ភ្នំពេញៈ ការិយាល័យឥណទានកម្ពុជា (CBC) បានដាក់ឱ្យដំណើរការផលិតផលថ្មីគឺ Credit Report Plus ដែលជាមុខងារសេវាកម្មត្រួតពិនិត្យសុខភាពហិរញ្ញវត្ថុ មាននៅលើកម្មវិធីទូរស័ព្ទដៃ CBC Mobile App ខណៈមុខងារនេះនឹងជួយឱ្យអ្នកខ្ចីប្រាក់គ្រប់រូបអាចគ្រប់គ្រងសុខភាពហិរញ្ញវត្ថុរបស់ខ្លួនបាន។
មុខងារ Credit Report PLUS រួមបញ្ចូលរបាយការណ៍ឥណទាន និងសេវាពិន្ទុ K-Score នៅក្នុងមុខងារតែមួយ ដោយបង្ហាញអ្នកខ្ចីប្រាក់ឱ្យឃើញពីស្ថានភាពសុខភាពហិរញ្ញវត្ថុរបស់ខ្លួន។ មុខងារនេះផ្តល់ជូនក្នុងតម្លៃសមរម្យជាងការបញ្ជាទិញរបាយការណ៍ឥណទាន និងសេវាពិន្ទុ K-Score ដាច់ដោយឡែកពីគ្នាដែលជួយឱ្យការពិនិត្យសុខភាពហិរញ្ញវត្ថុបានគ្រប់ជ្រុងជ្រោយ និងមានតម្លៃសមរម្យ សម្រាប់អ្នកប្រើប្រាស់ពេញផ្ទៃប្រទេស។
អតិថិជនដែលបានស្នើសុំរបាយការណ៍សុខភាពហិរញ្ញវត្ថុតែមួយមុខពី CBC នៅពេលនេះអាចទាញយកនូវអត្ថប្រយោជន៍ (1 Credit Report + 1 K-Score) នៃមុខងារ Credit Report PLUS ដោយចំណាយបន្ថែមតិចតួចបំផុត។ នេះបើតាមសេចក្ដីប្រកាសព័ត៌មានបានពី CBC កាលពីថ្ងៃទី ៦ ខែមករា ឆ្នាំ ២០២២។
CBC បានឱ្យដឹងថា៖ «តាមរយៈការកែលម្អ សេវាពិន្ទុ K-Score របស់ខ្លួន អ្នកប្រើប្រាស់ទំនងជាអាចបង្កើនកម្រិតកម្ចីរបស់ខ្លួនបានច្រើន ដោយអាស្រ័យលើគោលការណ៍ផ្តល់កម្ចីរបស់គ្រឹះស្ថានហិរញ្ញវត្ថុនានា។ ពិន្ទុនោះរំលេចឡើងនូវភាពស័ក្តិសម និងទទួលបានឥណទានរបស់អតិថិជនណាម្នាក់ជាចំនួនទោល ដែលជួយឱ្យអ្នកខ្ចីដឹងថា ខ្លួនស្ថិតនៅក្នុងស្ថានភាពណា»។
លោក អឿ សុធារ័ត្ន អគ្គនាយកប្រតិបត្តិរបស់ CBC បានឱ្យដឹងថា អ្នកខ្ចីនឹងបានឃើញទិដ្ឋភាពសុខភាពហិរញ្ញវត្ថុរបស់ខ្លួនកាន់តែច្បាស់ ហើយនឹងអាចធ្វើការកែលម្អ ភាពស័ក្តិសម នឹងទទួលបានឥណទានរបស់ខ្លួន រក្សាពិន្ទុ ខេស្ករ ហើយរាយការណ៍ពីភាពអសុក្រឹតទាំងឡាយក្នុងរបាយការណ៍ឥណទានរបស់ខ្លួនបាន។
លោកថ្លែងថា៖ «យើងបានសម្ពោធឱ្យប្រើប្រាស់មុខងារ Credit Report PLUS ដើម្បីឱ្យស្របតាមតម្រូវការឱ្យកាន់តែប្រសើរឡើង ហើយផ្តល់នូវជម្រើសតាមការពេញចិត្តដល់អ្នកប្រើប្រាស់ បន្ទាប់ពីសម្ពោធឱ្យប្រើប្រាស់កម្មវិធីទូរស័ព្ទដៃរបស់យើងបាន ១ ឆ្នាំរួចមកហើយ។ មុខងារថ្មីនេះសំដៅកែលម្អអក្ខរកម្មហិរញ្ញវត្ថុ និងលើកទឹកចិត្តដល់ឥរិយាបថហិរញ្ញវត្ថុ ប្រកបដោយការទទួលខុសត្រូវនៅកម្ពុជា»។
យោងតាមទិន្នន័យចុងក្រោយនៅក្នុងរបាយការណ៍សន្ទស្សន៍ឥណទានលក្ខណៈបុគ្គលប្រចាំត្រីមាសទី ៣ បោះពុម្ពដោយ CBC ការដាក់ពាក្យសុំឥណទានរបស់អ្នកប្រើប្រាស់កើនឡើង ៣៨ ភាគរយធៀបនឹងត្រីមាសទី ២។ ទិន្នន័យបានបង្ហាញពីកំណើនសមតុល្យកម្ចីបាន ៥,៨៤ ភាគរយ។ កម្ចី ៣០ ថ្ងៃផុតកំណត់សងក៏កើនឡើងបាន ៦ ភាគរយដែរ ដែលចំណុចនេះបង្ហាញពីសារៈសំខាន់នៃការបង្កើតប្រព័ន្ធជឿជាក់មួយ ដែលវាយតម្លៃហានិភ័យឥណទានបានភ្លាម។ ជាមួយនឹងមុខងារ Credit Report Plus អ្នកខ្ចីអាចធ្វើការសម្រេចចិត្ត ដោយមានការគិតគូរបានប្រសើរជាងមុន។ សព្វថ្ងៃ CBC ជាគ្រឹះស្ថានរាយការណ៍ឥណទានតែមួយនៅកម្ពុជា ដែលផ្តល់ជូននូវរបាយការណ៍ឥណទាន និងសេវាពិន្ទុ K-Score៕ LA