.jpg)
វិភាគដោយ៖ លោក ញឹម កុសល ប្រធានផ្នែកប្រឹក្សាយោបល់ហិរញ្ញវត្ថុនៃក្រុមហ៊ុន ហ្គោលដេន អេហ្វអិកស៍ លីង ឃែភីថល
តម្លៃប្រេងឆៅបានកើនឡើងខ្ពស់ជាង ១% នៅថ្ងៃជួញដូរដំបូងនៃឆ្នាំថ្មី មុនពេលកិច្ចប្រជុំរបស់អង្គការ OPEC និងសម្ព័ន្ធរបស់ខ្លួន (OPEC+) ដែលបានធ្វើឡើងកាលពីថ្ងៃអង្គារ ដើម្បីពិភាក្សាអំពីគោលនយោបាយផលិតកម្មប្រេង។
គួរបញ្ជាក់ផងដែរថា គេហទំព័រ Reuters កាលពីថ្ងៃចន្ទបានរាយការណ៍ថា៖ «អង្គការ OPEC បានកាត់បន្ថយទិន្នន័យប៉ាន់ស្មានរបស់ខ្លួននៃការផ្គត់ផ្គង់បន្ថែមនៅក្នុងទីផ្សារប្រេងពិភពលោក ក្នុងត្រីមាសនេះ ១ ថ្ងៃ មុនពេលអង្គការ OPEC+ ពិចារណាលើការជំរុញទិន្នផលផ្សេងទៀត។ ពួកគេមើលឃើញថា ទិន្នន័យបន្ថែមចំនួន ១,៤ លាន (b/d) ក្នុងរយៈពេល ៣ ខែដំបូងនៃឆ្នាំ ២០២២ បង្ហាញពីការធ្លាក់ចុះ ២៥% ពីការប៉ាន់ស្មានរបស់ខ្លួនកាលពី ១ ខែមុន»។
ងវិញទៀត គេហទំព័រ Bloomberg បានរាយការណ៍ថា ៖ «ទិន្នផលរបស់លីប៊ីកំពុងត្រូវបានរាំងស្ទះ ហើយរំពឹងថា ទិន្នផលរបស់ខ្លួននឹងធ្លាក់ចុះ ២០០ ពាន់ (b/d) ទៀត ក្នុងសប្តាហ៍ក្រោយ ខណៈដែលកម្មករព្យាយាមជួសជុលបំពង់ប្រេងដែលខូច។ ក្រុមហ៊ុនប្រេងជាតិរបស់រដ្ឋលីប៊ីបានបញ្ជាក់កាលពីល្ងាចថ្ងៃសៅរ៍សប្តាហ៍មុនថា បំពង់បង្ហូរប្រេងដ៏សំខាន់ដែលតភ្ជាប់ទៅកាន់ស្ថានីយនាំចេញដ៏ធំបំផុតរបស់ប្រទេស (Es Sider) នឹងត្រូវបិទសម្រាប់ការថែទាំ ដោយបានបញ្ជាក់ថានឹងអាចដំណើរការម្តងទៀតក្នុង ១ សប្តាហ៍»។
សម្រាប់ផ្នែកបច្ចេកទេសវិញ តម្លៃប្រេងស្ថិតក្នុង Bullish Swing ទី ២ នៃខែធ្នូ ក្នុងតម្លៃ ៧៧ ដុល្លារ។ ក្នុងរយៈពេល ១ ម៉ោង ប្រេងត្រូវបានជួញដូរក្នុងតម្លៃ ៧៥ ដុល្លារ ជិតតម្លៃប្រែប្រួលជាមធ្យមក្នុងរយៈ ៥០ ថ្ងៃ ខណៈដែលតម្លៃប្រែប្រួលជាមធ្យមរយៈពេល ២០០ ថ្ងៃ គឺ ៧៤,៥ ដុល្លារ។ ដូច្នេះ ក្នុងសប្តាហ៍នេះ វិនិយោគិនអាចជួញដូរក្នុងចន្លោះពី ៧៥ ទៅ ៨០ ដុល្លារ ឬអាចចាំចូលផ្សារ នៅតម្លៃ ៧៤ ដុល្លារ ដោយកំណត់មុខងារការពារហានិភ័យនៅតម្លៃ ៧២ ដុល្លារ និងមុខងារទាញយកប្រាក់ចំណេញទី ១ នៅតម្លៃ ៧៧ដុល្លារ និងទី ២ នៅតម្លៃ ៨០ ដុល្លារ៕
