ភ្នំពេញៈ រាជរដ្ឋាភិបាលកម្ពុជា បានចេញអនុក្រឹត្យបង្កើតគណៈកម្មការគ្រប់គ្រង និងអភិវឌ្ឍន៍ទេសចរណ៍សៀមរាបអង្គរ (គ.អ.ទ.ស) ដើម្បីអនុវត្តការងារសម្របសម្រួល និងត្រួតពិនិត្យការអភិវឌ្ឍគោលដៅទេសចរណ៍ខេត្តសៀមរាប ដោយត្រូវអនុវត្តទៅតាមផែនការមេអភិវឌ្ឍន៍ទេសចរណ៍ខេត្តសៀមរាបឆ្នាំ ២០២១-២០៣៥ ដែលដាក់ចេញកាលពីខែតុលា ឆ្នាំ ២០២១ កន្លងមក។
គ.អ.ទ.ស ត្រូវបានរាជរដ្ឋាភិបាលសម្រេចបង្កើតកាលពីថ្ងៃទី ៣០ ខែធ្នូ ឆ្នាំ ២០២១ ដើម្បីដឹកនាំ សម្របសម្រួល និងត្រួតពិនិត្យការអភិវឌ្ឍគោលដៅទេសចរណ៍ខេត្តសៀមរាប និងត្រូវអនុវត្តតាមផែនការមេអភិវឌ្ឍន៍ទេសចរណ៍ខេត្តសៀមរាប ២០២១-២០៣៥ ឱ្យមានប្រសិទ្ធភាពសំដៅបង្កើនភាពប្រកួតប្រជែង និងធានានិរន្តរភាព។
គ.អ.ទ.ស មាន លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច ជាប្រធាន អមដោយអនុប្រធានចំនួន ៣ រូប រួមមានលោក ថោង ខុន រដ្ឋមន្ត្រីក្រសួងទេសចរណ៍ ជាអនុប្រធានអចិន្ត្រៃយ៍ និងរដ្ឋមន្ត្រីក្រសួងវប្បធម៌ និងវិចិត្រសិល្បៈ និងរដ្ឋមន្ត្រីក្រសួងបរិស្ថាន ព្រមទាំងមានសមាជិកមកពីក្រសួងស្ថាប័នដទៃទៀត។
លោក តុប សុភ័ក អ្នកនាំពាក្យក្រសួងទេសចរណ៍ បានប្រាប់ភ្នំពេញ-ប៉ុស្តិ៍ក្នុងថ្ងៃទី ៥ ខែមករា ថា ថ្វីដ្បិតនៅក្នុងអនុក្រឹត្យបានបញ្ជាក់ពីសមាសភាពដែលត្រូវចូលរួមក្នុងការងារនេះមែន ប៉ុន្តែសមាសភាពជាក់ស្តែងនៅមិនទាន់បានបញ្ជាក់ច្បាស់លាស់ទេ យើងត្រូវរង់ចាំការសម្រេចពីក្រសួងនីមួយៗសិន ទើបមានការបើកកិច្ចប្រជុំបែងចែកការងារតាមក្រោយ។
លោកបញ្ជាក់ថា៖ «នៅពេលមានសមាសភាពជាក់ស្តែង ប្រធាន គ.អ.ទ.ស នឹងបើកកិច្ចប្រជុំមួយ ដើម្បីបែងចែកការងារ ដោយអនុវត្តតាមផែនការមេអភិវឌ្ឍន៍ទេសចរណ៍ខេត្តសៀមរាប ដែលមានស្រាប់ រួមទាំងការងារមួយចំនួនទៀត ដែលអនុក្រឹត្យបានចែងពីតួនាទី និងភារកិច្ច គ.អ.ទ.ស»។
អគ្គនាយករងអាជ្ញាធរជាតិអប្សរា លោក ឡុង កុសល បាននិយាយថា អាជ្ញាធរជាតិអប្សរា ជាអង្គភាពទទួលខុសត្រូវក្នុងការគ្រប់គ្រងគោលដៅទេសចរណ៍តំបន់បេតិកភណ្ឌអង្គរ ដែលជាតំបន់ទេសចរណ៍អាទិភាពមួយក្នុងចំណោមតំបន់ទេសចរណ៍អាទិភាពទាំង ៦ ដែលស្ថិតនៅក្រោមការគ្រប់គ្រងរបស់ គ.អ.ទ.ស។
លោកបន្ថែមថា ក្រៅពីផែនការមេអភិវឌ្ឍន៍ទេសចរណ៍ខេត្តសៀមរាប ឆ្នាំ ២០២១-២០៣៥ អាជ្ញាធរជាតិអប្សរាក៏មានផែនការអភិវឌ្ឍទេសចរណ៍មួយផ្សេងទៀត ដែលស្របតាមផែនការនេះ ដើម្បីជាការបំពេញឱ្យគ្នាទៅវិញទៅមក ដោយការអនុវត្តការងារនេះមានការផ្តល់យោបល់ បច្ចេកទេសមួយចំនួនពី ICC-Angkor ដើម្បីធានាគុណតម្លៃនៃរមណីយដ្ឋានអង្គរ។
លោកបញ្ជាក់ថា៖ «ថ្វីដ្បិតតែមានផែនការមេ និងផែនការសកម្មភាព ដែល គ.អ.ទ.ស បានដាក់ចេញមកក៏ដោយ ប៉ុន្តែការអនុវត្តត្រូវតែពិនិត្យមើលលើស្ថានភាព និងលទ្ធភាពជាក់ស្តែងផងដែរ ព្រោះស្ថានភាពកូវីដ ១៩ នៅកើតមាននៅឡើយ»។
គោលដៅទេសចរណ៍អាទិភាព ៦ ដែលនឹងស្ថិតនៅក្រោមការគ្រប់គ្រងរបស់ គ.អ.ទ.ស រួមមាន តំបន់ឧទ្យានជាតិភ្នំគូលែន, តំបន់ទេសចរណ៍ជុំវិញតំបន់ការពារប្រាសាទបន្ទាយស្រី, តំបន់បេតិកភណ្ឌអង្គរ, តំបន់ក្រុងសៀមរាប, តំបន់បឹងទន្លេសាប និង តំបន់ទេសចរណ៍សៀមរាបថ្មី។
ផែនការមេអភិវឌ្ឍន៍ទេសចរណ៍ខេត្តសៀមរាប ឆ្នាំ ២០២១-២០៣៥ ត្រូវបានដាក់ឱ្យអនុវត្តជាផ្លូវការ កាលពីថ្ងៃទី ២០ ខែតុលា ឆ្នាំ ២០២១ តាមរយៈប្រព័ន្ធអនឡាញ ដោយលោករដ្ឋមន្ត្រីក្រសួងសេដ្ឋកិច្ច មានជំនឿថា ផែនការមេអភិវឌ្ឍន៍ទេសចរណ៍ខេត្តសៀមរាប ឆ្នាំ ២០២១-២០៣៥ នឹងជួយលើកស្ទួយវិស័យទេសចរណ៍នៅកម្ពុជាក្នុងក្របខ័ណ្ឌទូទាំងប្រទេស ជាពិសេសនៅខេត្តសៀមរាប សំដៅប្រែក្លាយកម្ពុជាទៅជាគោលដៅទេសចរណ៍ប្រកបដោយគុណភាព សុវត្ថិភាព និងចីរភាព ព្រមទាំងជួយទ្រទ្រង់ដល់ការងើបឡើងវិញសេដ្ឋកិច្ច។
កន្លងមកក្រសួងទេសចរណ៍ ធ្លាប់លើកឡើងថា តាមរយៈផែនការមេនេះ ខេត្តសៀមរាបរំពឹងអាចទាក់ទាញភ្ញៀវទេសចរជាតិបាន ១០,៩ លាននាក់នៅឆ្នាំ ២០២៣ និងភ្ញៀវទេសចរអន្តរជាតិ ៧,៥ លាននាក់នៅឆ្នាំ ២០២៥។ តាមរយៈនេះ រដ្ឋាភិបាលក៏មានចក្ខុវិស័យបង្កើតការងារឱ្យបាន ៩៤ ម៉ឺននាក់ និងប្រាក់ចំណូលចូលក្នុងចរន្តសេដ្ឋកិច្ចខេត្តសៀមរាបប្រមាណ ៦ ពាន់លានដុល្លារ៕ LA