កោះកុងៈ លោកនាយករដ្ឋមន្ត្រី ហ៊ុន សែន បានណែនាំស្ថាប័នរដ្ឋទាំងថ្នាក់ជាតិ និងថ្នាក់ក្រោមជាតិ ឱ្យបញ្ឈប់ជាបន្ទាន់នូវគម្រោងអភិវឌ្ឍន៍នានារបស់រដ្ឋជាមួយក្រុមហ៊ុន លី ឈួង ខនស្ត្រាក់សិន ដែលជាក្រុមហ៊ុនទទួលម៉ៅការសាងសង់សំណង់ និងហេដ្ឋារចនាសម្ព័ន្ធផ្សេងៗដោយមានការសាងសង់ហើយ ទើបទូទាត់ប្រាក់ជាក្រោយ។
ក្នុងពិធីបើកការដ្ឋានសាងសង់ និងលើកកម្រិតគុណភាពផ្លូវជាតិលេខ ៤៨ កាលពីថ្ងៃទី ៣ ខែមករា លោក ហ៊ុន សែន បានលើកឡើងថា ការធ្វើបែបនេះគឺជាទង្វើពុករលួយ ដោយលោកបញ្ជាឱ្យខេត្តណាដែលជំពាក់បំណុលក្រុមហ៊ុន លី ឈួង គឺត្រូវទូទាត់សងប្រាក់ក្នុងរយៈពេល ២០ ឆ្នាំ ខណៈរាជរដ្ឋាភិបាលមិនចេញជំនួសនោះទេ។
ជាមួយគ្នានេះ លោកក៏បានព្រមានដល់អភិបាលខេត្តនានាដែលបានចុះកិច្ចសន្យាសាងសង់គម្រោងអភិវឌ្ឍន៍នៅក្នុងមូលដ្ឋានខេត្តរួចហើយជាមួយក្រុមហ៊ុន លី ឈួង និងក្រុមហ៊ុនផ្សេងៗទៀតត្រូវលុបចេញ និងបានឱ្យក្រុមហ៊ុន លី ឈួង បញ្ឈប់ជាបន្ទាន់នូវសកម្មភាពសាងសង់មុនទូទាត់ប្រាក់តាមក្រោយ បើមិនដូច្នេះនឹងដាក់ក្រុមហ៊ុននេះក្នុងបញ្ជីខ្មៅ។ មួយវិញទៀត បើអភិបាលខេត្តរូបណាហ៊ានធ្វើបន្តទៀត អភិបាលខេត្តនោះនឹងត្រូវទទួលខុសត្រូវចំពោះមុខរាជរដ្ឋាភិបាល។
លោកមានប្រសាសន៍ថា៖ «ខ្ញុំមានការភ្ញាក់ផ្អើលយ៉ាងខ្លាំងនៅពេលរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ធ្វើរបាយការណ៍អំពីបំណុលដែលបណ្តាខេត្តជំពាក់ក្រុមហ៊ុន លី ឈួង។ ខ្ញុំហួសចិត្តដែរតាមរបៀបអនុវត្តធ្វើមុនទូទាត់តាមក្រោយ។ ឥឡូវខ្ញុំសូមជម្រាបថា ចៅហ្វាយខេត្តណាហ៊ានធ្វើបន្តទៀត ចៅហ្វាយខេត្តនោះត្រូវទទួលខុសត្រូវចំពោះមុខរាជរដ្ឋាភិបាល»។
លោកបញ្ជាក់ថា៖ «ខ្ញុំសុំផ្តាំ និងបទបញ្ជាដាច់ណាត់ គម្រោងទាំងឡាយដែលមិនទាន់បានអនុវត្ត គឺដកចេញភ្លាម ដកកុងត្រាហ្នឹងគ្រវាត់ចោលភ្លាម ព្រោះកុងត្រាហ្នឹងអត់មានអ្នកទទួលស្គាល់ អភិបាលខេត្ត ឬក៏អ្នកណាក៏ដោយ ក៏ត្រូវលុបចោល»។
បើតាមលោកនាយករដ្ឋមន្ត្រី បើសិនករណីខាងលើបន្តកើតមាននៅថ្នាក់ជាតិ និងថ្នាក់ក្រោមជាតិ វានឹងធ្វើឱ្យក្រុមហ៊ុនផ្សេងទៀតយកគំរូតាម និងក្លាយទៅជាជំងឺមហារីក ដែលនឹងធ្វើឱ្យរដ្ឋមានបំណុលសាធារណៈកាន់តែច្រើន ខណៈនៅឆ្នាំថ្មីនេះរដ្ឋាភិបាលកំពុងតែជំរុញការធ្វើកំណែទម្រង់ស៊ីជម្រៅលើការគ្រប់គ្រងហិរញ្ញវត្ថុឱ្យកាន់តែមានភាពល្អប្រសើរ។
ទោះបីយ៉ាងណា លោកបានណែនាំឱ្យអភិបាលរាជធានី-ខេត្តទាំងអស់ មុននឹងអភិវឌ្ឍគម្រោងណាមួយក្នុងខេត្ត គឺត្រូវតែដាក់ដេញថ្លៃឱ្យបានត្រឹមត្រូវ និងទទួលការយល់ព្រមពីរដ្ឋាភិបាលជាមុន បើសិនគម្រោងនោះត្រូវការចំណាយថវិការដ្ឋ។
ភ្នំពេញប៉ុស្តិ៍មិនអាចទាក់ទងក្រុមហ៊ុន លី ឈួង បានទេកាលពីថ្ងៃទី ៣ ខែមករា ឆ្នាំ ២០២២ ដោយហៅទូរស័ព្ទចូល ប៉ុន្តែមិនមានអ្នកលើក។
លោក ប៉ិច ពិសី នាយកប្រតិបត្តិនៃអង្គការតម្លាភាពកម្ពុជាបានប្រាប់ភ្នំពេញប៉ុស្តិ៍ថា ការលើកឡើងរបស់លោកនាយករដ្ឋមន្ត្រីបង្ហាញថា ការធ្វើកិច្ចការរបស់ថ្នាក់ក្រោមជាតិមិនទាន់មានប្រសិទ្ធភាពទេ។ នៅពេលមានក្រុមហ៊ុនធ្វើសកម្មភាពបែបនេះ គឺមិនត្រឹមតែព្រមានអ្នកពាក់ព័ន្ធទេ ត្រូវតែដាក់ក្រុមហ៊ុន លី ឈួង នេះបញ្ចូលទៅក្នុងបញ្ជីខ្មៅកុំឱ្យក្រុមហ៊ុននេះមានសិទ្ធិបន្តធ្វើកិច្ចការជាមួយនឹងស្ថាប័នសាធារណៈបន្តទៀត។
លោកបន្តថា បើសិនរដ្ឋាភិបាលមិនធ្វើសកម្មភាពរកការពិតចំពោះមន្ត្រីថ្នាក់ក្រោមជាតិដែលពាក់ព័ន្ធនឹងការអនុញ្ញាតឱ្យក្រុមហ៊ុនអភិវឌ្ឍមុន ទូទាត់ប្រាក់ជាក្រោយ វានឹងមិនអាចដោះស្រាយចេញទេ។ តាមប្រសាសន៍របស់លោកនាយករដ្ឋមន្ត្រី គឺគ្រាន់តែដោះស្រាយបានមួយភ្លែតប៉ុណ្ណោះ ដោយមិនអាចដោះស្រាយបញ្ហាស្នូលដែលកើតឡើងនោះទេ។
លោកបានថ្លែងថា៖ «ចំណាត់ការរបស់សម្តេចមិនខុសទេ ប៉ុន្តែខ្ញុំគិតថានៅតែមិនអាចឈានទៅរកការដោះជាប្រព័ន្ធបាន។ ជាអនុសាសន៍ គឺថាយើងសុំឱ្យមានការសិក្សា ស៊ើបអង្កេតរកឫសគល់ឱ្យឃើញ ចាំយើងចាត់វិធានការឱ្យបានជាក់លាក់ ត្រូវលើបញ្ហាដែលកើតឡើងនោះ។ ខ្ញុំគិតថាមានប្រសិទ្ធភាពជាង»៕ LA
វីដេអូ៖