The Phnom Penh Post Search

Search form




Logo of Phnom Penh Post newspaper Phnom Penh Post - ក្រុមហ៊ុន​ចំនួន ១៥ ប្រមូល​ទុន​ជាង $២៧៧ ​លាន​ពី​ផ្សារមូលបត្រ​កម្ពុជា

ក្រុមហ៊ុន​ចំនួន ១៥ ប្រមូល​ទុន​ជាង $២៧៧ ​លាន​ពី​ផ្សារមូលបត្រ​កម្ពុជា

Content image - Phnom Penh Post
លោក ស៊ូ សុជាតិ អគ្គនាយក​និយតករ​មូលបត្រ​កម្ពុជា (SERC)​។ ហេង ជីវ័ន

ក្រុមហ៊ុន​ចំនួន ១៥ ប្រមូល​ទុន​ជាង $២៧៧ ​លាន​ពី​ផ្សារមូលបត្រ​កម្ពុជា

ភ្នំពេញៈ លោក ស៊ូ សុជាតិ អគ្គនាយក​និយតករ​មូលបត្រ​កម្ពុជា​ (SERC)​ បាន​ប្រាប់​ភ្នំពេញ​ប៉ុស្តិ៍​ថា ទោះបី​មាន​ការរីករាលដាល​ជំងឺ​កូវីដ ​១៩ កាលពី​ឆ្នាំ​ ២០២១ ក៏​ផ្សារ​ហ៊ុន​កម្ពុជា​ (CSX) បានឃើញ​ពី​ការបោះ​ផ្សាយ​លក់​មូលបត្រ​កម្មសិទ្ធិ​លើកដំបូង​ជា​សាធារណៈ (IPO) ​របស់​សហគ្រាស​ធុន​តូច និង​មធ្យម ដែល​មិន​ធ្លាប់មាន ដោយបាន​ចុះបញ្ជី​លើ​ទីផ្សារ​កំណើន​។ ហើយ​បើ​គិត​ត្រឹម​ឆ្នាំ ​២០២១ មាន​ក្រុមហ៊ុន​ចុះបញ្ជី​នៅលើ​ទីផ្សារ​កំណើន​ចំនួន ១៥ ដែល​ក្នុងនោះ​ក្រុមហ៊ុន​ចំនួន ៨ បាន​ចុះបញ្ជី​មូលបត្រ​កម្មសិទ្ធិ ចំណែក​ក្រុមហ៊ុន​ផ្សេងទៀត​ចុះបញ្ជី​សញ្ញាបណ្ណ​សាជីវកម្ម ដោយ​ប្រមូល​មូលនិធិ​បាន​ពី​ទីផ្សារ​នេះ​ចំនួន​ប្រហែល ២៧៧,៧៩ លាន​ដុល្លារ​អាមេរិក​។

លោក​ឱ្យដឹងថា មូលធននីយកម្ម​ទីផ្សារ​សរុប​ត្រឹម​ខែវិច្ឆិកា ឆ្នាំ​ ២០២១ ​មាន​ចំនួន ១,៧៤​ ពាន់​លាន​ដុល្លារ​។ បរិមាណ​ជួញដូរ​ប្រចាំថ្ងៃ​មធ្យម​កាលពី​ឆ្នាំ​ ២០២១ (​គិត​ត្រឹម​ខែវិច្ឆិកា​) ​មាន​ចំនួន ១០៣ ៩១៧​ ភាគហ៊ុន កើន ១១៩,៨៣ ​ភាគរយ​ធៀប​រយៈពេល​ដូចគ្នា​ឆ្នាំ​ ២០២០ ជាមួយ​តម្លៃ​ជួញដូរ​ប្រចាំ​ថ្ងៃជា​មធ្យម ២០២ ៦៣៥ ​ដុល្លារ​ដែល​ខ្ពស់ជាង​រយៈពេល​ដូចគ្នា​នៃ​ឆ្នាំ​ ២០២០ ប្រហែល ៥៨​ ភាគរយ​។

លោក​បាន​ថ្លែងថា​៖ «​ទោះបី​មាន​ការរីក​រាលដាល​ជំងឺ​កូវីដ​ ១៩ ក៏ដោយ ក៏ SERC កាលពី​ឆ្នាំ​ ២០២១ បាន​មើលឃើញថា ទីផ្សារ​ភាគហ៊ុន​កម្ពុជា ទទួលបាន IPO លើកដំបូង​ដែល​មិន​ធ្លាប់មាន​របស់​សហគ្រាស​ធុន​តូច និង​មធ្យម ដែល​បាន​ចុះបញ្ជី​ក្នុង​ទីផ្សារ​កំណើន​។ ទីផ្សារ​នេះ​ក៏បាន​សម្រួល​ដល់​ការចេញ​មូលបត្រ​បំណុល​របស់​ Telcotech ដែល​ត្រូវបាន​ធានា​ដោយ​មូលនិធិ​ការធានា​ឥណទាន និង​មធ្យោបាយ​វិនិយោគ ​(CGIF)​ ផងដែរ​»​។

លោក សុជាតិ បាន​បន្ថែមទៀតថា​កាលពី​ឆ្នាំ​ ២០២១ SERC បានផ្តល់​អាជ្ញាប័ណ្ណ​/​ការអនុម័ត​/​ការទទួលស្គាល់​ដល់​ក្រុមហ៊ុន​ក្នុង​ទីផ្សារ​មួយចំនួន​ដូចជា ក្រុមហ៊ុន​ធានា​ទិញ​មូលបត្រ ១, ក្រុមហ៊ុន​សមភាគី​កណ្ដាល ១, ក្រុមហ៊ុន​ជើង​សានិស្សន្ទ ៤, ក្រុមហ៊ុន​គ្រប់គ្រង​មូលនិធិ ៥, និង​ក្រុមហ៊ុន​ធានា​ទុកទ្រព្យ ២​។ គិត​ត្រឹម​ឆ្នាំ​ ២០២១ SERC បានផ្តល់​អាជ្ញាប័ណ្ណ​ឱ្យ​ក្រុមហ៊ុន​មូលបត្រ ១២, ក្រុមហ៊ុន​ផ្តល់​ប្រឹក្សា​ហិរញ្ញវត្ថុ ៣, ក្រុមហ៊ុន​ផ្តល់​ប្រឹក្សា​វិនិយោគ ១, ក្រុមហ៊ុន ២៨ កំពុង​ធ្វើ​អាជីវកម្ម​នៅ CIS, ក្រុមហ៊ុន ៣៦ ធ្វើ​អាជីវកម្ម​ក្នុង​ឧបករណ៍​និស្សន្ទ​, និង​បានផ្តល់​ការយល់ព្រម​/​ការទទួលស្គាល់​ដល់​ភ្នាក់ងារ​ចំនួន ៣៦​។ គិត​ត្រឹម​ត្រីមាស​ទី ​៣ ​ឆ្នាំ ២០២១ SERC បានផ្តល់​ការយល់ព្រម​ដល់​អត្តសញ្ញាណ​វិនិយោគិន​ចំនួន ៣០ ១៥៣​។

លោក​ថ្លែងថា​៖ «​ក្នុងនាម​និយតករ​នៃ​ទីផ្សារ​មូលធន យើង​តែង​ដាក់​ការការពារ​វិនិយោគិន​ជា​អាទិភាព​ចម្បង​។ SERC បានផ្តល់​ការបណ្តុះបណ្តាល​ជាច្រើន​ដល់​សាធារណជន​ដើម្បី​បង្កើន​ការយល់ដឹង​ពី​ទីផ្សារ​មូលបត្រ​»​។

លោកស្រី គីម សុផានីតា ប្រធាន​នាយកដ្ឋាន​ប្រតិបត្តិការ​ទីផ្សារ​នៃ​ផ្សារមូលបត្រ​កម្ពុជា បាន​ប្រាប់​ភ្នំពេញ​ប៉ុស្តិ៍​កាលពី​ថ្ងៃទី ​៥ ខែមករា​ថា ឆ្នាំ​ ២០២១ គឺជា​ឆ្នាំ​ដ៏លំបាក​មួយទៀត​ដែល​ទីផ្សារ​មួយ​នេះ​បាន​យកឈ្នះ​។ ទីផ្សារ​នេះ បានឃើញ​ការកើនឡើង​យ៉ាងខ្លាំង​នៃ​សកម្មភាព​ជួញដូរ​ច្រើនជាង​ពេលណាៗ​ទាំងអស់​ក្នុង​ប្រវត្តិសាស្ត្រ​របស់ខ្លួន​។ ការជួញដូរ​ជា​មធ្យម​ប្រចាំថ្ងៃ​បាន​កើន​ដល់​ជិត ២៧០ ​ពាន់​ដុល្លារ​អាមេរិក​កើនឡើង ១២៧ ភាគរយ បើ​ធៀប​នឹង​ឆ្នាំ​ ២០២០​។

ទន្ទឹមនឹងនោះ​លោកស្រី​បាន​បញ្ជាក់ថា វា​នឹងមាន​ការខកចិត្ត​ខ្លះ​ពី​ក្រុម​វិនិយោគិន ពិសេស​ក្រុម​វិនិយោគិន​ដែល​វិនិយោគ​លើ​ភាគហ៊ុន​របស់​ធនាគារ​អេស៊ីលីដា ដែល​តម្លៃ​ភាគហ៊ុន​ធ្លាក់ចុះ​ប្រហែល ៣៨ ​ភាគរយ ដែល​ជំរុញ​ឱ្យ​សន្ទស្សន៍ CSX ធ្លាក់ចុះ ២៧ ​ភាគរយ​ដោយសារ​សម្ពាធ​ដ៏ខ្លាំង​របស់​វា​។

លោកស្រី​លើកឡើងថា​៖ «​ទោះជា​យ៉ាងណា ខ្ញុំ​ចង់​និយាយថា នេះ​ជា​ស្ថានភាព​ពិសេស​មួយ ហើយ​អាចជា​ការធ្លាក់ចុះ​បណ្តោះអាសន្ន ព្រោះ​វា​បណ្តាលមកពី​ភាពមិន​ស៊ីចង្វាក់​គ្នា​ជា​បណ្តោះអាសន្ន​រវាង​តម្រូវការ និង​ការផ្គត់ផ្គង់​លើស​នៃ​ភាគហ៊ុន ហើយ​វា​មិន​ទាក់ទង​នឹង​តម្លៃ​ជា​មូលដ្ឋាន​របស់​ក្រុមហ៊ុន​នោះទេ​»​។ លោកស្រី​បន្ថែមថា​៖ «​បើ​យើង​សង្កេត​ឱ្យបាន​ដិតដល់​គឺ​ហេតុផល​នៅ​ពីក្រោយ​ការបង្ខំ​លក់ និង​ការទិញ និង​ការកើនឡើង​គួរឱ្យកត់សម្គាល់​នៃ​សកម្មភាព​ជួញដូរ​កាលពី​ឆ្នាំ​ ២០២១​។ ខ្ញុំ​ជឿថា បញ្ហា​បណ្តោះអាសន្ន​បែបនេះ​នឹងត្រូវ​កែលម្អ​ក្នុង​ឆ្នាំ​ ២០២២ ហើយ​ក្រុម​វិនិយោគិន​ដែល​បាន​ទិញ​ក្នុងតម្លៃ​ទាប​កាលពី​ឆ្នាំមុន នឹង​អាច​ប្រមូល​ផល​ក្នុងឆ្នាំនេះ​ជាមិនខាន​»​។

លោក ស៊ូ សុជាតិ ក៏បាន​បញ្ជាក់ដែរថា ឆ្នាំ​ ២០២២ នឹង​ក្លាយជា​ឆ្នាំ​ដ៏​គួរឱ្យ​រំភើប និង​ជា​ឆ្នាំ​ប្រកបដោយ​ផ្លែផ្កា​មួយ​ផ្សេងទៀត​សម្រាប់ SERC ក្នុងនាម​ជា​និយតករ​ទីផ្សារ​មូលធន​នៅ​កម្ពុជា និង​ក្នុងនាម​ជា​ប្រធាន​វេទិកា​ទីផ្សារ​មូលធន​អាស៊ាន​។ SERC នឹងដាក់​ចេញ​នូវ​យុទ្ធសាស្ត្រ​អភិវឌ្ឍន៍​វិស័យ​មូលបត្រ​រយៈពេល​ ១០​ ឆ្នាំ​ផងដែរ​៕ LA

អត្ថបទគួរចាប់អារម្មណ៍

  • កោះកុងៈ កូនអណ្តើក​ហ្លួង​ចំនួន ៣០ ​ក្បាល​បាន​ញាស់​ចេញពី​សម្បុក​នៅលើ​ឆ្នេរ​ខ្សាច់​សិប្បនិម្មិត​ក្នុង​មជ្ឈមណ្ឌល​អភិរក្ស​សត្វ​ល្មូន​ខេត្តកោះកុង កាលពី​សប្តាហ៍​កន្លងទៅ ហើយ​នេះ​គឺជា​លើក​ទី​ ២ ​ហើយ ដែល​អណ្តើក​ហ្លួង​ចិញ្ចឹម​ក្នុង​មជ្ឈមណ្ឌល​នេះ​បាន​ពង​កូន​។ នេះ​បើតាម​អង្គការ​សមាគម​អភិរក្ស​សត្វព្រៃ​នៅ​កម្ពុជា (WCS)​។

  • ភ្នំពេញៈ ការបញ្ចូល​មីក្រូ​សារជាតិ​ក្នុង​អង្ករ គឺជា​ជំហាន​ចម្បង​មួយ​ក្នុងការ​ដោះស្រាយ​បញ្ហា​អាហារូបត្ថម្ភ​ក្នុង​ប្រទេស​កម្ពុជា ដែល​ប្រជាជន​ភាគច្រើន​ទទួលទាន​បាយ ក្នុង​បរិមាណ​ច្រើន​ជា​រៀងរាល់ថ្ងៃ​។ នេះ​បើតាម​មន្ត្រី​ក្រុមប្រឹក្សា​ស្តារ​អភិវឌ្ឍន៍​វិស័យ​កសិកម្ម និង​ជនបទ​។

  • ភ្នំពេញ: ក្នុង​ចំណោម​ភោជនីយដ្ឋាន​ពោរពេញ​ដោយ​សិល្បៈ​ចម្អិន​ម្ហូបអាហារ ការ​គិតគូរ​ពី​និរន្តរភាព​បរិស្ថាន​ភព​ផែន​ដី និង​បង្កប់​រឿង​រ៉ាវ​ប្រពៃណី​វប្បធម៌​ដ៏​អស្ចារ្យ​នៅ​អេស្ប៉ាញ ប៉េរូ​សហរដ្ឋអាមេរិក​ ថៃ ដាណឺម៉ាក​ នូវែលសេឡង់ ចិន ជប៉ុន អ៊ីតាលី និង​ម៉ិកស៊ិក អាហារ​នៅ​​ផ្ទះ​ប្រពៃណី​បុរាណ​មួយ​​​តាម​ដង​ទន្លេ​មេគង្គ

  • ភ្នំពេញៈ ទាំង​អ្នកនយោបាយ អ្នកវិភាគ និង​ស្ថាប័ន​គណៈកម្មាធិការ​ជាតិ​រៀបចំ​ការបោះឆ្នោត​បានចាត់ទុក​ដំណើរការ​ឃោសនា​រក​សំឡេងឆ្នោត ក្នុង​រយៈពេល ៣ ​ថ្ងៃ​របស់​គណបក្ស​នយោបាយ ដែល​បាន​ចុះបញ្ជី​បេក្ខជន​ចូលរួម​បោះឆ្នោត​ជ្រើសរើស​ក្រុមប្រឹក្សាឃុំ សង្កាត់​អាណត្តិ​ទី​ ៥ ដែល​នឹង​ប្រព្រឹត្តទៅ​នៅ​ថ្ងៃទី​ ៥ ខែមិថុនា ថា មាន​ភាពចាស់ទុំ​ផ្នែក​នយោបាយ និង​មិនមាន​អំពើហិង្សា​ណាមួយ​កើតឡើង​នោះ

  • ភ្នំពេញៈ សាលាឧទ្ធរណ៍​ភ្នំពេញ​នៅ​ថ្ងៃទី​ ២៣ ​ឧសភា បានប្រកាស​សាលដីកា​កំបាំង​មុខមន្ត្រី​សមាគម​ការពារ​សិទ្ធិមនុស្ស​អាដហុក​ ៤ ​រូប និង​អតីត​មន្ត្រី​ ១ ​រូប​ទៀត​សម្រេច​តម្កល់​សាលក្រម​របស់​សាលាដំបូង​រាជធានី​ភ្នំពេញ​ដដែល បន្ទាប់ពី​បាន​កាត់ក្តី​ឱ្យ​ពួកគេ​ជាប់ពន្ធនាគារ​ក្នុង​ម្នាក់​ ៥ ​ឆ្នាំ តែ​ឱ្យ​អនុវត្ត​ទោស ​១៤ ​ខែ​ពាក់ព័ន្ធ​បទចោទ​សូកប៉ាន់​សាក្សី និង​សមគំនិត​សូកប៉ាន់​សាក្សី​ដល់​ នាង ខុម ចាន់តារាទី ហៅ​ ស្រីមុំ​។

  • បន្ទាយមានជ័យៈ ក្នុង​មួយ​ថ្ងៃៗ​មាន​ប្រជាពលរដ្ឋ​នៅតាម​ព្រំដែន ជាពិសេស​ពលករ​ខ្មែរ​ពី ​៤០០ ទៅ​ ៥០០​ នាក់​បាន​ទៅ​ស្នើសុំ​ធ្វើ​បណ្ណ​ឆ្លងដែន ដើម្បី​បាន​ចូលទៅ​ធ្វើការ ឬ​លក់ដូរ​ស្របច្បាប់ នៅក្នុង​ប្រទេស​ថៃ បន្ទាប់ពី​ភាគី​ទាំង​ ២​ បាន​ឯកភាព​គ្នា​បើក​ច្រកព្រំដែន​ឡើងវិញ កាលពី​ថ្ងៃទី​ ១ ខែឧសភា ក្នុង​កម្រិត​ថ្នាក់​តំបន់​។