.jpg)
កសិករត្រងស្រូវចេញពីម៉ាស៊ីនបោក ក្នុងស្រែមួយនៃខេត្តកណ្តាល។ ហេង ជីវ័ន
ភ្នំពេញៈ ក្រសួងពាណិជ្ជកម្មបានឱ្យដឹងថា ការរៀបចំវិញ្ញាបនបត្របញ្ជាក់ដើមកំណើតទំនិញ (Form RCEP) បានរួចរាល់ហើយដើម្បីរង់ចាំវិស័យឯកជនមកដាក់ពាក្យស្នើសុំនាំចេញទំនិញទៅបណ្តាទីផ្សារអាសិប RCEP និងទីផ្សារប្រទេសចិន ខណៈកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (អាសិប-RCEP) និងកិច្ចព្រមព្រៀងពាណិជ្ជកម្មសេរីកម្ពុជា-ចិន (CCFTA) បានចូលជាធរមានកាលពីថ្ងៃទី ១ ខែមករា ឆ្នាំ ២០២២។
អ្នកនាំពាក្យនៃក្រសួងពាណិជ្ជកម្ម លោក ប៉ែន សុវិជាតិ បានប្រាប់ភ្នំពេញ-ប៉ុស្តិ៍នៅថ្ងៃទី ២ ខែមករា ឆ្នាំ ២០២២ ថា ចំពោះអ្នកនាំចេញទំនិញដែលមានបំណងស្នើសុំវិញ្ញាបនបត្របញ្ជាក់ដើមកំណើតទំនិញ (Form RCEP) គឺក្រសួងបានត្រៀមរួចហើយក្នុងការសម្របសម្រួលដល់វិស័យឯកជនទាំងអស់ក្នុងការដាក់ពាក្យតាមប្រព័ន្ធស្វ័យប្រវត្តិកម្ម។
លោកបន្ថែមថា ដោយសារបុណ្យឆ្លងឆ្នាំសកលទើបបញ្ចប់ដូចនេះមិនទាន់មានក្រុមហ៊ុនណាដាក់ស្នើសុំទេ ដោយក្រសួងរំពឹងថា វិស័យឯកជននឹងយកចិត្តទុកដាក់ខ្លាំងដើម្បីទាញយកអត្ថប្រយោជន៍ពីកិច្ចព្រមព្រៀងទាំង ២ នេះជាអតិបរមា។
លោកបញ្ជាក់ថា៖ «នៅឆ្នាំ ២០២២ នេះ កម្ពុជានឹងអាចនាំចេញកសិផល ក៏ដូចជាទំនិញទៅទីផ្សារចំនួន ១៥ ប្រទេស ដូចនេះអត្រាពន្ធក៏កាន់តែទាប ទន្ទឹមនឹងនេះនៅមានទីផ្សារចិនមួយទៀត ដែលនាំទំនិញកសិកម្ម និងឧស្សាហកម្មទៅបាន ដូច្នេះទាំងទីផ្សារអាសិប (RCEP) និងទីផ្សារចិន គឺជាទីផ្សារដែលធ្វើឱ្យយើងមានលទ្ធភាពជំរុញពាណិជ្ជកម្មបានថែមទៀត នៅអំឡុងពេលកម្ពុជា កំពុងរៀនរស់ក្នុងគន្លងប្រក្រតីភាពថ្មីនៃកូវីដ ១៩»។
ការចូលជាធរមាននៃកិច្ចព្រមព្រៀងពាណិជ្ជកម្មសេរីទាំង ២ (RCEP & CCFTA) ត្រូវបាន លោក លឹម ហេង អនុប្រធានសភាពាណិជ្ជកម្មកម្ពុជា លើកឡើងថា ការមានកិច្ចព្រមព្រៀងសេរីពាណិជ្ជកម្មសេរីកាន់តែច្រើនកាន់តែល្អ។ លោកបន្ថែមថា កិច្ចព្រមព្រៀងទាំងអស់នេះ គឺជាឈ្នាន់មួយក្នុងការជំរុញកំណើនសេដ្ឋកិច្ចកម្ពុជាឱ្យកាន់តែរីកចម្រើន ហើយអ្នកវិនិយោគត្រូវធ្វើយ៉ាងណា ទាញយកផលប្រយោជន៍ពីកិច្ចព្រមព្រៀងទាំងនេះឱ្យបានច្រើនជាអតិបរមា។
លោកបន្តថា៖ «កសិកម្ម គឺជាទំនិញសំខាន់ និងចាំបាច់ដែលយើងទទួលបានភាពអនុគ្រោះក្នុងកិច្ចព្រមព្រៀង RCEP ខណៈដែលកិច្ចព្រមព្រៀងពាណិជ្ជកម្មសេរីកម្ពុជា-ចិន (CCFTA) នឹងផ្តល់ប្រយោជន៍យ៉ាងសម្បើមដល់កម្ពុជា ពិសេសការនាំចេញទំនិញកសិកម្មរបស់កម្ពុជាទៅប្រទេសដែលជាទីផ្សារដ៏ធំបំផុតរបស់ពិភពលោក»។
លោក គី សេរីវឌ្ឍ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជាបាននិយាយថា កិច្ចព្រមព្រៀង RCEP នេះនឹងអនុញ្ញាតឱ្យកម្ពុជានាំចេញបានគ្រប់មុខទំនិញទៅសមាជិកអាស៊ានទាំង ១០ ប្រទេសដៃគូពាណិជ្ជកម្មសេរីអាស៊ានចំនួន ៥ (ចិន អូស្ត្រាលី ជប៉ុន កូរ៉េខាងត្បូង និងនូវែលសេឡង់) ខណៈកិច្ចព្រមព្រៀងពាណិជ្ជកម្មសេរីកម្ពុជា-ចិន ក៏នឹងបើកចំហទីផ្សារសម្រាប់កម្ពុជាដែរ ក្រោយកិច្ចព្រមព្រៀងនេះចូលជាធរមាន។
លោកបញ្ជាក់ថា៖ «នៅមានប្រឈមខ្លះៗ ព្រោះកិច្ចព្រមព្រៀងនេះគឺអនុគ្រោះដល់យើងត្រឹមតែរបាំងពន្ធគយប៉ុណ្ណោះ ប៉ុន្តែបញ្ហាអនាម័យ និងភូតគាមអនាម័យ គឺកម្ពុជាត្រូវតែអនុវត្តឱ្យបានល្អបំផុតទៅតាមការចង់បានរបស់ប្រទេសទាំងនោះ»។
កិច្ចព្រមព្រៀង RCEP គឺជាគំនិតផ្តួចផ្តើមរបស់អាស៊ាន និងបានចាប់ផ្តើមការចរចាតាំងពីឆ្នាំ ២០១២ ដែលកិច្ចព្រមព្រៀងនេះនឹងធ្វើឱ្យកម្ពុជាមានកំណើនប្រចាំឆ្នាំសម្រាប់ការនាំចេញចំនួន ៧,៣ ភាគរយ វិនិយោគ ២៣,៤ ភាគរយ និងផលិតផលក្នុងស្រុកសរុបប្រមាណ ២ ភាគរយ លើផលិតផលក្នុងស្រុកសរុបដែលមាននាពេលបច្ចុប្បន្ន។
តាមរយៈកិច្ចព្រមព្រៀងពាណិជ្ជកម្មសេរីកម្ពុជា-ចិន (CCFTA) កម្ពុជារំពឹងថា ប្រភេទទំនិញរបស់ខ្លួនជាង ៣៤០ មុខនឹងអាចត្រូវនាំចេញទៅទីផ្សារចិន រួមមាន ម្រេច ម្ទេសក្រៀម ផលិតផលកែច្នៃពីស្វាយចន្ទី ខ្ទឹម ទឹកឃ្មុំ បន្លែ ត្រី សាច់សត្វ (ជ្រូក មាន់ ទា ពពែ និងគោ) និងផលិតផលគ្រឿងសមុទ្រ រួមមាន គ្រំ ក្តាម និងខ្យង ជាដើម។ កម្ពុជាទទួលបានទីផ្សារចិនសម្រាប់ទំនិញរបស់ខ្លួនប្រមាណ ៩៨ ភាគរយនៃមុខទំនិញសរុប ខណៈកម្ពុជាបានបើកទីផ្សារឱ្យភាគីចិន ៩០ ភាគរយនៃបន្ទាត់ពន្ធគយសរុប៕ LA
