ភ្នំពេញៈ ក្រុមហ៊ុនទេសចរណ៍ធំមួយរបស់ស្វ៊ីស Asian Trail Group ដែលកំពុងវិនិយោគលើរមណីយដ្ឋានកោះរុង (The Royal Sands Koh Rong) មានគម្រោងពង្រីកការវិនិយោគបន្ថែមនៅកម្ពុជា បន្ទាប់ពីរដ្ឋាភិបាលប្រកាសបើកប្រទេសឡើងវិញ ក្រោយពេលស្ថានភាពការរីករាលដាលជំងឺកូវីដ ១៩ មានភាពធូរស្រាល។
ព័ត៌មាននេះត្រូវបានលើកឡើងក្នុងជំនួបរវាងលោក អ៊ូក សោភ័ណ ឯកអគ្គរាជទូតកម្ពុជាប្រចាំនៅប្រទេសថៃ ជាមួយឯកអគ្គរដ្ឋទូតស្វ៊ីសប្រចាំប្រទេសថៃ លោកស្រី Helene Budliger Artieda និងថ្នាក់ដឹកនាំក្រុមហ៊ុន Asian Trail Group កាលពីថ្ងៃទី ២៨ ខែធ្នូ។
លោក អ៊ូក សោភ័ណ បានប្រាប់ភ្នំពេញប៉ុស្តិ៍នៅថ្ងៃទី ៣០ ខែធ្នូថា ក្រុមហ៊ុនទេសចរណ៍ដ៏ធំរបស់ស្វ៊ីសដែលបច្ចុប្បន្នមានការិយាល័យនៅថៃ, កម្ពុជា,ឡាវ, វៀតណាម, ឥណ្ឌូនេស៊ី, ម៉ាឡេស៊ី, មីយ៉ាន់ម៉ា, សិង្ហបុរី, ចិន និងហុងកុង មានបំណងចង់ពង្រីកការវិនិយោគបន្ថែមលើវិស័យទេសចរណ៍នៅកម្ពុជា ដោយក្រុមហ៊ុនសម្លឹងឃើញពីសក្តានុពលការវិនិយោគតំបន់អេកូទេសចរណ៍ធម្មជាតិ។
លោកបន្តថា ស្ថានទូតកម្ពុជាប្រចាំប្រទេសថៃ តែងតែធ្វើការផ្សព្វផ្សាយពីឱកាសវិនិយោគនៅកម្ពុជាទៅដល់វិនិយោគិនប្រទេសនានា។
លោកបញ្ជាក់ថា៖ «យើងបានផ្សព្វផ្សាយពីច្បាប់ស្តីពីវិនិយោគថ្មី គោលនយោបាយការទូតសេដ្ឋកិច្ច ការកែទម្រង់បន្ទាប់ពីកូវីដដែលបានដាក់ចេញដោយក្រសួងសេដ្ឋកិច្ច។ មួយរយៈនេះយើងសង្កេតឃើញមានក្រុមហ៊ុនបរទេសមួយចំនួននៅថៃ ចាប់អារម្មណ៍ចង់ពង្រីកប្រតិបត្តិការរបស់ខ្លួននៅកម្ពុជា»។
ទីប្រឹក្សាសមាគមទីភ្នាក់ងារទេសចរណ៍កម្ពុជា លោក ហូ វណ្ឌី បានប្រាប់ថា បច្ចុប្បន្នការវិនិយោគលើក្រុមហ៊ុនទេសចរណ៍នៅកម្ពុជាពីសំណាក់អ្នកវិនិយោគបរទេសមានជិត ២០ ភាគរយប៉ុណ្ណោះ ខណៈក្រុមហ៊ុនខ្លះបានក្ស័យទុនហើយនាអំឡុងពេលកូវីដ ១៩ រីករាលដាល។
លោកបន្ថែមថា កាលពី ៣០ ឆ្នាំមុន ក្រុមហ៊ុនទេសចរណ៍នៅកម្ពុជាភាគច្រើនជាក្រុមហ៊ុនបរទេស ប៉ុន្តែបច្ចុប្បន្នផ្លាស់ប្តូរហើយ ដោយវិនិយោគិនក្នុងស្រុកកាន់ច្រើនចាប់ផ្តើមមានសមត្ថភាព និងលទ្ធភាពដំណើរការក្រុមហ៊ុនទេសចរណ៍។
លោកនិយាយថា៖ «ក្រោយប្រកាសបើកទទួលទេសចរណ៍ចាក់វ៉ាក់សាំងកូវីដ ១៩ មានក្រុមហ៊ុនទេសចរណ៍ពី ៧០ ទៅ ៨០ ភាគរយដែលបើកដំណើរការឡើងវិញ ខណៈក្រុមហ៊ុនទើបបើកថ្មី មានតិចតួចប៉ុណ្ណោះ ដោយសារប្រតិបត្តិករទាំងអស់នោះកំពុងរង់ចាំមើលស្ថានភាពកូវីដ ១៩សិន ព្រោះកូវីដបំប្លែងថ្មីអូមីក្រុង បានមកដល់ទៀតហើយ ដូចនេះមិនទាន់មានការបើកច្រើននៅឡើយទេ»។
បច្ចុប្បន្នក្រសួងទេសចរណ៍កំពុងខិតខំស្តារវិស័យទេសចរណ៍ឡើងវិញ ដោយចាប់ផ្តើមពីការបើកទេសចរណ៍ក្នុងស្រុក និងការទទួលភ្ញៀវទេសចរបរទេសចាក់វ៉ាក់សាំងរួច តាមរយៈការត្រៀមខ្លួនដោះស្រាយបញ្ហា ដែលអាចកើតមានក្រោយពីការផ្ទុះឡើងនូវមេរោគបំប្លែងថ្មី អូមីក្រុង៕ LA