ភ្នំពេញៈ ក្រុមហ៊ុន អានកូ អាហរ័ណ នីហរ័ណ នឹងធ្វើការវិនិយោគលើគម្រោងពហុបំណងលើផ្ទៃដីទំហំ ៦ ១៤៥,៩៦ ហិកតា ក្នុងឧទ្យានជាតិបទុមសាគរនៃខេត្តកោះកុង បន្ទាប់ពីទទួលបានភ្លើងខៀវពីអាជ្ញាធរខេត្ត ដើម្បីទាក់ទាញវិនិយោគិនជាតិ និងអន្តរជាតិឱ្យធ្វើដំណើរទៅកាន់ខេត្តនេះកាន់តែច្រើន។
លោក អ៊ុក ភក្ត្រា អភិបាលរងខេត្តកោះកុងបានប្រាប់ភ្នំពេញប៉ុស្តិ៍នៅថ្ងៃទី ៣០ ខែធ្នូថា គម្រោងនេះត្រូវបានស្រុកទាំង ២ គឺស្រុកបទុមសាគរ និងស្រុកគិរីសាគរ ព្រមទាំងរដ្ឋបាលខេត្ត និងក្រសួងបរិស្ថានឯកភាពគ្នារួចហើយ ប៉ុន្តែលោកមិនទាន់ដឹងថា ក្រុមហ៊ុននឹងចាប់ផ្តើមដំណើរការសាងសង់ ឬអភិវឌ្ឍនៅពេលណា និងចំណាយទុនវិនិយោគប៉ុន្មាននោះទេ។ លោកបន្តថា គម្រោងពហុបំណងដែលក្រុមហ៊ុនដាក់ចេញ សម្រាប់ធ្វើការអភិវឌ្ឍនេះនឹងផ្តោតសំខាន់ទៅលើការសាងសង់សណ្ឋាគារលំដាប់ផ្កាយ ៥ មណ្ឌលកម្សាន្ត រមណីយដ្ឋាន និងរៀបចំទៅជាកន្លែងសម្រាប់បម្រើឱ្យការវិនិយោគ និងទេសចរណ៍រួមជាមួយគម្រោងជាច្រើនទៀត។
បើតាមលោក អ៊ុក ភក្ត្រា នេះគ្រាន់តែជាការឯកភាពគ្នារបស់ថ្នាក់ស្រុក ខេត្ត និងក្រសួងបរិស្ថានប៉ុណ្ណោះ បន្ទាប់ពីចុះត្រួតពិនិត្យជាក់ស្តែងចំពោះទំហំដី និងទីតាំងត្រូវវិនិយោគ កាលពីថ្ងៃទី ២៩ ខែធ្នូ ឆ្នាំ ២០២១ ប៉ុន្តែមិនទាន់មានការឯកភាពពីរាជរដ្ឋាភិបាលនៅឡើយទេ។
លោកថ្លែងថា៖ «គម្រោងនេះនឹងលើកស្ទួយសេដ្ឋកិច្ចជាតិ។ ប្រជាពលរដ្ឋនៅមូលដ្ឋានក៏នឹងទទួលបាននូវផលប្រយោជន៍ពីគម្រោងនេះផងដែរ។ មិនថាវិនិយោគនៅក្រៅស្រុក ឬក្នុងស្រុកទេឱ្យតែមកវិនិយោគពិតប្រាកដ គឺជាភាពជោគជ័យមួយហើយសម្រាប់ខេត្ត ហើយវាក៏បានជួយអភិវឌ្ឍខេត្តផងដែរ»។
បើតាមលោក ភក្ត្រា នៅក្នុងតំបន់នេះក៏មានគម្រោងវិនិយោគធំៗបានបង្ហាញខ្លួនជាច្រើនផងដែរ ដូចជា ព្រលានយន្តហោះតារាសាគរកម្រិត 4E កំពង់ផែទឹកជ្រៅ ផ្លូវជាតិលេខ ៤៨ ផ្លូវជាតិលេខ ១០ រួមទាំងគម្រោងអភិវឌ្ឍន៍ដ៏សន្ធឹកសន្ធាប់ផ្សេងទៀត។
ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជាលោក ធួន ស៊ីណាន បានស្វាគមន៍ចំពោះគម្រោងដ៏ធំមួយនេះ ខណៈខេត្តកោះកុងត្រូវការការវិនិយោគគ្រប់វិស័យ។ ខេត្តកោះកុងសម្បូរដោយធនធានធម្មជាតិសម្រាប់បម្រើឱ្យវិស័យទេសចរណ៍ ដែលមិនមានខេត្តណាមានលក្ខណៈល្អស្អាត និងធម្មជាតិដូចខេត្តនេះទេ។
ទោះបីយ៉ាងណាលោកលើកឡើងថា កន្លងមកខេត្តមួយនេះហាក់មានភាពកម្សត់ជាងខេត្តដទៃ ព្រោះមិនសូវមានអ្នកវិនិយោគចូលបណ្តាក់ទុនច្រើន ដោយសារបញ្ហាភ្លើងអគ្គិសនីមិនមានគ្រប់គ្រាន់ដែលជាឧបសគ្គមួយក្នុងចំណោមឧបសគ្គដទៃជាច្រើនផ្សេងទៀត។
លោកប្រាប់ថា៖ «សម្រាប់ខ្ញុំ គឺរីករាយណាស់នៅពេលដែលឃើញមានការអភិវឌ្ឍក្នុងខេត្តកោះកុង និងមានគម្រោងវិនិយោគបែបនេះ ព្រោះខេត្តនេះកម្សត់ជាងគេ ហើយបើធៀបចម្ងាយផ្លូវ គឺនៅជិតជាងខេត្តមណ្ឌលគិរី ប៉ុន្តែបើគិតពីការអភិវឌ្ឍគឺគេមើលមិនសូវឃើញទេ។ ខេត្តនេះ មានសក្តានុពលខ្លាំងមែនទែន»។
លោករំពឹងថា រដ្ឋាភិបាលនឹងស្វែងរកគន្លឹះសំខាន់ៗដើម្បីដោះស្រាយរាល់ឧបសគ្គដែលរាំងស្ទះដល់អ្នកវិនិយោគជាតិ-អន្តរជាតិអាចឱ្យចូលបណ្តាក់ទុនលើគ្រប់វិស័យ ដើម្បីឱ្យខេត្តនេះ មានការអភិវឌ្ឍរីកចម្រើនបន្ថែមទៀត និងផ្តល់ចំណូលដល់សេដ្ឋកិច្ចជាតិ និងប្រជាជនមូលដ្ឋានឱ្យកាន់តែមានជីវភាពធូរធារបន្ថែមទៀត៕ LA