ភ្នំពេញៈ ភ្ញៀវទេសចរប្រមាណជិត ១៦ ម៉ឺននាក់បានចេញដើរកម្សាន្តនៅតាមរមណីយដ្ឋាននានានៅទូទាំងប្រទេសក្នុងឱកាសនៃខួប ៤៣ឆ្នាំនៃថ្ងៃទិវាជ័យជម្នះ ៧ មករា (៧ មករា ១៩៧៩-៧ មករា ២០២២) លើរបបប្រល័យពូជសាសន៍ ប៉ុល ពត។
យោងតាមរដ្ឋមន្ត្រីក្រសួងទេសចរណ៍ លោក ថោង ខុន ដែលបានប្រាប់បណ្តាញព័ត៌មាន Fresh News ថា ក្នុងរយៈពេល ១ថ្ងៃ (៧ មករា ២០២២) នៃថ្ងៃឈប់សម្រាកនាឱកាសខួប ៤៣ឆ្នាំ នៃទិវាជ័យជម្នះលើរបបប្រល័យពូជសាសន៍ ប៉ុល ពត ចំនួនភ្ញៀវទេសចរផ្ទៃក្នុងចេញដើរកម្សាន្តតាមរមណីយដ្ឋាននានា មានចំនួនសរុប ១៥៨ ៦៣០នាក់ ក្នុងនោះមានភ្ញៀវជាតិ ១៥៦ ៤៧៩នាក់ និងភ្ញៀវបរទេសផ្ទៃក្នុង ២ ១៥១នាក់។
បើតាមក្រសួងទេសចរណ៍ ទីតាំងសំខាន់ៗដែលទទួលភ្ញៀវច្រើនក្នុងថ្ងៃទី៧ ខែមករា ឆ្នាំ ២០២១ រួមមាន រាជធានីភ្នំពេញ ៥៥ ៨៤២នាក់, ខេត្តព្រះសីហនុ ១២ ៥៨៥នាក់, សៀមរាប ១០ ១៤៨នាក់, ពោធិ៍សាត់ ៩ ៨៦៣នាក់, មណ្ឌលគិរី ៩ ៤៩៧នាក់, បាត់ដំបង ៨ ៣៦៥នាក់, ស្ទឹងត្រែង ៨ ៣១០នាក់, កែប ៨ ១៣៥នាក់ និងខេត្តកំពត ៨ ០៨២នាក់។
លោក ថោង ខុន បានឱ្យដឹងថា ទោះបីថ្ងៃឈប់សម្រាកពិធីបុណ្យឆ្នាំសកល ទើបតែកន្លងផុតប៉ុន្តែចរន្តភ្ញៀវទេសចរផ្ទៃក្នុងនៅតែបង្ហាញសញ្ញារឹងមាំ។
ប្រធានសមាគមទីភ្នាក់ងារទេសចរណ៍កម្ពុជា លោកស្រី ឆាយ ស៊ីលីន បានប្រាប់ភ្នំពេញប៉ុស្តិ៍ថា ការសម្រេចបើកសង្គម-សេដ្ឋកិច្ច របស់រាជរដ្ឋាភិបាលកម្ពុជាចាប់តាំងពីពាក់កណ្តាលខែវិច្ឆិកា និងអត្រាដ៏ខ្ពស់នៃការចាក់វ៉ាក់សាំងប្រឆាំងនឹងជំងឺកូវីដ១៩ បានធ្វើឱ្យវិស័យទេសចរណ៍ផ្ទៃក្នុងកម្ពុជាចាប់ផ្តើមមានសម្ទុះឡើងវិញជាបន្តបន្ទាប់។
លោកស្រីបន្តថា ចរន្តភ្ញៀវទេសចរផ្ទៃក្នុងកំពុងរួមចំណែកក្នុងការប៉ះប៉ូវការបាត់បង់ដែលបណ្តាលមកពីការធ្លាក់ចុះយ៉ាងគំហុកនៃទេសចរអន្តរជាតិ។
លោកស្រីថា៖«អត្រាដ៏ច្រើននៃចំនួនប្រជាជនខ្មែរចាក់វ៉ាក់សាំងប្រឆាំងនឹងជំងឺកូវីដ១៩ ព្រមនឹងកំណើនសេដ្ឋកិច្ច នឹងធ្វើឱ្យចលានាទេសចរណ៍ក្នុងស្រុកមានចំនួនកាន់តែច្រើន»។
រយៈពេល ១១ខែ ឆ្នាំ ២០២១ ប្រទេសកម្ពុជា ទទួលបានភ្ញៀវទេសចរអន្តរជាតិ ១៩៦ ៤៩៥ នាក់ ធ្លាក់ចុះ ៨៥ ភាគរយ បើធៀបនឹងរយៈពេលដូចគ្នាឆ្នាំ ២០២០ ដែលមានចំនួន ១ ៣០៦ ១៤៣ នាក់។ នេះបើតាមទិន្នន័យរបស់ក្រសួងទេសចរណ៍៕