.jpg)
ការនាំចេញ និងនាំចូលទំនិញ (ដកមាសចេញ) របស់ប្រទេសកម្ពុជា រយៈពេល ១១ ខែ ឆ្នាំ ២០២១ បានកើនឡើងក្នុងរង្វង់ជាង ២០ ភាគរយព្រមគ្នា ។
ភ្នំពេញៈ ការនាំចេញ និងនាំចូលទំនិញ (ដកមាសចេញ) របស់ប្រទេសកម្ពុជា រយៈពេល ១១ ខែ ឆ្នាំ ២០២១ បានកើនឡើងក្នុងរង្វង់ជាង ២០ ភាគរយព្រមគ្នា ដោយសម្រេចបានក្នុងទំហំទឹកប្រាក់ជាង ៣៦ ពាន់លានដុល្លារ។ នេះបើយោងតាមក្រសួងសេដ្ឋកិច្ច និងហិរញ្ញវត្ថុ។
ទិន្នន័យនៃឯកសារនិន្នការសេដ្ឋកិច្ច-សង្គម របស់ក្រសួងសេដ្ឋកិច្ច និងហិរញ្ញវត្ថុ ឱ្យដឹងថា ចាប់ពីខែមករា ដល់ខែវិច្ឆិកា ឆ្នាំ ២០២១ ការនាំចេញទំនិញ (ដកមាសចេញ) ពីកម្ពុជាទៅទីផ្សារអន្តរជាតិ មានទឹកប្រាក់សរុប ១៥ ៦១៣ លានដុល្លារ កើនឡើង ២២,៦ ភាគរយបើធៀបនឹងរយៈពេលដូចគ្នាឆ្នាំ ២០២០។ ការកើនឡើងចំនួនទឹកប្រាក់នាំចូលនេះបានមកពីកំណើននៃការនាំចេញផលិតផលវាយនភណ្ឌ, កង់ និងទំនិញផ្សេងៗដូចជា គ្រឿងសង្ហារិម, ស្បែកសត្វមានរោម (furskins), កៅស៊ូ, ក្តារកុងប្លាកេ, វត្ថុសម្រាប់ជាងសំណង់ធ្វើពីប្លាស្ទិក, សូឡា, ខ្សែភ្លើង និងបង្គុំខ្សែភ្លើង, គ្រឿងអេឡិចត្រូនិក និងភាគបំណែក, ចេក, ស្ករស, កសិផលផ្សេងៗ, ដំឡូងមី និងស្វាយ ជាដើម។
ចំណែកការនាំចូលទំនិញ (ដកមាសចេញ) សម្រេចបានក្នុងទំហំទឹកប្រាក់ ២០,៤ ពាន់លានដុល្លារ កើនឡើង ២៥,៣ ភាគរយធៀបនឹងរយៈពេលដូចគ្នាឆ្នាំ ២០២០ ដោយសារកំណើននៃការនាំចូលក្រណាត់, គ្រឿងសំណង់, ប្រេងឥន្ធនៈ និងទំនិញផ្សេងៗ។
យោងតាមក្រសួងសេដ្ឋកិច្ច និងហិរញ្ញវត្ថុ បន្ទាប់ពីទទួលរងផលប៉ះពាល់ពីវិបត្តិជំងឺកូវីដ ១៩ ជាពិសេសព្រឹត្តិការណ៍សហគមន៍ ២០ កុម្ភៈ សេដ្ឋកិច្ចប្រទេសកម្ពុជាបានបង្ហាញពីភាពប្រសើរឡើងវិញបន្តិចម្តងៗ ប៉ុន្តែពុំទាន់អាចវិលរកភាពប្រក្រតីភាពដូចមុនមានការរីករាលដាលនៃជំងឺកូវីដ ១៩ នៅឡើយទេ ជាពិសេសវិស័យមួយចំនួនដូចជា ទេសចរណ៍, សំណង់ និងការទុនវិនិយោគផ្ទាល់ពីបរទេស។ ទោះបីជា ការនាំចេញក្រៅពីសម្លៀកបំពាក់ និងផលិតផលកាត់ដេរ ដូចជា កង់, គ្រឿងបង្គំ អេឡិចត្រូនិក, ផលិតផលពីឈើ និងផលិតផល កសិកម្មផ្សេងទៀត ជាដើម បានបន្តរក្សាកំណើនល្អ។
ក្រសួងសេដ្ឋកិច្ច បានបញ្ជាក់ថា ជារួមសេដ្ឋកិច្ចកម្ពុជា បានបង្ហាញសញ្ញាវិជ្ជមានឆ្នាំ ២០២១ ដោយសារការងើបឡើងវិញនៃស្ថានភាពសេដ្ឋកិច្ចសកល, សេដ្ឋកិច្ចដៃគូពាណិជ្ជកម្មរបស់កម្ពុជា៕
