ភ្នំពេញៈ កម្ពុជាបានត្រៀមរួចរាល់នៅក្នុងការរៀបចំវេទិកាទេសចរណ៍អាស៊ានលើកទី ៤០ ឆ្នាំ ២០២២ (ATF 2022) ដែលខ្លួនត្រូវធ្វើជាម្ចាស់ផ្ទះនាអំឡុងពាក់កណ្តាលខែមករា ដែលមកទល់ពេលនេះការរៀបចំដំណើរការគឺសម្រេចបានប្រមាណ ៩០ ភាគរយហើយ។
វិស័យឯកជនរំពឹងថា វេទិកានេះនឹងក្លាយជាកាលានុវត្តភាពមួយសម្រាប់កម្ពុជាក្នុងការផ្សព្វផ្សាយអំពីសក្តានុពលវិស័យទេសចរណ៍ទៅវិនិយោគិន និងភ្ញៀវទេសចរអន្តរជាតិឱ្យចូលមកកម្សាន្តកម្ពុជាកាន់តែច្រើនឡើងវិញ បន្ទាប់ពីស្ងប់ស្ងាត់ជិត ២ ឆ្នាំដោយសារជំងឺកូវីដ ១៩។
កម្ពុជាត្រូវធ្វើជាម្ចាស់ផ្ទះរៀបចំវេទិកាទេសចរណ៍អាស៊ានលើកទី ៤០ ដែលនឹងត្រូវរៀបចំចាប់ពីថ្ងៃទី ១៦-២២ ខែមករា ឆ្នាំ ២០២២ នៅក្រុងព្រះសីហនុ ខេត្តព្រះសីហនុ។ តាមផែនការក្រៅពីមានការអញ្ជើញចូលរួមប្រជុំពីសំណាក់រដ្ឋមន្ត្រីទេសចរណ៍អាស៊ាន និងមន្ត្រីជាន់ខ្ពស់របស់ប្រទេសសមាជិកអាស៊ានទាំង ១០ វេទិកានេះក៏នឹងមានការរៀបចំតាំងពិព័រណ៍ទេសចរណ៍ (TRAVEX) ដែលមានស្តង់ប្រហែល ១៨៧។ វេទិកាទេសចរណ៍អាស៊ានលើកទី ៣៩ ត្រូវបានធ្វើកាលពីឆ្នាំ ២០២០ នៅប្រទេសប្រ៊ុយណេ។
ក្នុងកិច្ចប្រជុំ និងពិនិត្យទីតាំងជាក់ស្តែង សម្រាប់រៀបចំវេទិកាទេសចរណ៍អាស៊ានលើកទី ៤០ ឆ្នាំ ២០២២ នៅខេត្តព្រះសីហនុ កាលពីថ្ងៃទី ២ ខែមករា លោក ថោង ខុន រដ្ឋមន្ត្រីក្រសួងទេសចរណ៍ លើកឡើងថា ដោយមានការគាំទ្រយ៉ាងមុតមាំពីប្រទេសសមាជិកអាស៊ានទាំងអស់ អាស៊ានបូក និងផ្នែកឯកជន បច្ចុ-ប្បន្នចំនួននៃការចុះឈ្មោះ និងការបញ្ជាក់ពីការចូលរួមក្នុងវេទិកា ATF បានកើនលើសពីការរំពឹងទុក ទោះបីស្ថានភាពជំងឺកូវីដ ១៩ មិនទាន់ផុតរលត់ក៏ដោយ។ ជាមួយគ្នានេះលោកក៏បានណែនាំឱ្យក្រុមការងារជំនាញពាក់ព័ន្ធត្រូវសហការជាមួយអាជ្ញាធរពាក់ព័ន្ធនៃខេត្ត ដើម្បីធានាឱ្យបាននូវការរៀបចំកិច្ចប្រជុំ និងសកម្មភាពនានានៃព្រឹត្តការណ៍អន្តរជាតិនេះប្រកបដោយសុវត្ថិភាពស្របតាមនីតិវិធីស្តង់ដា (SOP) របស់ក្រសួងសុខាភិបាល និងនីតិវិធីស្តង់ដាតាមគោលដៅទេសចរណ៍ (SOP) របស់រដ្ឋបាលខេត្តព្រះសីហនុ។
លោកថ្លែងថា៖ «វេទិកានេះមានសារៈសំខាន់ណាស់ក្នុងការជួយបង្កើនភាពទាក់ទាញវិស័យទេសចណ៍សម្រាប់តំបន់អាស៊ាន ពិសេសបម្រាប់កម្ពុជាដែលជាម្ចាស់ផ្ទះ»។ លោកបន្តទៀតថា៖ «រដ្ឋមន្ត្រីទេសចរណ៍អាស៊ានក៏នឹងយកឱកាសនេះប្រកាសបើកទេសចរណ៍ក្នុងតំបន់របស់ខ្លួនឡើងវិញចេញពីប្រទេសកម្ពុជាផងដែរ»។
លោក គួច ចំរើន អភិបាលខេត្តព្រះសីហនុ បាននិយាយថា រដ្ឋបាលខេត្តបានត្រៀមខ្លួនរួចជាស្រេចសម្រាប់ការទទួលបដិសណ្ឋារកិច្ចគណៈប្រតិភូ និងបានណែនាំដល់កម្លាំងសមត្ថកិច្ចពាក់ព័ន្ធឱ្យរៀបចំកម្លាំងតាមគោលដៅ សំដៅធានាឱ្យបាននូវសុខសុវត្ថិភាព។ លោកថ្លែងថា៖ «លើសពីនេះ រដ្ឋបាលខេត្តព្រះសីហនុនឹងជួយគាំទ្រជ្រោមជ្រែងដល់ការរៀបចំព្រឹត្តិការណ៍នេះ ប្រកបដោយការទទួលខុសត្រូវ»។
លោក គួច ចំរើន ក៏បានលើកឡើងពីការជំរុញការចាក់វ៉ាក់សាំងប្រឆាំងនឹងជំងឺកូវីដ ១៩ ដូសទី ៣ ឱ្យក្រុមការងារ និងបុគ្គលិកដែលចូលរួមរៀបចំការងារក្នុងព្រឹត្តិការណ៍ ATF ឱ្យបានររួចរាល់ផងដែរ។
ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា លោក ធួន ស៊ីណាន បានប្រាប់ភ្នំពេញ-ប៉ុស្តិ៍កាលពីថ្ងៃទី ៤ ខែមករា ថា វេទិកាទេសចរណ៍អាស៊ាន គឺជាព្រឹត្តិការណ៍ទេសចរណ៍ធំជាងគេរបស់តំបន់ដែលត្រូវបានរៀបចំឡើងជារៀងរាល់ឆ្នាំ (លើកលែងឆ្នាំ ២០២១ ដោយសារការរីករាលដាលជំងឺកូវីដ-១៩) និងមានការចូលរួមពីសំណាក់ថ្នាក់រដ្ឋមន្ត្រីប្រទេសសមាជិកអាស៊ាន។ កម្ពុជា ជាប្រទេសទី ១ ដែលបានរៀបចំព្រឹត្តិការណ៍នេះបន្ទាប់ពីការផ្ទុះឡើងនៃជំងឺកូវីដ ១៩ ខណៈដំណើរការចាក់វ៉ាក់សាំងប្រឆាំងជំងឺកូវីដ ១៩ បានគ្របដណ្តប់លើប្រជាជនបានជិត ៩០ ភាគរយរួចហើយ។
លោកនិយាយថា៖ «វេទិកានេះនឹងនាំមកនូវផលប្រយោជន៍ និងឱកាសទាក់ទាញភ្ញៀវទេសចរឱ្យធ្វើដំណើរមកកម្ពុជា ក៏ដូចជាតំបន់អាស៊ានទាំងមូលបានកាន់តែច្រើន។ នេះក៏អាចជាការប្រកាស និងផ្សព្វផ្សាយពីការបើកប្រវត្តិសាស្ត្រក្នុងការទទួលទេសចរឡើងវិញ បន្ទាប់ពីបិទជិត ២ ឆ្នាំ ដោយសារវិបត្តិជំងឺកូវីដ ១៩»៕ LA