.jpg)
បន្ទប់ស្នាក់នៅក្នុងផ្ទះសំណាក់ ១ កន្លែង នៅខេត្តព្រះសីហនុ។ រូបថត ហ្វេសប៊ុក
ភ្នំពេញៈ បន្ទប់ស្នាក់នៅចំនួនជាង ៨០ ភាគរយត្រូវបានភ្ញៀវកក់រហូតមកដល់ពេលនេះសម្រាប់ពិធីបុណ្យឆ្លងឆ្នាំសកលនាចុងសប្តាហ៍ ដែលនេះជាអត្រានៃការកក់បន្ទប់ស្នាក់នៅតាមបណ្តាខេត្តមានសក្តានុពលទេសចរណ៍ដូចជា សៀមរាប កែប កំពត និងមណ្ឌលគិរី ខណៈខេត្តគោលដៅមួយចំនួនទៀត ក៏មានអត្រានៃការកក់ខ្ពស់ផងដែរ។
រដ្ឋមន្ត្រីក្រសួងទេសចរណ៍ លោក ថោង ខុន បានឱ្យដឹងក្នុងរបាយការណ៍កាលពីថ្ងៃទី ២៧ ខែធ្នូថា បណ្តារដ្ឋបាលរាជធានីខេត្ត បាននិងកំពុងរៀបចំតុបតែងលម្អទីក្រុង និងទីប្រជុំជន ដើម្បីត្រៀមទទួលឆ្នាំថ្មី និងទាក់ទាញភ្ញៀវទេសចរ ព្រមជាមួយការរៀបចំពិធីរាប់ថយក្រោយ (Countdown) នៅតាមទីតាំងសំខាន់ៗមួយចំនួន។
ជាមួយគ្នានេះ លោកបានបន្តក្រើនរំឭកដល់ប្រតិបត្តិករទេសចរណ៍ និងភ្ញៀវទេសចរឱ្យចូលរួមអនុវត្តឱ្យបានហ្មត់ចត់នូវវិធានសុវត្ថិភាពទេសចរណ៍ និង SOP ដើម្បីចូលរួមទប់ស្កាត់ការរីករាលដាលជំងឺកូវីដ ១៩ ជាយថាហេតុណាមួយ ពិសេសនាឱកាសប្រារព្ធពិធីឆ្លងឆ្នាំសកលខាងមុខ។
ប្រធានមន្ទីរទេសចរណ៍ខេត្តកំពត លោក សយ ស៊ីណុល បានប្រាប់ភ្នំពេញប៉ុស្តិ៍នៅថ្ងៃទី ២៨ ខែធ្នូថា រហូតមកដល់ពេលនេះនៅខេត្តកំពត មានការកក់បន្ទប់ស្នាក់នៅតាមបាងហ្គាឡូ រមណីយដ្ឋាន និងបន្ទប់សណ្ឋាគារធំៗប្រមាណ ៨០ ភាគរយហើយសម្រាប់ការសម្រាកលម្ហែនៅអំឡុងបុណ្យឆ្នាំសកលខាងមុខ។
លោកបន្តថា ដោយឡែកសម្រាប់ផ្ទះសំណាក់ និងសណ្ឋាគារតូចៗមាននៅសល់ទំនេរច្រើនសម្រាប់ប្រជាពលរដ្ឋដែលមានបំណងមកលេងកម្សាន្តនៅក្នុងខេត្តកំពត។
លោក តាំង សុចិត្រគ្រឹះស្នា ប្រធានមន្ទីរទេសចរណ៍ខេត្តព្រះសីហនុបានប្រាប់ថា សម្រាប់ខេត្តព្រះសីហនុ បន្ទប់សណ្ឋាគារលំដាប់ផ្កាយ ៣, ៤, ៥ និងកន្លែងស្នាក់នៅតាមកោះត្រូវបានភ្ញៀវកក់អស់ហើយសម្រាប់ពិធីបុណ្យឆ្លងឆ្នាំសកល នៅឡើយតែសណ្ឋាគារ និងផ្ទះសំណាក់តូចៗប៉ុណ្ណោះ។
លោកប្រាប់ថា៖ «ភ្ញៀវដែលកក់ក៏មានភ្ញៀវបរទេសខ្លះដែរ ប៉ុន្តែពួកគេទាំងនោះ គឺជាទេសចរផ្ទៃក្នុង»។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា ទទួលស្គាល់ថា សម្រាប់ពិធីបុណ្យឆ្លងឆ្នាំសកលខាងមុខ ប្រជាពលរដ្ឋនៅក្នុងស្រុកបានចាប់អារម្មណ៍ និងមានផែនការចេញដើរលេងកម្សាន្តច្រើន។
លោកស្រីថ្លែងថា៖ «តាមខ្ញុំដឹងខេត្តដែលជាគោលដៅទេសចរណ៍នៅប៉ែកសមុទ្រកក់ពេញអស់ហើយ ចំណែកប៉ែកឦសានក៏ពេញដែរ។ និយាយទៅកន្លែងដែលមានសេវាកម្មល្អៗហ្នឹង គឺពេញអស់ហើយ»។
បើតាមលោកស្រី ឆាយ ស៊ីវលីន នៅពេលមានការកក់បន្ទប់សណ្ឋាគារ ផ្ទះសំណាក់ និងរមណីយដ្ឋានច្រើនបែបនេះ វាជាសញ្ញាល្អសម្រាប់វិស័យទេសចរណ៍កម្ពុជា។
បើតាមលោក ថោង ខុន នៅរយៈពេល ២ ថ្ងៃ ចុងសប្តាហ៍កន្លងទៅ (ថ្ងៃទី ២៥-២៦ ខែធ្នូ ឆ្នាំ ២០២១) មានភ្ញៀវចេញដើរកម្សាន្ត តាមរមណីយដ្ឋាននានាសរុប២៥៣ ៦២១ នាក់ក្នុងនោះភ្ញៀវជាតិ ២៤២ ៩៨៦ នាក់ និងភ្ញៀវបរទេសផ្ទៃក្នុង ១០ ៦៣៥ នាក់ កើនឡើង ២៤,៧ ភាគរយបើធៀបនឹងចុងសប្តាហ៍កន្លងមក៕ LA
វីដេអូ៖
