.jpg)
វិភាគដោយ៖ លោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុនៃក្រុមហ៊ុន ហ្គោលដេន អេហ្វអិកស៍ លីង ឃែភីថល
តម្លៃប្រេងឆៅបានប្រែប្រួលក្នុងរង្វង់ ៧៦,០៥ ទៅ ៧២,៥៣ ដុល្លារ ក្នុង ១ បារ៉ែល កាលពីថ្ងៃចន្ទ ខណៈដែលប្រេងឆៅ WTI Crude បានកើនឡើង ០,២១% ក្នុង ១ បារ៉ែល។ នៅក្នុងទីផ្សារអាស៊ី តម្លៃប្រេងឆៅដែលបានស្ទុះងើបឡើងវិញតាំងពីសប្តាហ៍មុន បានបន្តកើនឡើងនៅថ្ងៃអង្គារ ខណៈផលប៉ះពាល់នៃវីរុស Omicron លែងជាបញ្ហាប្រឈមខ្លាំង ទោះជាការផ្គត់ផ្គង់ប្រេងនៅតែស្ថិតក្នុងស្ថានភាពតឹងរ៊ឹងក៏ដោយ។
អ្នកវិភាគឈ្មោះ Leona Liu ប្រចាំគេហទំព័រ DailyFX ដែលមានមូលដ្ឋាននៅសិង្ហបុរីបាននិយាយថា៖ «ទោះបីជា Omicron កំពុងរីករាលដាលលឿនជាងប្រភេទវីរុសផ្សេងក៏ដោយ ប៉ុន្តែព័ត៌មានភាគច្រើនបានបង្ហាញថា មនុស្សភាគច្រើនដែលឆ្លង Omicron កំពុងតែធូរស្រាលឡើងវិញ»។
ចំណែក គេហទំព័រ Oilprice.com ក៏បានរាយការណ៍កាលពីថ្ងៃចន្ទដែរថា៖ «ទោះបីជាវីរុស Omicron អាចបង្កឱ្យមានការភ័យខ្លាចនៃការបិទខ្ទប់ថ្មី និងការរឹតបន្តឹងផ្សេងទៀតក៏ដោយ អារ៉ាប៊ីសាអ៊ូឌីត នៅតែបានដំឡើងតម្លៃលក់ជាផ្លូវការរបស់ខ្លួនសម្រាប់អ្នកទិញនៅអាស៊ី»។
ការសម្រេចចិត្តដំឡើងថ្លៃនេះ បានបង្ហាញពីទំនុកចិត្តថាតម្រូវការប្រេងនឹងនៅតែខ្ពស់ ទោះបីជាមានការរាតត្បាតថ្មីក៏ដោយ។ ជារួម តម្លៃប្រេងបានហក់ឡើងជាង ៥០% នៅក្នុងឆ្នាំនេះ ដែលជំរុញដោយការងើបឡើងវិញនៃតម្រូវការ និងការកាត់បន្ថយការផ្គត់ផ្គង់របស់អង្គការ OPEC+។
បើយោងតាមការវិភាគផ្នែកព័ត៌មានខាងលើនេះ តម្លៃហាងឆេងប្រេងឆៅនឹងអាចរត់ក្នុងចន្លោះពីតម្លៃ ៦២ ទៅ ៧៨,៧៦ ដុល្លារក្នុងសប្តាហ៍នេះ។ ដូច្នេះ សម្រាប់ការវិភាគជួញដូរវិញ វិនិយោគិនអាចរង់ចាំទិញប្រេងនៅតម្លៃ ៧០,៥៥ ដុល្លារ ដោយកំណត់មុខងារទាញយកប្រាក់ចំណេញនៅតម្លៃ ៧៥,៥០ ដុល្លារ និងមុខងារការពារហានិភ័យនៅតម្លៃ ៦៧,៤៤ ដុល្លារ៕
