំណើននៃការនាំចូល និងនាំចេញនឹងកើនឡើងចាប់ពីឆ្នាំ ២០២២ តទៅ ខណៈក្រៅពីនាំចូលដើម្បីប្រើប្រាស់ក្នុងស្រុក នៅកម្ពុជាក៏សម្បូរកន្លែងកែច្នៃ គ្រឿងអលង្ការ និងត្បូងពេជ្រ សម្រាប់នាំចេញទៅលក់នៅទីផ្សារអន្តរជាតិផងដែរ»។
អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ថា តាមរយៈស្ថានភាពប្រទេសកម្ពុជាពេលនេះ លោកគិតថា ទឹកប្រាក់នៃការនាំចូល-នាំចេញត្បូងពេជ្រ នឹងកើនឡើងវិញជាលំដាប់ពីពេលនេះតទៅ ព្រោះការប្រកាសបើកឱ្យមានពិធីរៀបចំអាពាហ៍ពិពាហ៍ និងបុណ្យផ្សេងៗនឹងធ្វើឱ្យតម្រូវការប្រើប្រាស់ និងកែច្នៃគ្រឿងត្បូងពេជ្រ កើនឡើង។ កំណើនការនាំចេញគ្រឿងត្បូងពេជ្រ នឹងអាចជួយបង្កើនការងារផងដែរ។
លោកអះអាងថា៖ «ដោយសារត្បូងពេជ្រ គឺជាគ្រឿងលម្អ ហេតុនេះនៅពេលសេដ្ឋកិច្ចដំណើរការល្អ និងមានការរៀបចំពិធីផ្សេងៗច្រើន ការនាំចូល-នាំចេញនឹងកើនឡើង»។
ក្រសួងពាណិជ្ជកម្ម កន្លងមកធ្លាប់បានឱ្យដឹងថា ប្រទេសថៃ សិង្ហបុរី វៀតណាម បែលហ្ស៊ិក ជប៉ុន អ៊ីតាលី និងប្រទេសចិន គឺជាទីផ្សារនាំចេញធំជាងគេរបស់កម្ពុជា។ ដោយឡែកថៃ សិង្ហបុរី កាណាដា បែលហ្ស៊ិក និងហុងកុង គឺជាទីផ្សារនាំចូលធំជាងគេរបស់កម្ពុជា៕ LA