.jpg)
ធនាគារជាតិនៃកម្ពុជា។ ហ៊ាន រង្សី
ភ្នំពេញៈ ធនាគារកណ្តាលរបស់កម្ពុជាបានព្យាករថា កំណើនសេដ្ឋកិច្ចកម្ពុជានឹងមានចំនួន ៥ ភាគរយនៅឆ្នាំនេះ ដោយសារការស្ទុះងើបឡើងវិញនៃសេដ្ឋកិច្ចពិភពលោក បើទោះបីជាការរីករាលដាលវីរុសបំប្លែងថ្មីនៃជំងឺកូវីដ ១៩ ក៏ដោយ។
យោងតាមវឌ្ឍនភាពនៃម៉ាក្រូសេដ្ឋកិច្ច និងវិស័យធនាគារឆ្នាំ ២០២១ និងចក្ខុវិស័យឆ្នាំ ២០២២ របស់ធនាគារជាតិនៃកម្ពុជា នៅឆ្នាំ ២០២២ ខាងមុខសេដ្ឋកិច្ចពិភពលោករំពឹងថា នឹងបន្តងើបឡើង ក្នុងល្បឿនខុសគ្នា អាស្រ័យលើប្រសិទ្ធភាពនៃការការពារការរាតត្បាតជំងឺកូវីដ-១៩ និងវិធានការគាំទ្ររបស់រាជរដ្ឋាភិបាល។ ទន្ទឹមនឹងនេះ មេរោគកូវីដបំប្លែងប្រភេទថ្មី អូមីក្រុង ក៏បន្តជាបញ្ហាប្រឈមចម្បងជាមួយនឹងហានិភ័យដែលមានស្រាប់ ដូចជាភាពតានតឹងភូមិសាស្ដ្រនយោបាយ និងពាណិជ្ជកម្ម និងការប្រែប្រួលអាកាសធាតុ។
ការបន្តងើបឡើងនៃសេដ្ឋកិច្ចពិភពលោកនឹងគាំទ្រដល់ការនាំចេញរបស់កម្ពុជា ដូចជាផលិតផលកាត់ដេរ និងផលិតផលកម្មន្តសាលមិនមែនកាត់ដេរ ជាពិសេសការនាំចេញផលិតផលគ្រឿងបង្គុំអគ្គិសនី និងកង់ ដែលនឹងលើកកម្ពស់ពិពិធកម្មការនាំចេញរបស់កម្ពុជា។ នេះបើយោងតាម NBC។
NBC បានបញ្ជាក់ថា ការចូលជាធរមាននៃកិច្ចព្រមព្រៀងពាណិជ្ជកម្មសេរីកម្ពុជា ចិន និងកម្ពុជាកូរ៉េខាងត្បូង ព្រមទាំងកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) នឹងបន្តបង្កើនសក្ដានុពលនៃវិស័យកសិកម្ម ពាណិជ្ជកម្ម សេវាកម្ម និងទំនិញ លំហូរវិនិយោគ និងពាណិជ្ជកម្មអេឡិចត្រូនិក។
NBC បានឱ្យដឹងថា៖ «ផ្អែកលើទស្សនវិស័យខាងលើ សេដ្ឋកិច្ចកម្ពុជាត្រូវបានរំពឹងដោយសុទិដ្ឋិនិយមថា បន្តងើបឡើងបន្ថែមទៀត ក្នុងអត្រាប្រមាណ ៥ ភាគរយនៅឆ្នាំ ២០២២»។
NBC បន្តថា អតិផរណារួមសម្រាប់ឆ្នាំ ២០២២ ត្រូវបានព្យាករថា នឹងមានអត្រា ២,៦ ភាគរយ ដោយសារកំណើនទាបនៃក្រុមម្ហូបអាហារដែលជំរុញដោយភាពប្រសើរឡើងនៃការផ្គត់ផ្គង់ និងការថមថយកំណើនថ្លៃទិញ និងសេវាពាក់ព័ន្ធនឹងប្រេងឥន្ធនៈ ហើយអត្រាប្តូរប្រាក់ផ្លូវការបន្តមានស្ថិរភាពក្នុងរង្វង់ ៤ ០៧៥ រៀលក្នុង ១ ដុល្លារអាមេរិក។
កាលពីខែធ្នូឆ្នាំមុន ធនាគារពិភពលោកបានព្យាករថាសេដ្ឋកិច្ចរបស់កម្ពុជាត្រូវបានរំពឹងថានឹងបន្តងើបឡើងវិញ ចំពេលមានការរឹតបន្តឹងទាក់ទងនឹងកូវីដ ១៩។ កំណើនផលិតផលក្នុងស្រុកសរុប (GDP) ដុលត្រូវបានព្យាករថានឹងកើនឡើងដល់ ៤,៥ ភាគរយនៅឆ្នាំ ២០២២។
ធនាគារពិភពលោកបន្តថា៖ «ក្នុងរយៈពេលមធ្យម កំណើនត្រូវបានរំពឹងថានឹងមាននិន្នាការត្រឡប់ទៅរកសក្តានុពលវិញ។ ខណៈដែលអាជ្ញាធរ នៅពេលនេះបានបន្ធូរបន្ថយវិធានការរឹតបន្តឹងការធ្វើដំណើរការបើកប្រទេសឡើងវិញ វិស័យសំខាន់ៗដូចជាទេសចរណ៍ ការធ្វើដំណើរ បដិសណ្ឋារកិច្ច និងពាណិជ្ជកម្មដុំរាយកំពុងចាប់ផ្តើមស្ទុះងើបឡើងវិញ ដែលជំរុញឱ្យមានការស្ទុះងើបឡើងវិញនៃសេដ្ឋកិច្ចក្នុងរយៈពេលមធ្យម»។
ធនាគារពិភពលោក បានបន្ថែមថា ពីលើផែនការស្តារសេដ្ឋកិច្ចឡើងវិញ ដែលនឹងត្រូវដាក់ឱ្យប្រើប្រាស់ក្នុងពេលឆាប់ៗនេះ ច្បាប់ស្តីពីការវិនិយោគដែលទើបដាក់ឱ្យប្រើប្រាស់ កិច្ចព្រមព្រៀងពាណិជ្ជកម្មសេរីកម្ពុជា-ចិន និងកិច្ចព្រមព្រៀងភាព ជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ និងកិច្ចព្រមព្រៀងពាណិជ្ជកម្មសេរីកម្ពុជា-កូរ៉េ ដែលបានចុះហត្ថលេខានាពេលថ្មីៗនេះ អាចជួយទាក់ទាញលំហូរវិនិយោគផ្ទាល់បរទេស មកក្នុងប្រទេសកម្ពុជា ក្នុងរយៈពេលជាច្រើនឆ្នាំខាងមុខបន្ថែមពីលើផែនការស្តារសេដ្ឋកិច្ចដែលនឹងត្រូវដាក់ឱ្យប្រើប្រាស់ក្នុងពេលឆាប់ៗនេះ ច្បាប់ស្តីពីការវិនិយោគដែលទើបដាក់ឱ្យប្រើប្រាស់ កិច្ចព្រមព្រៀងពាណិជ្ជកម្មសេរីកម្ពុជា-ចិន និងភាពជាដៃគូសេដ្ឋកិច្ចទូលំទូលាយក្នុងតំបន់ និងកិច្ចព្រមព្រៀងពាណិជ្ជកម្មសេរីកម្ពុជា-សាធារណរដ្ឋកូរ៉េដែលបានចុះហត្ថលេខានាពេលថ្មីៗនេះ អាចជួយទាក់ទាញបរទេសដោយផ្ទាល់។ លំហូរវិនិយោគចូលប្រទេសក្នុងរយៈពេលប៉ុន្មានឆ្នាំខាងមុខនេះ។
ធនាគារនេះ បានឱ្យដឹងថា ទោះបីជាមានការពន្លឿនដំណើរការចាក់វ៉ាក់សាំងក៏ដោយ ក៏ហានិភ័យនៃការរំខានបន្ថែមទៀតនៅតែមានកម្រិតខ្ពស់ ដោយសារចំនួននៃការឆ្លង និងអត្រាស្លាប់មានកម្រិតខ្ពស់។
ធនាគារពិភពលោកក៏បានកត់សម្គាល់ផងដែរថា កំណើនឥណទានខ្ពស់ និងការកើនឡើងតម្រូវការឥណទានក្នុងស្រុកក្នុងវិស័យសំណង់ និងអចលនទ្រព្យនៅតែជាកត្តានាំទៅដល់ហានិភ័យដ៏សំខាន់មួយ ចំពោះស្ថិរភាពហិរញ្ញវត្ថុរបស់កម្ពុជា។
យោងតាម NBC ការងើបឡើងនៃសកម្មភាពសេដ្ឋកិច្ចក្នុងស្រុក គួបផ្សំនឹងភាពអំណោយផល កំណើនសេដ្ឋកិច្ចពិភពលោកបានធ្វើឱ្យកំណើនសេដ្ឋកិច្ចកម្ពុជាក្នុងឆ្នាំ ២០២១ ត្រូវបានប៉ាន់ស្មានថា បានកើនឡើងក្នុងរង្វង់ ៣ ភាគរយ ខណៈដែលអត្រាអតិផរណាមាននៅរក្សាបានស្ថានភាពល្អចំនួន ២,៩ ភាគរយ៕LA
