ភ្នំពេញៈ ចិននឹងចាប់ផ្តើមសាងសង់ឃ្លាំងស្តុកចំនួន ១២ និងឡសម្ងួតចំនួន ១០ នៅក្នុងប្រទេសកម្ពុជា នៅឆ្នាំ ២០២២ ដែលជាវិធានការមួយដើម្បីជួយឱ្យកម្ពុជាក្លាយជាប្រទេសផ្គត់ផ្គង់ស្បៀងអាហារដ៏សំខាន់សម្រាប់តំបន់ និងពិភពលោក។ នេះបើយោងតាមអ្នកនាំពាក្យក្រសួងពាណិជ្ជកម្ម (MoC)។
កាលពីខែឧសភា ឆ្នាំ ២០១៩ លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម លោក Bi Guangmin ប្រធានក្រុមប្រឹក្សាភិបាលខេត្ត Henan និងក្រុមហ៊ុន Yuguang International Economic & Technical Cooperation បានបង្ហាញផែនការសាងសង់ឃ្លាំងស្តុក និងឡសម្ងួតដែលមានសមត្ថភាពស្តុកស្រូវអង្កររហូតដល់ ១ លានតោន។
លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្ម បានប្រាប់ ភ្នំពេញ ប៉ុស្តិ៍ កាលពីថ្ងៃទី ២៩ ខែធ្នូថា ក្រុមហ៊ុន Green Trade បានដាក់ជូនឯកសាររួចរាល់អស់ហើយ បន្ទាប់ពីពួកគេបានសិក្សាលទ្ធភាពនៃការចំណាយលើការវិនិយោគ និងទីតាំងយុទ្ធសាស្ត្រសម្រាប់ការសាងសង់ឃ្លាំងស្ដុកទាំងនោះ។
លោកលើកឡើងថា៖ «យើងបានដាក់សំណើវិនិយោគរបស់យើងទៅសមភាគីចិនសម្រាប់ការសាងសង់រួចហើយ បន្ទាប់ពីយើងបានចុះហត្ថលេ-ខាលើអនុស្សរណៈនៃការយោគយល់គ្នា (MoU)ជាមួយរដ្ឋបាលខេត្ត Hunan ប្រទេសចិន។ យើងបានសិក្សាលម្អិតរួចហើយពីតម្លៃនៃការវិនិយោគ និងទីតាំងយុទ្ធសាស្ត្រ»។
លោកបន្ថែមថា៖ «ជាមួយនឹងឃ្លាំងស្ដុកទាំងនេះ វានឹងក្លាយទៅជាការរួមចំណែកដ៏ធំពីរដ្ឋាភិបាលចិនសម្រាប់វិស័យស្រូវអង្ករកម្ពុជា ពិសេសដើម្បីជួយកសិករយើងឱ្យអាចរក្សាទុកទិន្នផលរបស់ពួកគេ និងជួយរក្សាការប្រែប្រួលតម្លៃដែលធ្វើឡើងដោយឈ្មួញកណ្តាលផងដែរ»។
លោកបញ្ជាក់ថា៖ «នៅពេលដែលយើងមានឃ្លាំងស្ដុកទាំងនេះ វាអាចធានាតម្លៃដល់កសិកររបស់យើង។ ទន្ទឹមនឹងនេះកសិករក៏អាចមានឯកសារត្រឹមត្រូវពីក្រុមហ៊ុនដែលជាម្ចាស់ឃ្លាំងស្ដុកទាំងនោះ ដើម្បីទទួលបានកម្ចីពីស្ថាប័នហិរញ្ញវត្ថុ»។
លោក សុង សារ៉ន ប្រធានសហព័ន្ធស្រូវអង្ករកម្ពុជាបានឱ្យដឹងថា ការសាងសង់ឃ្លាំងស្តុកស្រូវ និងឡសម្ងួតនឹងចូលរួមចំណែកយ៉ាងច្រើនសម្រាប់និរន្តរភាពនៃវិស័យស្រូវអង្ករ ជាពិសេសជួយដល់កសិករដែលមិនមានឃ្លាំងស្ដុកគ្រប់គ្រាន់ក្នុងរដូវប្រមូលផល។
លោកថ្លែងថា៖ «ការបង្កើតឃ្លាំងស្តុក និងឡសម្ងួត នឹងផ្តល់អត្ថប្រយោជន៍ច្រើនដល់កសិករដែលនៅជិតទីតាំងនោះ ហើយវាក៏នឹងជំរុញការនាំចេញផងដែរ។ ទន្ទឹមនឹងនេះ យើងក៏អាចទាក់ទាញការវិនិយោគបន្ថែមពីក្រុមហ៊ុនចិន ដើម្បីបង្កើតរោងចក្រកិនស្រូវរបស់ពួកគេសម្រាប់ការនាំចេញ»។
បើតាមលោក សុវិជាតិ ឃ្លាំងស្តុកទាំង ១២ អាចស្តុកស្រូវបាន ១ លានតោន និងឡសម្ងួត ១០ អាចសម្ងួតបាន ១៣ ០០០ តោន ក្នុង ១ ថ្ងៃ។
បើយោងតាមអនុស្សរណៈនៃការយោគយល់គ្នានោះ ឃ្លាំងស្ដុកទាំងនោះនឹងមានទីតាំងនៅខេត្តកំពង់ធំ ពោធិ៍សាត់ បាត់ដំបង បន្ទាយមានជ័យ សៀមរាប កំពង់ចាម ព្រៃវែង កណ្តាល កំពង់ស្ពឺ តាកែវ និងព្រះសីហនុ៕