.jpg)
ភ្នំពេញៈ កម្ពុជា បាននាំចេញកសិផលទៅទីផ្សារអន្តរជាតិក្នុងឆ្នាំ២០២១ ក្នុងបរិមាណជិត ៨លានតោន កើន ៦៣ភាគរយបើធៀបនឹងឆ្នាំ២០២០ និងរកចំណូលបានជិត ៥ពាន់លានដុល្លារ។ នេះបើយោងតាមរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ។
ទិន្នន័យផ្សព្វផ្សាយនៅលើបណ្តាញសង្គមផ្ទាល់ខ្លួនរបស់ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ឱ្យដឹងថា យោងតាមប្រព័ន្ធទិន្នន័យគ្រឹះភូតគាមអនាម័យជាតិ (National Phytosanitary Database) របស់អគ្គនាយកដ្ឋានកសិកម្ម នៃក្រសួងកសិកម្ម រុក្ខាប្រមាញ់ និងនេសាទ ក្នុងឆ្នាំ២០២១ កម្ពុជាបាននាំចេញកសិផលទៅទីផ្សារអន្តរជាតិ(៦៨ប្រទេស) ក្នុងបរិមាណសរុប ៧ ៩៨៤ ២៥១,៨៣តោន កើនឡើង ៣ ១១០ ៧៩០,៧៣ តោនស្មើនឹង ៦៣,៨៣ភាគរយ បើធៀបនឹងរយៈពេលដូចគ្នាក្នុងឆ្នាំ២០២០។
លោកបានលើកឡើងថា៖«តាមរយៈការបូកសរុបជាបឋមឱ្យដឹងថា តម្លៃសរុបនៃការនាំចេញកសិផលកម្ពុជា រយៈពេល ១២ខែ ឆ្នាំ២០២១ មានចំនួន ៤ ៩៦៧ ៨៥២ ៧១៣ដុល្លារ»។
បើតាម លោក វេង សាខុន ផលិតផលកសិកម្មសំខាន់ៗដែលប្រទេសកម្ពុជាធ្វើការនាំចេញ មានដូចជា អង្ករ ស្រូវ កៅស៊ូ, ដំឡូងមី ស្វាយ ពោត ចេក ម្រេច និងបន្លែចម្រុះ។
ក្នុងពិធីសម្ពោធដាក់ឱ្យដំណើរការ មជ្ឈមណ្ឌលបន្លែសុវត្ថិភាពគំរូ និងការបង្កើតភាពជាដៃគូដើម្បីជំរុញខ្សែច្រវាក់បន្លែសុវត្ថិភាពតាមស្តង់ដាការអនុវត្តកសិកម្មល្អកម្ពុជា (CamGAP) នៅខេត្តកណ្តាល កាលពីថ្ងៃទី៣០ ខែធ្នូ ឆ្នាំ២០២១ លោក វេង សាខុន បានលើកឡើងថា សកម្មភាពនៃការដាំដុះ ប្រមូលផល និងការនាំចេញផលិតផលកសិកម្មនៅកម្ពុជាកំពុងកើនឡើងជាបន្តបន្ទាប់ ជាពិសេសចាប់តាំងពីការផ្ទុះឡើងនៃជំងឺកូវីដ១៩។ លោកបន្តថា ជាមួយនេះក្រសួងកសិកម្ម ក៏បានដាក់ចេញនូវគោលនយោបាយជាច្រើនផងដែរ ដើម្បីជួយគាំទ្រ និងជំរុញបរិមាណផលិត និងគុណភាពសម្រាប់ឆ្លើយតបទៅនឹងតម្រូវការក្នុងស្រុក និងឈានទៅការនាំចេញ។
កាលពីឆ្នាំ២០២០ ការនាំចេញផលិតផលកសិកម្ម មានទឹកប្រាក់ប្រមាណ ៤,៤៩ពាន់លានដុល្លារ។ នេះបើតាមក្រសួងកសិកម្ម រុក្ខាប្រមាញ់ និងនេសាទ៕
