The Phnom Penh Post Search

Search form




Logo of Phnom Penh Post newspaper Phnom Penh Post - កម្ពុជា​ប្រមូល​បាន​ប្រាក់​ជិត $៥៣ ​លាន ​ពី​ការនាំចេញ​ពោតក្រហម

កម្ពុជា​ប្រមូល​បាន​ប្រាក់​ជិត $៥៣ ​លាន ​ពី​ការនាំចេញ​ពោតក្រហម

Content image - Phnom Penh Post
កសិករ​អង្គុយ​បក​ពោតក្រហម នៅ​កន្លែង​ប្រមូល​ទិញ​ ១​ កន្លែង​ក្នុង​ខេត្ត​ត្បូងឃ្មុំ​។ រូបថត រ៉ាស់ហ៊ីម

កម្ពុជា​ប្រមូល​បាន​ប្រាក់​ជិត $៥៣ ​លាន ​ពី​ការនាំចេញ​ពោតក្រហម

ភ្នំពេញៈ ការនាំចេញ​ពោតក្រហម​ក្នុង​ឆ្នាំ ​២០២១ មាន​បរិមាណ​ជិត ៧០ ​ម៉ឺន​តោន ថយចុះ​ជិត ៥ ​ភាគរយ​ធៀប​នឹង​រយៈពេល​ដូចគ្នា​ឆ្នាំ​ ២០២០ ដែលមាន​ជាង ៧៣ ​ម៉ឺន​តោន​។ ប៉ុន្តែ​បើ​គិត​ជា​ទំហំ​ទឹកប្រាក់​នាំចេញ​វិញ គឺមាន​ចំនួន​ជិត ៥៣ ​លាន​ដុល្លារ កើនឡើង​ជាង ៨​ ភាគរយ​។ នេះ​បើ​យោងតាម​របាយការណ៍​ពី​ក្រសួងកសិកម្ម រុក្ខាប្រមាញ់ និង​នេសាទ​។

លោក ព្រំ វ៉ឹក អនុប្រធាន​ការិយាល័យ​ស្ថិតិ​នៃ​មន្ទីរ​កសិកម្ម រុក្ខាប្រមាញ់ និង​នេសាទ​ខេត្តបាត់ដំបង បាន​និយាយថា ក្នុង​ឆ្នាំ​ ២០២១ នៅ​ខេត្តបាត់ដំបង​មាន​ផ្ទៃដី​ដាំ​ដុះ​ពោតក្រហម​ប្រមាណ ៥៣ ៣៥២ ​ហិកតា ដោយ​ប្រមូល​ផល​បាន ៤៩ ៩៦៤ ​ហិកតា ដែល​ស្មើនឹង​បរិមាណ​ផល ២៨៥ ៤១៤​ តោន បើ​ធៀប​នឹង​ឆ្នាំ​ ២០២០ ថយចុះ​ប្រហែល ២៥ ​ភាគរយ​។

លោក​បន្តថា ការដាំដុះ និង​ប្រមូលផល​ពោតក្រហម​ឆ្នាំនេះ​មាន​ការថយចុះ ដោយសារតែ​កសិករ ងាក​ទៅ​ដាំដំឡូងមី​ភាគច្រើន​។ ការផ្លាស់ប្តូរ​ប្រភេទ​ដំណាំ​នេះ គឺជា​ទម្លាប់​ដែល​កសិករ​តែងតែ​អនុវត្ត​ជា​យូរ​មកហើយ ដើម្បី​ជួយ​ឱ្យ​ដី​ធូរ មាន​ជីជាតិ​ល្អ និង​ស្របតាម​តម្រូវការ​ទីផ្សារ​។

លោក​បញ្ជាក់ថា​៖ «​ថ្វី​ដ្បិត​ទិន្នផល​បាន​តិច ប៉ុន្តែ​តម្លៃ​ពោត​បាន​ថ្លៃ​ក្នុងឆ្នាំនេះ ដោយមាន​តម្លៃ​ពី ៦០០-៦៥០ ​រៀល​ក្នុង​ ១ ​គីឡូក្រាម ខណៈ​ឆ្នាំ​ ២០២០ ​មានតម្លៃ​ជា​មធ្យម ៥០០​ រៀល​គិត​ទាំង​ស្នូល ដោយ​ឈ្មួញ​នឹង​យក​ស្នូលពោត​ទៅ​កែច្នៃ​សម្រាប់​ដាំដុះ​ផ្សិត​»​។

លោក ប៉ាង វណ្ណាសេដ្ឋ ប្រធាន​មន្ទីរ​កសិកម្ម ខេត្តបន្ទាយមានជ័យ បានឱ្យដឹងថា ការដាំដុះ​ពោតក្រហម​មាន​ច្រើន​នៅ​ស្រុក​ម៉ាឡៃ ដោយ​ក្នុង​ឆ្នាំ ​២០២១ កន្លងទៅ បរិមាណ​ពោតក្រហម​ដែល​ប្រមូលផល​បាន​មាន​ចំនួន​ជាង ៥ ​ម៉ឺន​តោន​នៅលើ​ផ្ទៃដី​ជាង ១ ​ម៉ឺន​ហិកតា​។ ទិន្នផល​ប្រមូលបាន​ក្នុង​ឆ្នាំ​ ២០២១ ប្រហាក់ប្រហែល​នឹង​ឆ្នាំ​ ២០២០​។

លោក​បន្ថែមថា ទីផ្សារ​សំខាន់​របស់​ពោតក្រហម​ខេត្ត​បន្ទាយមានជ័យ គឺ​ប្រទេស​ថៃ ហើយ​មួយចំនួន​ត្រូវបាន​ឈ្មួញ​ក្នុងស្រុក​ទិញយក​ទៅ​កែច្នៃ​ធ្វើជា​ចំណី​សត្វ​។ ពោតក្រហម ជា​ដំណាំ​លំដាប់​ទី​ ៣ ដែលមាន​ការដាំដុះ​ច្រើន​ក្នុង​ខេត្តបន្ទាយមានជ័យ បន្ទាប់ពី​ស្រូវ និង​ដំឡូងមី​។

លោក​បញ្ជាក់ថា​៖ «​ថ្វីដ្បិត​មាន​វិបត្តិ​កូវីដ​ ១៩ ប៉ុន្តែ​ការនាំចេញ​ដំណាំ​ទៅ​លក់​នៅ​តំបន់​ព្រំដែន ជាពិសេស​ពោតក្រហម គឺ​មិនមាន​ការរាំងស្ទះ​ទេ​ ដោយ​រាល់​ផលិតផល​កសិកម្ម អាជ្ញាធរ​ប្រទេស​ទាំង ២ ​មិន​មានការ​រឹតបន្តឹង​ឡើយ​»​។

ប្រធាន​មន្ទីរ​កសិកម្ម​ខេត្តកំពង់ចាម លោក ស៊ឹម ថាវរៈ និយាយថា កសិករ​បាន​ដាំ​ដុះ​ដំណាំ​ពោតក្រហម​ប្រមាណ​ជាង ៥ ០០០​ ហិកតា នៅ​ទូទាំង​ខេត្តកំពង់ចាម ដោយ​ភាគច្រើន​ដាំ​នៅតាម​តំបន់​ក្បែរ​ទន្លេ​។ លោក​បាន​បន្ថែមថា​៖ «​តម្លៃ​ពោតក្រហម ជា​មធ្យម​ចន្លោះ​ ៩០០-១ ០០០​ រៀល​ក្នុង​ ១ ​គីឡូក្រាម សម្រាប់​ពោត​គ្រាប់​សុទ្ធ​គ្មាន​ស្នូល ដែល​តម្លៃ​នេះ​ជា​តម្លៃ​សមរម្យ ប៉ុន្តែ​សម្រាប់​តម្លៃ​ធាតុ​ចូល​កសិកម្ម ដូចជា ជី និង​ថ្នាំ​សម្លាប់​សត្វល្អិត គឺមាន​តម្លៃ​ខ្ពស់ ដែល​ធ្វើឱ្យ​កសិករ​ចំណេញ​តិច​»​។

កាលពី​ពាក់កណ្តាល​ឆ្នាំ​ ២០២១ អគ្គនាយកដ្ឋាន​កសិកម្ម​នៃ​ក្រសួងកសិកម្ម រុក្ខាប្រមាញ់ និង​នេសាទ ធ្លាប់​បានចេញ​លិខិត​អំពាវនាវ​ឱ្យ​អ្នក​នាំ​ចេញ​នាំចូល​ពោតក្រហម​ត្រូវគោរព​តាម​លក្ខខណ្ឌ​តម្រូវ​ថ្មី​របស់​ប្រទេស​ថៃ ដោយ​ត្រូវមាន​លិខិតអនុញ្ញាត​​នាំចូល​ (Import permit) ​ពី​នាយកដ្ឋាន​កសិកម្ម​ថៃ​ជាមុន​។ ការដឹក​ជញ្ជូន​គ្រាប់ពោត ត្រូវ​ប្រើប្រាស់​មធ្យោបាយ​ដឹកជញ្ជូន​ពី​កម្ពុជា ទៅកាន់​ប្រទេស​ថៃ​តាម​ផ្លូវគោក ឬ​ផ្លូវ​សមុទ្រ​, គ្រាប់ពោត​ត្រូវតែ​ធានាថា ស្អាត​ល្អ និង​គ្មាន​សមាសភាព​ចង្រៃ​រស់​គ្មាន​រោគសញ្ញា និង​ភ្នាក់ងារ​ចម្លង ការវេចខ្ចប់​គ្រាប់ពោត​ត្រូវតែ​ស្អាត និង​ជាការ​វេច​ខ្ចប់​ថ្មី​ហើយ​គ្រាប់ពោត​ត្រូវធ្វើ​ធូបនកម្ម​ (Fumigation ) ​មុននឹង​នាំចេញ​ដោយ​ប្រើប្រាស់​ថ្នាំ Methyl Bromide​។ ម្យ៉ាងទៀត​គ្រាប់ពោត​ត្រូវ​ដឹក​តាម​កុងតឺន័រ ឬ​រថយន្ត​ដឹកទំនិញ​តូច​។ ក្នុងករណី​ដឹកជញ្ជូន​តាម​រថយន្ត​ដឹកទំនិញ​តូចៗ​ត្រូវ​បិទ​ជិត​។ បើ​រថយន្ត​ដឹកទំនិញ​តូចៗ​បើកចំហ ត្រូវ​គ្រប​ទាំងស្រុង​ដោយ​សំពត់​តង់​សម្រាប់​សន្តិសុខ​ភូតគាម​អនាម័យ​៕ LA

វីដេអូ៖

អត្ថបទគួរចាប់អារម្មណ៍