ភ្នំពេញៈ តម្លៃដំឡូងមីក្នុងខេត្តបាត់ដំបង ដែលនៅជាប់ព្រំដែនប្រទេសថៃ នាដំណាច់ខែធ្នូ ឆ្នាំ ២០២១ មានការប្រែប្រួលតិចតួច បើធៀបនឹងរយៈពេលដូចគ្នាឆ្នាំ ២០២០ ខណៈការប្រមូលផលសម្រេចបានប្រមាណ ៤០ភាគរយហើយ។ នេះបើយោងតាមថ្នាក់ដឹកនាំនៃមន្ទីរពាណិជ្ជកម្មខេត្តបាត់ដំបង។
ទិន្នន័យពីមន្ទីរពាណិជ្ជកម្មខេត្តបាត់ដំបង ឱ្យដឹងថា ក្នុងខែធ្នូ ឆ្នាំ ២០២១ ដំឡូងមីក្រៀម មានតម្លៃជាមធ្យមចន្លោះពី ៧៨៦ - ៨៦៩រៀលក្នុង ១គីឡូក្រាម ខណៈកាលពីខែធ្នូ ឆ្នាំ ២០២០ មានតម្លៃ ៦៦៧ - ៨៧៥រៀល។ ចំណែកដំឡូងមីស្រស់ មានតម្លៃពី ២៦០- ៣៦០រៀលធៀបនឹង ២៦៧ - ៣៦៣រៀល។
ប្រធានមន្ទីរពាណិជ្ជកម្ម ខេត្តបាត់ដំបង លោក គឹម ហួត បានប្រាប់ថា តម្លៃដំឡូងមី នាដំណាច់ឆ្នាំ ២០២១ នេះអាចទាបជាងឆ្នាំ ២០២០ បន្តិច ដោយសារគុណភាពដំឡូងពុំសូវល្អ ព្រោះប្រជាកសិករដាំដុះភាគច្រើនឆាប់ដកដំឡូងមុនអាយុ ដែលធ្វើឱ្យកម្រិតជាតិម្សៅទាប និងជាប់ដីច្រើន។
លោកបន្តថា ផលិតផលដំឡូងមីក្នុងខេត្តបាត់ដំបង ប្រមាណ ៧០ ភាគរយត្រូវបាននាំទៅកាន់ប្រទេសថៃ និងប្រទេស វៀតណាម ខណៈសល់ពីនោះសម្រាប់ប្រើប្រាស់ក្នុងស្រុក។
ទាក់ទងនឹងការនាំចេញ លោក គឹម ហួត បានលើកឡើងថា៖ «ការនាំចេញនៅឆ្នាំនេះ ពុំសូវជួបឧបសគ្គដូចឆ្នាំកន្លងមកទេ (ការរឹតបន្តឹងព្រំដែនដើម្បីទប់ស្កាត់ការឆ្លងរាលដាលជំងឺកូវីដ១៩)»។
ដំឡូងមី គឺជាដំណាំកសិឧស្សាហកម្មឈានមុខគេមួយរបស់កម្ពុជា។ កាលពីឆ្នាំ ២០២០ កម្ពុជាបានប្រកាសដាក់ចេញជាផ្លូវការនូវ «គោលនយោបាយជាឮតិស្តីពីដំឡូងមី ២០២០-២០២៥» ក្នុងគោលបំណងដើម្បីបង្កើនផលិតកម្ម និងធ្វើឱ្យវាកាន់តែមានលក្ខណៈពាណិជ្ជកម្មសម្រាប់ការនាំចេញទៅទីផ្សារអន្តរជាតិ។
រដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្តិ ធ្លាប់បានថ្លែងថា ដំណាំដំឡូងមី គឺជាដំណាំកសិឧស្សាហកម្ម និងជាផលិតផលនាំចេញដ៏សំខាន់របស់កម្ពុជាដែលបានរួមចំណែកពី ៣-៤ ភាគរយនៃ GDP ក្នុង ១ ឆ្នាំៗ។
ក្នុងឆ្នាំ២០២១ ការនាំចេញចំណិតដំឡូងមីក្រៀមមានចំនួន ១ ៦៤៤ ៥៩១,៦៨តោន ដំឡូងមីស្រស់ ១ ១០៤ ២២០តោន។ នេះបើតាមរបាយការណ៍ក្រសួងកសិកម្ម រុក្ខាប្រមាញ់ និងនេសាទ៕