ភ្នំពេញៈ កំពង់ផែទេសចរណ៍កោះទន្សាយគ្រោងនឹងសម្ពោធដាក់ឱ្យប្រើប្រាស់ជាផ្លូវការនៅអំឡុងសប្តាហ៍ទី ៣ ខែមករានេះ បន្ទាប់ពីបញ្ចប់ការសាងសង់កាលពីពេលថ្មីៗនេះ ដើម្បីបម្រើ និងទាក់ទាញទេសចរក្នុងស្រុក និងពីប្រទេសជិតខាង។
លោក សោម ពិសិដ្ឋ អភិបាលខេត្តកែប បានប្រាប់ភ្នំពេញប៉ុស្តិ៍នៅថ្ងៃទី ៥ ខែមករា ថា កំពង់ផែកោះទន្សាយ បានបញ្ចប់ការសាងសង់ ១០០ ភាគរយហើយ ដោយគ្រោងនឹងសម្ពោធដាក់ឱ្យដំណើរការនៅថ្ងៃទី ១៩ ខែមករា ឆ្នាំ ២០២២។ កំពង់ផែនេះ នឹងជួយពង្រីកសក្តានុពលវិស័យទេសចរណ៍ និងសេដ្ឋកិច្ចខេត្តកែប តាមផ្លូវទឹកជាមួយប្រទេសក្នុងតំបន់ និងពិភពលោក។
លោកបន្ថែមថា តាមព័ត៌មានបឋមរដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល នឹងចូលរួមក្នុងពិធីសម្ពោធដាក់ឱ្យដំណើរការ។
លោកបានថ្លែងថា៖ «ជាទូទៅកំពង់ផែនីមួយៗគេសាងសង់ឡើងមានគោលដៅខុសៗគ្នាដោយរួមមានកំពង់ផែនេសាទ កំពង់ផែដឹកជញ្ជូនទំនិញ និងកំពង់ផែទេសចរណ៍។ សម្រាប់កំពង់ផែកោះទន្សាយនេះ គឺជាកំពង់ផែទេសចរណ៍ដែលអាចបម្រើឱ្យវិស័យទេសចរណ៍មិនត្រឹមតែនៅក្នុងស្រុកប៉ុណ្ណោះទេ ប៉ុន្តែវានឹងបម្រើឱ្យទេសចរណ៍អន្តរជាតិផងដែរ»។
ពាក់ព័ន្ធនឹងគម្រោងសម្ពោធដាក់ឱ្យដំណើរការនាពេលខាងមុខ លោក វ៉ាស៊ីម សុរិយា អ្នកនាំពាក្យក្រសួងសាធារណការ និងដឹកជញ្ជូន ប្រាប់ថា លោកមិនទាន់ទទួលបានព័ត៌មានជាផ្លូវការនៅឡើយទេ។
លោក សោម ចិន្តា ប្រធានមន្ទីរទេសចរណ៍ខេត្តកែប បាននិយាយថា កំពង់ផែទេសចរណ៍កោះទន្សាយនឹងរួមចំណែកដ៏សំខាន់ក្នុងការលើកមុខមាត់ខេត្តកែប ហើយវាក៏ជួយបង្កើនភាពទាក់ទាញភ្ញៀវទេសចរតាមផ្លូវទឹកកាន់តែច្រើនឱ្យទៅកម្សាន្តនៅតាមកោះនានាក្នុងខេត្ត។ ម្យ៉ាងទៀតកំពង់ផែនេះក៏នឹងរួមចំណែកបង្កើនកិច្ចសហប្រតិបត្តិការជាមួយប្រទេសជិតខាង។
លោកបន្តថា៖ «គោលបំណងរបស់យើង គឺធ្វើកិច្ចសហប្រតិបត្តិការទេសចរណ៍តាមផ្លូវទឹកពីខេត្តកែបទៅកោះត្រល់ និងទៅប្រទេសថៃ។ ទៅថ្ងៃអនាគតកំពង់ផែនេះនឹងអាចទទួលទូកទេសចរណ៍ផ្ទុកភ្ញៀវនៅក្រោម ១០០ នាក់ ហើយបើកទូកផ្ទុក ភ្ញៀវ ៣០០-៤០០ នាក់អាចចតឆ្ងាយជាងនេះបន្តិច»។
បើតាម លោក ចិន្តា ទៅថ្ងៃអនាគត កំពង់ផែនេះនឹងក្លាយជាកំពង់ផែអន្តរជាតិដែលប្រមូលផ្តុំដោយស្ថាប័នពាក់ព័ន្ធជាច្រើនដូចជា ស្ថាប័នអន្តោប្រវេសន៍ និងគយជាដើម ដែលនឹងជួយឱ្យខេត្តកែបទទួលបានចំណូលកាន់តែច្រើនពីវិស័យទេសចរណ៍ និងទំនិញ ពិសេសនឹងផ្តល់ឱកាសការងារដល់ប្រជាពលរដ្ឋនៅមូលដ្ឋានកាន់តែច្រើនថែមទៀត។
កំពង់ផែកោះទន្សាយ ត្រូវបានសាងសង់លើទីតាំងកំពង់ផែកោះទន្សាយចាស់ ស្ថិតក្នុងសង្កាត់កែប ក្រុងកែប ដោយចាប់ផ្តើមសាងសង់ក្នុងខែធ្នូ ឆ្នាំ ២០១៩ និងបញ្ចប់នៅចុងខែធ្នូ ឆ្នាំ ២០២១ ដោយចំណាយថវិកាប្រមាណ ៥ ពាន់លានរៀល។ កំពងផែនេះសង់ចេញពីដីគោកទៅក្នុងទឹកជម្រៅ ៣០៦ ម៉ែត្រ ទទឹង ៦៨ ម៉ែត្រ និងផ្ទៃក្រឡាជិត ៥ ពាន់ម៉ែត្រការ៉េ៕ LA