.jpg)
ម៉ាស៊ីនស្ទូចកុងតឺន័រទំនិញពីលើរថយន្តទៅដាក់កប៉ាល់សម្រាប់នាំចេញទៅកាន់ទីផ្សារអន្តរជាតិ។ ហ៊ាន រង្សី
ភ្នំពេញៈ ប្រធានសមាគមភ័ស្តុភារកម្មកម្ពុជា និងធុរជនបានលើកឡើងថា ការដឹកជញ្ជូនទំនិញកម្ពុជា ទៅកាន់ប្រទេសចិន មិនទាន់មានការកកស្ទះ ឬខូចខាតដោយសារតែវិធានការតឹងរ៉ឹងដើម្បីទប់ស្កាត់ការឆ្លងរីករាលដាលជំងឺកូវីដ ១៩ នៅក្នុងប្រទេសចិននោះទេ ខណៈប្រទេសជិតខាងកម្ពុជាកំពុងកកស្ទះទំនិញ ដែលនាំឱ្យខូចខាតអស់ជាច្រើន។
កាលពីសប្តាហ៍មុនអាជ្ញាធរប្រទេសចិនបានបិទខ្ទប់ទីក្រុងមួយចំនួនដោយសារតែការផ្ទុះការរីករាលដាលនៃវីរុសបំប្លែងខ្លួនថ្មីប្រភេទដែលតា និងប្រភេទអូមីក្រុង។
ប្រធានសមាគមភ័ស្តុភារកម្មកម្ពុជា លោក ស៊ិន ចន្ធី បានប្រាប់ភ្នំពេញប៉ុស្តិ៍នៅថ្ងៃទី ២៨ ខែធ្នូ ថា ការនាំទំនិញទៅកាន់ប្រទេសចិន ជាពិសេសទំនិញកសិកម្មពីប្រទេសមួយចំនួនមានការខូចខាតច្រើន ព្រោះតែការកកស្ទះខ្លាំងនៅតាមព្រំដែនប្រទេសចិន ដោយសារតែមានការដាក់ចេញវិធានការតឹងរ៉ឹងរបស់ប្រទេសនេះ បន្ទាប់ពីមានការរកឃើញវត្តមានជំងឺកូវីដ ១៩ ជាបន្តបន្ទាប់។
លោកបានបន្តថា៖ «សម្រាប់កម្ពុជានៅតែមានការនាំចេញទៅជារឿយៗ ដោយមិនមានការកកស្ទះខូចខាតផលិតផលច្រើននោះទេ គ្រាន់តែមុននឹងនាំចេញត្រូវមានការត្រួតពិនិត្យហ្មត់ចត់ និងមានការរឹតត្បិតជាងមុន ពិសេសចំពោះការវេចខ្ចប់ទំនិញកសិកម្ម ត្រូវតែមានលក្ខណៈប្រយ័ត្នខ្ពស់»។
លោក ហ៊ុន ឡាក់ អគ្គនាយកក្រុមហ៊ុនត្រូពិកខេម ដែលនាំចេញផលិតផលកសិកម្មទៅប្រទេសចិនបានឱ្យដឹងថា ការនាំចេញផលិតផលកសិកម្មរបស់ក្រុមហ៊ុនលោកមិនមានបញ្ហាទេ ដោយសារទំនិញក្រុមហ៊ុននាំចេញតាមកំពង់ផែ រីឯទំនិញដែលកកស្ទះនៅតាមព្រំដែនប្រទេសចិន ភាគច្រើននាំចេញទៅតាមប្រទេសវៀតណាម។
លោកបានបន្ថែមថា ប្រទេសចិនបានចេញវិធានការយ៉ាងតឹងរ៉ឹងក្នុងយុទ្ធនាការកូវីដសូន្យរបស់ខ្លួន ដោយសារតែកន្លងទៅចិនធ្លាប់បានរកឃើញមានវីរុសកូវីដ ១៩ នៅលើសម្បកកេសដែលបានវេចខ្ចប់ទំនិញតាមច្រកព្រំដែនក្បែរប្រទេសម៉ុងហ្គោលី។
លោកប្រាប់ថា៖ «ចិនអនុវត្តវិធានការនេះ មិនជាបញ្ហានោះទេ ព្រោះគេត្រូវការការពារសុខុមាលភាពរបស់ប្រជាជនគេដែរ ដូចនេះមុននឹងនាំចេញ យើងជាក្រុមហ៊ុននាំចេញត្រូវតែអនុវត្តឱ្យបាននូវលក្ខខណ្ឌតម្រូវរបស់ប្រទេសគេ»។
លោកបញ្ជាក់ថា៖ «ជាទូទៅលក្ខខណ្ឌតម្រូវនៅក្នុងពិធីសារ នាំផលិតផលកសិកម្មកម្ពុជាទៅកាន់ប្រទេសចិន គឺយើងត្រូវធ្វើយ៉ាងណាអនុវត្តឱ្យបាននូវអនាម័យ និងភូតគាមអនាម័យ ហើយក្នុងអំឡុងពេលកូវីដនេះ គឺភាគីចិនគេតម្រូវឱ្យយើងបាញ់ថ្នាំការពារកូវីដ ១៩ នៅលើទូកុងតឺន័រ និងសម្បកកេសវេចខ្ចប់ ដូចនេះយើងត្រូវតែចំណាយបន្ថែមលើបញ្ហានេះ ដើម្បីធានាកុំឱ្យមានមេរោគនៅលើទំនិញរបស់យើង»។
ចំពោះតម្លៃនៃការដឹកជញ្ជូនក្នុងតំបន់វិញ ត្រូវបានប្រធានសមាគមភ័ស្តុភារកម្មកម្ពុជាឱ្យដឹងថា ហាក់មានភាពប្រសើរជាមុនខ្លះៗហើយ ខណៈការដឹកជញ្ជូនឆ្លងទ្វីបទៅកាន់តំបន់អឺរ៉ុប និងអាមេរិកនៅតែមានតម្លៃខ្ពស់ដដែល។
ដោយឡែកការដឹកជញ្ជូនក្នុងស្រុកវិញនៅមានតម្លៃថេរសមរម្យដដែល បើទោះបីតម្លៃប្រេងឥន្ធនៈមានការឡើងថ្លៃក៏ដោយ។ លោក ស៊ិន ចន្ធី បានបញ្ជាក់ថា ការបន្តរក្សាតម្លៃដឹកជញ្ជូនក្នុងស្រុកនេះ ដើម្បីជំរុញឱ្យវិស័យដឹកជញ្ជូនល្អប្រសើរឡើងវិញ ក្រោយការប្រកាសបើកសេដ្ឋកិច្ចឡើងវិញរបស់រាជរដ្ឋាភិបាល។
កាលពីចុងសប្តាហ៍កន្លងទៅប្រទេសចិនបានរាយការណ៍ពីចំនួនករណីឆ្លងជំងឺកូវីដ ១៩ ថ្មីខ្ពស់បំផុតនៅក្នុងរយៈពេល ៤ ខែចុងក្រោយនេះ ខណៈក្រុមមន្ត្រីកំពុងដុតដៃដុតជើងដាក់ចេញវិធានការទប់ស្កាត់នានារួមទាំងការបិទខ្ទប់ក្រុងដែលមានប្រជាជនរាប់លាន។ ការដាក់ចេញវិធានការទាំងអស់នោះក៏បង្កឱ្យមានបញ្ហាកកស្ទះខ្លាំងផងដែរចំពោះការដឹកជញ្ជូនទំនិញ ពិសេសការដឹកជញ្ជូនតាមផ្លូវគោក៕ LA
