ភ្នំពេញៈ កិច្ចព្រមព្រៀងពាណិជ្ជកម្មសេរីកម្ពុជា និងកូរ៉េ (CKFTA) នឹងត្រូវចូលជាធរមាននៅក្នុងរយៈពេល ៦០ ថ្ងៃ ក្រោយការជូនដំណឹងរវាងក្រសួងពាណិជ្ជកម្មកម្ពុជាជាមួយនឹងភាគីកូរ៉េ ក្នុងការបំពេញបែបបទផ្ទៃក្នុងចប់សព្វគ្រប់។ នេះបើយោងតាមអ្នកនាំពាក្យក្រសួងពាណិជ្ជកម្ម។
រដ្ឋមន្ត្រីក្រសួងពាណិជ្ជកម្ម ឯកអគ្គរដ្ឋទូតសាធារណរដ្ឋកូរ៉េប្រចាំនៅកម្ពុជា និងអ្នកសេដ្ឋកិច្ច បានអះអាងថា ការធ្វើពាណិជ្ជកម្មរវាងកម្ពុជា និងប្រទេសកូរ៉េ នឹងបន្តកើនឡើងក្រោយកិច្ចព្រមព្រៀងពាណិជ្ជកម្មសេរីកម្ពុជា និងកូរ៉េ (CKFTA) បានសម្រេចជាស្ថាពរក្នុងពេលឆាប់ៗ ខណៈក្នុងរយៈពេល ១០ ខែ ឆ្នាំ ២០២១ ទំហំពាណិជ្ជកម្មរវាងប្រទេសទាំង ២ សម្រេចបាន ៦៣៨ លានដុល្លារ កើន ១០ ភាគរយបើធៀបនឹងរយៈពេលដូចគ្នាឆ្នាំ ២០២០ ដែលមានចំនួន ៥៧៨ លានដុល្លារ។
ក្នុងពិធីបើកការដ្ឋានសាងសង់ និងលើកកម្រិតគុណភាពផ្លូវជាតិលេខ ៤៨ នៅខេត្តកោះកុង ដែលជាឥណទានសម្បទាន របស់រដ្ឋាភិបាលកូរ៉េ លោក Park Heung-Kyeong ឯកអគ្គរដ្ឋទូតសាធារណរដ្ឋកូរ៉េប្រចាំកម្ពុជាបានលើកឡើងថា ទំនាក់ទំនងរវាងកូរ៉េ និងកម្ពុជាបានរីកចម្រើនគួរឱ្យកត់សម្គាល់ បន្ទាប់ពីបានកសាងទំនាក់ទំនងការទូតឡើងវិញក្នុងឆ្នាំ ១៩៩៧ ដោយទំហំពាណិជ្ជកម្មរវាងប្រទេសទាំង ២ សម្រេចបានរហូតដល់ ១,០៣ ពាន់លានដុល្លារ ក្នុងឆ្នាំ ២០១៩ កើន ១៩ ដងធៀបនឹងឆ្នាំ ១៩៩៧ ដែលមានត្រឹមតែ ៥៤ លានដុល្លារប៉ុណ្ណោះ។
លោកបន្តថា៖ «ទឹកប្រាក់វិនិយោគរបស់កូរ៉េនៅកម្ពុជាចាប់ពីឆ្នាំ ២០០៤ ដល់ឆ្នាំ ២០១៩ មាន ៤,៤ ពាន់លានដុល្លារ ជាប់ចំណាត់ថ្នាក់ទី ២ បន្ទាប់ពីចិន ហើយកាលពីខែតុលា ឆ្នាំ ២០២១ កូរ៉េ និងកម្ពុជា បានចុះកិច្ចព្រមព្រៀងពាណិជ្ជកម្មសេរីកម្ពុជា-កូរ៉េ ជាស្ថាពរ ដោយរំពឹងថា ការធ្វើពាណិជ្ជកម្មរវាងប្រទេសទាំង ២ នឹងកើនឡើងជាបន្តបន្ទាប់នៅថ្ងៃខាងមុខ»។
លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម នៅក្នុងកិច្ចប្រជុំការពារសេចក្តីព្រាងច្បាប់ចំនួន ៣ ជាមួយនឹងគណៈកម្មការទី ៩ នៃព្រឹទ្ធសភា កាលពីថ្ងៃទី ៣០ ខែធ្នូ ឆ្នាំ ២០២១ បាននិយាយថា សេចក្តីព្រាងច្បាប់ស្តីពីការអនុម័តយល់ព្រមលើកិច្ចព្រមព្រៀងពាណិជ្ជកម្មសេរីកម្ពុជា និងកូរ៉េ នឹងក្លាយជាកម្លាំងចលករដ៏សំខាន់ក្នុងការជំរុញរំហូរពាណិជ្ជកម្ម និងការវិនិយោគរវាងភាគីទាំង ២ ដែលនឹងផ្តល់ប្រយោជន៍ឱ្យគ្នាទៅវិញទៅមកផ្នែកសេដ្ឋកិច្ច ការអភិវឌ្ឍ សុខុមាលភាពប្រជាជន និងការផ្សារភ្ជាប់ធុរកិច្ចនៃប្រទេសទាំង ២ ឱ្យកាន់តែប្រសើរឡើងបន្ថែមទៀត។
លោកបញ្ជាក់ថា៖ «ក្រសួងពាណិជ្ជកម្មបានខិតខំប្រឹងប្រែងយ៉ាងខ្លាំងក្នុងការកសាងលិខិតបទដ្ឋានគតិយុត្ត និងច្បាប់នានា សំដៅកែលម្អនូវបរិយាកាសធុរកិច្ច ក៏ដូចជាការធ្វើពិពិធកម្មទីផ្សារ ជំរុញការនាំចេញតាមរយៈការទាញយកប្រយោជន៍ឱ្យអស់លទ្ធភាពពីកិច្ចព្រមព្រៀងពាណិជ្ជកម្មសេរីនានា ដែលកម្ពុជាជាសមាជិក ព្រមទាំងការចរចាទីផ្សារបន្ថែមបង្កើតកិច្ចព្រមព្រៀងពាណិជ្ជកម្មសេរីទ្វេភាគីជាមួយដៃគូពាណិជ្ជកម្មសំខាន់ៗផងដែរ»។
គណៈកម្មការទី ៩ នៃព្រឹទ្ធសភាបានឯកភាព និងគាំទ្រទាំងស្រុងទៅលើទម្រង់ និងខ្លឹមសារនៃសេចក្តីព្រាងច្បាប់ទាំង ៣ ខាងលើ ដោយពុំមានការកែសម្រួលបន្ថែមទេ ដើម្បីដាក់ជូនកិច្ចប្រជុំពេញអង្គព្រឹទ្ធសភា នាពេលខាងមុខដើម្បីពិនិត្យ និងអនុម័ត។
លោក លឹម ហេង អនុប្រធានសភាពាណិជ្ជកម្មកម្ពុជា បាននិយាយថា កំណើនសេដ្ឋកិច្ចកម្ពុជានឹងកើនឡើង ក្រោយកិច្ចព្រមព្រៀង CKFTA អនុវត្តជាផ្លូវការ ខណៈសព្វថ្ងៃមានក្រុមហ៊ុនជាច្រើន បាននិងកំពុងវិនិយោគនៅកម្ពុជា ជាពិសេសនៅគ្រាដែលច្បាប់វិនិយោគមានភាពអនុគ្រោះច្រើនដល់វិនិយោគិនទាំងនោះ។
លោកបន្ថែមថា ការវិនិយោគនៅកម្ពុជា មិនខុសពីការវិនិយោគនៅតំបន់អាស៊ានទេ ដោយតំបន់មួយនេះមានប្រជាជន ៦៧៨,៥ លាននាក់ដែលនេះជាចំណុចដ៏សំខាន់ក្នុងការទាក់ទាញវិនិយោគិនកូរ៉េ ក៏ដូចជាវិនិយោគិនពីប្រទេសផ្សេងដែលនាំចេញទៅកូរ៉េ អាចនឹងទទួលបានការអនុគ្រោះពន្ធច្រើន ក្រោយការអនុវត្តកិច្ចព្រមព្រៀង CKFTA។ យ៉ាងណាលោកថា នៅមានបញ្ហាប្រឈមមួយចំនួន។
លោកបញ្ជាក់ថា៖ «អ្វីដែលប្រឈមចំពោះមុខមាន ៥ ចំណុច រួមមានទី១ បញ្ហាដីកសិកម្ម និងធារាសាស្ត្រ ទី ២ បញ្ហាការតភ្ជាប់ផ្លូវកសិកម្ម និងតំបន់ឧស្សាហកម្ម ទី ៣ បញ្ហាតម្លៃអគ្គិសនី ថ្លៃជាងប្រទេសជិតខាង ទី ៤ ការអនុវត្តច្បាប់នៅមានកម្រិតដែលការធ្វើកិច្ចសន្យាកសិកម្មពុំទាន់មានប្រសិទ្ធភាពនាំធ្វើឱ្យវិនិយោគិនមិនហ៊ានដាក់ទុន និងទី ៥ ការទប់ស្កាត់ទំនិញនាំចូលដោយខុសច្បាប់មិនមានប្រសិទ្ធភាពនៅឡើយ»។
លោក គី សេរីវឌ្ឍ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជាបាននិយាយថា ការអនុវត្តកិច្ចព្រមព្រៀង CKFTA គឺជាការបើកច្រកមួយទៀតសម្រាប់វិស័យកាត់ដេរកម្ពុជា បន្ទាប់ពីទីផ្សារអឺរ៉ុប អាមេរិក និងចិន។
លោកបន្ថែមថា៖ «កិច្ចព្រមព្រៀង CKFTA នេះ មានពិពិធកម្មខុសពីកិច្ចព្រមព្រៀង CCFTA ជាមួយចិនដោយសារតែចិនភាគច្រើនផ្តល់ឱ្យកម្ពុជាតែវិស័យកសិកម្ម ប៉ុន្តែ CKFTA ផ្តល់ឱ្យស្ទើរគ្រប់វិស័យទាំងផលិតផលអេឡិចត្រូនិក គ្រឿងផ្គុំអេឡិចត្រូនិករថយន្ត និងសម្លៀកបំពាក់ផងដែរ»៕ LA