ភ្នំពេញៈ អ្នកសេដ្ឋកិច្ច លើកឡើងថា ពាណិជ្ជកម្មរវាងកម្ពុជា និងប្រទេសកាណាដា នឹងមានទំហំកាន់តែធំថែមទៀតប្រសិនបើកិច្ចព្រមព្រៀងពាណិជ្ជកម្មសេរីអាស៊ាន-កាណាដា អាចសម្រេចបានជាផ្លូវការ ខណៈរយៈពេល ១០ ខែ ឆ្នាំ ២០២១ ការដោះដូរទំនិញរវាងប្រទេសទាំង ២ មានតម្លៃ ៨២២ លានដុល្លារ កើន ២៦ ភាគរយធៀបរយៈពេលដូចគ្នាឆ្នាំ ២០២០។
ទិន្នន័យក្រសួងពាណិជ្ជកម្មកម្ពុជាបានបង្ហាញថា ចាប់ពីខែមករា ដល់ខែតុលា ឆ្នាំ ២០២១ ការនាំចេញទំនិញពីកម្ពុជាទៅកាណាដាមានតម្លៃ ៧៩០ លានដុល្លារ កើនឡើង ៣១ ភាគរយពីចំនួន ៦០៤ លានដុល្លារ និងការនាំទំនិញពីកាណាដា មានតម្លៃ ៣២ លានដុល្លារ ធ្លាក់ចុះ ៣៣ ភាគរយពីចំនួន ៤៨ លានដុល្លារ បើធៀបនឹងរយៈពេលដូចគ្នាកាលពីឆ្នាំ ២០២០។
លោក លឹម ហេង អនុប្រធានសភាពាណិជ្ជកម្មកម្ពុជាបានឱ្យភ្នំពេញប៉ុស្តិ៍ដឹងថា បើសិនអាស៊ាន សម្រេចបានកិច្ចព្រមព្រៀងពាណិជ្ជកម្មសេរីជាមួយកាណាដា ដូចសម្រេចបានជាមួយ RCEP នោះគឺពិតជាល្អណាស់ ហើយប្រទេសកម្ពុជាក៏នឹងទទួលបានប្រយោជន៍ពីកិច្ចព្រមព្រៀងនេះច្រើនដែរ ព្រោះកិច្ចព្រមព្រៀងពាណិជ្ជកម្មសេរីកាន់តែច្រើនទោះក្នុងលក្ខណៈទ្វេភាគី ឬតំបន់ គឺសុទ្ធតែផ្តល់ឱកាសឱ្យកម្ពុជាទទួលបានភាពអនុគ្រោះក្នុងការនាំចេញទំនិញដែលកម្ពុជាផលិតបាន។
លោកបន្ថែមថា៖ «សម្រាប់ទីផ្សារប្រទេសកាណាដា កន្លងមកកម្ពុជាបាននាំចេញច្រើននូវមុខទំនិញសំខាន់ៗមួយចំនួនដូចជា ផលិតផលវាយនភណ្ឌកាត់ដេរសម្លៀកបំពាក់ សម្ភារធ្វើដំណើរ និងកង់ជាដើម ដូច្នេះនេះបើកម្ពុជា ដែលជាសមាជិកអាស៊ានទទួលបានភាពអនុគ្រោះលើមុខទំនិញទាំងនេះ (កិច្ចព្រមព្រៀងពាណិជ្ជកម្មសេរីអាស៊ាន-កាណាដា) វានឹងអាចទាក់ទាញវិនិយោគិនផ្សេងដែលផលិតទំនិញនាំទៅប្រទេសកាណាដា ឱ្យងាកមកចាប់អារម្មណ៍លើការវិនិយោគនៅក្នុងប្រទេសកម្ពុជាវិញ»។
លោកបន្តថា សភាពាណិជ្ជកម្មកម្ពុជាក៏គ្រោងបើកការិយាល័យតំណាងដំបូងគេនៅក្នុងប្រទេសកាណាដា បន្ទាប់មកសហគមន៍អឺរ៉ុប អាមេរិក ចិន ជប៉ុនផងដែរ ប៉ុន្តែត្រូវបានអូសបន្លាយមកដល់ពេលនេះ ដោយសារតែជំងឺកូវីដ ១៩។
បែបនេះក្តី លោកអះអាងថា បច្ចុប្បន្នសភាពាណិជ្ជកម្មកម្ពុជាកំពុងសហការជាមួយក្រសួងពាណិជ្ជកម្ម រៀបចំនីតិវិធីក្នុងការបើកការិយាល័យតំណាងនេះ ដើម្បីធ្វើយ៉ាងណាសម្រួលដល់ការទំនាក់ទំនងផ្នែកធុរកិច្ច ពាណិជ្ជកម្មរវាងប្រទេសអភិវឌ្ឍន៍ទាំងនោះឱ្យបានឆាប់។
លោក ហុង វណ្ណៈ អ្នកស្រាវជ្រាវសេដ្ឋកិច្ចអន្តរជាតិនៃវិទ្យាស្ថានទំនាក់ទំនងអន្តរជាតិនៃកម្ពុជាបានប្រាប់ភ្នំពេញប៉ុស្តិ៍ថា កាណាដា ជាប្រទេសជឿនលឿន និងមានសេដ្ឋកិច្ចរីកចម្រើន ដែលតែងតែទិញទំនិញច្រើនពីកម្ពុជា ដោយទំនិញទាំងនោះភាគច្រើនជាផលិតផលវាយនភណ្ឌ សម្ភារធ្វើដំណើរ និងកាបូប។ កម្ពុជាតែងតែមានឧត្តមភាពសម្រាប់ពាណិជ្ជកម្មជាមួយប្រទេសកាណាដា។
លោកអះអាងថា៖ «តាមរយៈការធ្វើពិពិធកម្មផលិតកម្មជាបន្តបន្ទាប់ កម្ពុជារំពឹងថា នឹងអាចនាំចេញកាន់តែច្រើនថែមទៀតទៅប្រទេសកាណាដា។ ម្យ៉ាងទៀតតាមរយៈការដាក់ចេញនូវច្បាប់វិនិយោគថ្មី និងច្បាប់ពាណិជ្ជកម្មជាច្រើនទៀត ខ្ញុំគិតថា ទំហំពាណិជ្ជកម្មរវាងប្រទេសទាំង ២ នឹងរឹតតែធំនៅពេលអនាគត»។
លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និងជារដ្ឋមន្ត្រីសេដ្ឋកិច្ចអាស៊ានសម្រាប់កម្ពុជា កាលពីថ្ងៃទី ១៧ ខែវិច្ឆិកា ឆ្នាំ ២០២១ បានដឹកនាំគណៈប្រតិភូកម្ពុជាចូលរួមកិច្ចប្រជុំពិគ្រោះយោបល់រដ្ឋមន្ត្រីសេដ្ឋកិច្ចអាស៊ាន-កាណាដាលើកទី ១០ តាមប្រព័ន្ធវីដេអូ ដែលកិច្ចប្រជុំនោះបានសម្រេចអនុម័តលើឯកសារយោងសម្រាប់ការចរចាបង្កើតកិច្ចព្រមព្រៀងពាណិជ្ជកម្មសេរីអាស៊ាន-កាណាដា និងបានប្រកាសជាផ្លូវការដើម្បីចាប់ផ្តើមការចរចាបង្កើតកិច្ចព្រមព្រៀងពាណិជ្ជកម្មសេរីអាស៊ាន-កាណាដា៕ LA