The Phnom Penh Post Search

Search form




Logo of Phnom Penh Post newspaper Phnom Penh Post - ការនាំចេញ​-​នាំចូល​រយៈពេល ១១ ​ខែ ​មាន​ទឹកប្រាក់​សរុប​ជាង ៣៦​ ពាន់​លាន​ដុល្លារ

ការនាំចេញ​-​នាំចូល​រយៈពេល ១១ ​ខែ ​មាន​ទឹកប្រាក់​សរុប​ជាង ៣៦​ ពាន់​លាន​ដុល្លារ

Content image - Phnom Penh Post
កុងតឺន័រ​ផ្ទុកទំនិញ​ជាច្រើន​នៅ​កំពង់ផែ​ស្វយ័ត​ក្រុងព្រះសីហនុ​។ ហេង ជីវ័ន

ការនាំចេញ​-​នាំចូល​រយៈពេល ១១ ​ខែ ​មាន​ទឹកប្រាក់​សរុប​ជាង ៣៦​ ពាន់​លាន​ដុល្លារ

ភ្នំពេញៈ ការផ្លាស់ប្តូរ​ពាណិជ្ជកម្ម​អន្តរជាតិ​របស់​កម្ពុជា​ (​ដក​មាស​) ក្នុង​រយៈពេល​ ១១ ​ខែ ឆ្នាំ​ ២០២១ សម្រេចបាន​ទឹកប្រាក់​ជាង ៣៦ ​ពាន់​លាន​ដុល្លារ ដោយ​ចំនួន​នេះ​កើនឡើង​ទាំង​ការ​នាំចូល និង​នាំចេញ​។ នេះ​បើតាម​ក្រសួង​សេដ្ឋកិច្ច និង​ហិរញ្ញវត្ថុ​។

យោងតាម​ទិន្នន័យ​ក្រសួង​សេដ្ឋកិច្ច និង​ហិរញ្ញវត្ថុ ចាប់ពី​ខែមករា ដល់​ខែវិច្ឆិកា ឆ្នាំ​ ២០២១ ការនាំចេញ​ទំនិញ ​(​ដក​មាស​ចេញ​) ពី​កម្ពុជា​ទៅ​ទីផ្សារ​អន្តរជាតិ មាន​ទឹកប្រាក់ ១៥ ៦១៣ ​លាន​ដុល្លារ កើន ២២,៦ ​ភាគរយ​បើ​ធៀប​រយៈពេល​ដូចគ្នា​ឆ្នាំ​ ២០២០​។ ការកើនឡើង​ចំនួន​ទឹកប្រាក់​នាំចូល​នេះ​បានមកពី​កំណើន​នៃ​ការនាំចេញ​ផលិតផល​វាយនភណ្ឌ​, កង់ និង​ទំនិញ​ផ្សេងៗ​ដូចជា គ្រឿងសង្ហារិម​, ស្បែក​សត្វ​មាន​រោម​, កៅស៊ូ​, ក្តារ​កុងប្លាកេ​, វត្ថុ​សម្រាប់​ជាងសំណង់​ធ្វើ​ពី​ប្លាស្ទិក​, សូឡា​, ខ្សែភ្លើង និង​គ្រឿង​ផ្គុំ​ខ្សែភ្លើង​, គ្រឿង​អេឡិចត្រូនិក និង​ភាគ​បំណែក​, ចេក​, ស្ករស​, កសិផល​ផ្សេងៗ​, ដំឡូងមី និង​ស្វាយ ជាដើម​។

ចំណែក​ការនាំ​ចូល​ទំនិញ​ (​ដក​មាស​ចេញ​) សម្រេចបាន​ក្នុង​ទំហំ​ទឹកប្រាក់ ២០,៤ ​ពាន់​លាន​ដុល្លារ កើន ​២៥,៣ ​ភាគរយ​ធៀប​នឹង​រយៈពេល​ដូចគ្នា​ឆ្នាំ​ ២០២០ ដោយសារ​កំណើន​នៃ​ការនាំចូល​ក្រណាត់​, គ្រឿងសំណង់​, ប្រេងឥន្ធនៈ និង​ទំនិញ​ផ្សេងៗ​។

ក្រសួង​សេដ្ឋកិច្ច និង​ហិរញ្ញវត្ថុ បានឱ្យដឹងថា បន្ទាប់ពី​ទទួលរង​ផលប៉ះពាល់​ពី​វិបត្តិ​ជំងឺ​កូវីដ​ ១៩ ជាពិសេស​ព្រឹត្តិការណ៍​សហគមន៍ ២០ ​កុម្ភៈ សេដ្ឋកិច្ច​ប្រទេស​កម្ពុជា​បានបង្ហាញ​ពី​ភាពប្រសើរ​ឡើងវិញ​បន្តិច​ម្តងៗ ប៉ុន្តែ​ពុំទាន់​អាច​វិល​រក​ភាពប្រក្រតី​ដូច​មុន​មាន​ការរីក​រាលដាល​ជំងឺ​កូវីដ​ ១៩ នៅឡើយ​ទេ ជាពិសេស​វិស័យ​មួយចំនួន​ដូចជា ទេសចរណ៍​, សំណង់ និង​ការ​បោះទុន​វិនិយោគ​ផ្ទាល់​ពី​បរទេស​។

ក្រសួង​សេដ្ឋកិច្ច និង​ហិរញ្ញវត្ថុ បាន​បញ្ជាក់ថា​៖ «​ជារួម​សេដ្ឋកិច្ចកម្ពុជា​រំពឹងថា នឹងមាន​កំណើន​វិជ្ជមាន​ក្នុង​ឆ្នាំ​ ២០២២ ដោយសារ​ការ​ងើប​ឡើងវិញ​នៃ​ស្ថានភាព​សេដ្ឋកិច្ច​សកល​, សេដ្ឋកិច្ច​ដៃគូ​ពាណិជ្ជកម្ម​របស់​កម្ពុជា និង​ការចូលរួម​ពី​ប្រជាជន​កម្ពុជា​ក្នុងការ​បំពេញ​កាតព្វកិច្ច​ចាក់​វ៉ាក់សាំង​ដើម្បី​ការពារ​ជំងឺ​កូវីដ​ ១៩»​។

អាមេរិក ជា​ទីផ្សារ​ទទួល​ទិញ​ទំនិញ​ពី​កម្ពុជា​ច្រើនជាងគេ ដោយមាន​ចំណែក​ទីផ្សារ ៤២,៨ ​ភាគរយ​, អឺរ៉ុប ១៨,៥ ​ភាគរយ​, ចិន ៨,៨ ​ភាគរយ​, ជប៉ុន ៦,៤ ​ភាគរយ​, អាស៊ាន ៦,៣ ​ភាគរយ អង់គ្លេស ៤,២ ​ភាគរយ និង​ប្រទេស​ផ្សេងៗ​ទៀត ១៣​ភាគរយ​។ នេះ​បើតាម​ក្រសួង​សេដ្ឋកិច្ច​។

អ្នកស្រាវជ្រាវ​សេដ្ឋកិច្ច​នៃ​រាជបណ្ឌិត្យ​សភា​កម្ពុជា លោក គី សេរីវឌ្ឍន៍ បាន​ប្រាប់​ភ្នំពេញ​ប៉ុស្តិ៍​កាលពី​ថ្ងៃទី​ ៩ ខែមករា ថា កំណើន​ទឹកប្រាក់​នាំចូល-​នាំចេញ​ទំនិញ គឺ​បញ្ជាក់​ពី​ភាពខ្លាំង​របស់​សកម្មភាព​ផលិតកម្ម និង​តម្រូវការ​នៅក្នុង​ស្រុក បន្ទាប់ពី​ប្រទេស​កម្ពុជា​អាច​គ្រប់គ្រង​បាន​ស្ទើរ​ទាំងស្រុង​ពី​ការរីករាលដាល​ជំងឺ​កូវីដ​ ១៩​។ កំណើន​នេះ​ក៏​ទទួលបាន​ពី​ភាព​អសកម្ម​នៅ​បណ្តា​ប្រទេស​ដែល​ផលិតផល​ទំនិញ​ដូច ឬ​ស្រដៀង​កម្ពុជា និង​ទំនាក់ទំនង​ល្អ​របស់​កម្ពុជា​ជាមួយនឹង​ប្រទេស​ដៃគូ​ពាណិជ្ជកម្ម​ផងដែរ​។

លោក​បន្ថែមទៀតថា សម្រាប់​ទំហំ​ទឹកប្រាក់​នាំចូល​ដែលមាន​ចំនួន​ច្រើនជាង​ការនាំចេញ វា​មិនមែនជា​ក្តីបារម្ភ​ទេ​សម្រាប់​សេដ្ឋកិច្ចកម្ពុជា ព្រោះ​ភាគច្រើន​នៃ​ទំនិញ​នាំចូល គឺជា​ផលិតផល ឬ​វត្ថុធាតុដើម​សម្រាប់​គាំទ្រ ឬ​ចូលរួម​ក្នុង​ចង្វាក់​ផលិតកម្ម​នាំចេញ​។

លោក​បាន​បញ្ជាក់ថា​៖ «​ចក្ខុវិស័យ​សម្រាប់​សេដ្ឋកិច្ច​កម្ពុជា​ក្នុង​ឆ្នាំ​ ២០២២ នេះ​នឹងមាន​សម្ទុះ​កើនឡើង​បន្ថែមទៀត​បើ​ធៀប​ឆ្នាំ ​២០២១ តាមរយៈ​កំណើន​សកម្មភាព​ផលិតកម្ម​ក្នុងស្រុក និង​ការនាំចេញ​»​។

នៅក្នុង​ឆ្នាំ​ ២០២០ ទំហំ​ពាណិជ្ជកម្ម​អន្តរជាតិ​របស់​កម្ពុជា​មាន​ទឹកប្រាក់​សរុប ៣៣ ១៤៣ ​លាន​ដុល្លារ ដោយ​ក្នុងនោះ​ការនាំចេញ​ទំនិញ​មាន​ទឹកប្រាក់ ១៤ ២០៤ ​លាន​ដុល្លារ ធ្លាក់ចុះ ១,១ ​ភាគរយ​ធៀប​នឹង​រយៈពេល​ដូចគ្នា​ឆ្នាំ​ ២០១៩ និង​ការ​នាំចូល​មាន​ទឹកប្រាក់ ១៨ ៩៣៩ ​លាន​ដុល្លារ ធ្លាក់ចុះ ៦,១ ​ភាគរយ​។ នេះ​បើ​យោងតាម​ក្រសួង​សេដ្ឋកិច្ច និង​ហិរញ្ញវត្ថុ​៕ LA

អត្ថបទគួរចាប់អារម្មណ៍

  • កោះកុងៈ កូនអណ្តើក​ហ្លួង​ចំនួន ៣០ ​ក្បាល​បាន​ញាស់​ចេញពី​សម្បុក​នៅលើ​ឆ្នេរ​ខ្សាច់​សិប្បនិម្មិត​ក្នុង​មជ្ឈមណ្ឌល​អភិរក្ស​សត្វ​ល្មូន​ខេត្តកោះកុង កាលពី​សប្តាហ៍​កន្លងទៅ ហើយ​នេះ​គឺជា​លើក​ទី​ ២ ​ហើយ ដែល​អណ្តើក​ហ្លួង​ចិញ្ចឹម​ក្នុង​មជ្ឈមណ្ឌល​នេះ​បាន​ពង​កូន​។ នេះ​បើតាម​អង្គការ​សមាគម​អភិរក្ស​សត្វព្រៃ​នៅ​កម្ពុជា (WCS)​។

  • ភ្នំពេញៈ ការបញ្ចូល​មីក្រូ​សារជាតិ​ក្នុង​អង្ករ គឺជា​ជំហាន​ចម្បង​មួយ​ក្នុងការ​ដោះស្រាយ​បញ្ហា​អាហារូបត្ថម្ភ​ក្នុង​ប្រទេស​កម្ពុជា ដែល​ប្រជាជន​ភាគច្រើន​ទទួលទាន​បាយ ក្នុង​បរិមាណ​ច្រើន​ជា​រៀងរាល់ថ្ងៃ​។ នេះ​បើតាម​មន្ត្រី​ក្រុមប្រឹក្សា​ស្តារ​អភិវឌ្ឍន៍​វិស័យ​កសិកម្ម និង​ជនបទ​។

  • ភ្នំពេញ: ក្នុង​ចំណោម​ភោជនីយដ្ឋាន​ពោរពេញ​ដោយ​សិល្បៈ​ចម្អិន​ម្ហូបអាហារ ការ​គិតគូរ​ពី​និរន្តរភាព​បរិស្ថាន​ភព​ផែន​ដី និង​បង្កប់​រឿង​រ៉ាវ​ប្រពៃណី​វប្បធម៌​ដ៏​អស្ចារ្យ​នៅ​អេស្ប៉ាញ ប៉េរូ​សហរដ្ឋអាមេរិក​ ថៃ ដាណឺម៉ាក​ នូវែលសេឡង់ ចិន ជប៉ុន អ៊ីតាលី និង​ម៉ិកស៊ិក អាហារ​នៅ​​ផ្ទះ​ប្រពៃណី​បុរាណ​មួយ​​​តាម​ដង​ទន្លេ​មេគង្គ

  • ភ្នំពេញៈ ទាំង​អ្នកនយោបាយ អ្នកវិភាគ និង​ស្ថាប័ន​គណៈកម្មាធិការ​ជាតិ​រៀបចំ​ការបោះឆ្នោត​បានចាត់ទុក​ដំណើរការ​ឃោសនា​រក​សំឡេងឆ្នោត ក្នុង​រយៈពេល ៣ ​ថ្ងៃ​របស់​គណបក្ស​នយោបាយ ដែល​បាន​ចុះបញ្ជី​បេក្ខជន​ចូលរួម​បោះឆ្នោត​ជ្រើសរើស​ក្រុមប្រឹក្សាឃុំ សង្កាត់​អាណត្តិ​ទី​ ៥ ដែល​នឹង​ប្រព្រឹត្តទៅ​នៅ​ថ្ងៃទី​ ៥ ខែមិថុនា ថា មាន​ភាពចាស់ទុំ​ផ្នែក​នយោបាយ និង​មិនមាន​អំពើហិង្សា​ណាមួយ​កើតឡើង​នោះ

  • ភ្នំពេញៈ សាលាឧទ្ធរណ៍​ភ្នំពេញ​នៅ​ថ្ងៃទី​ ២៣ ​ឧសភា បានប្រកាស​សាលដីកា​កំបាំង​មុខមន្ត្រី​សមាគម​ការពារ​សិទ្ធិមនុស្ស​អាដហុក​ ៤ ​រូប និង​អតីត​មន្ត្រី​ ១ ​រូប​ទៀត​សម្រេច​តម្កល់​សាលក្រម​របស់​សាលាដំបូង​រាជធានី​ភ្នំពេញ​ដដែល បន្ទាប់ពី​បាន​កាត់ក្តី​ឱ្យ​ពួកគេ​ជាប់ពន្ធនាគារ​ក្នុង​ម្នាក់​ ៥ ​ឆ្នាំ តែ​ឱ្យ​អនុវត្ត​ទោស ​១៤ ​ខែ​ពាក់ព័ន្ធ​បទចោទ​សូកប៉ាន់​សាក្សី និង​សមគំនិត​សូកប៉ាន់​សាក្សី​ដល់​ នាង ខុម ចាន់តារាទី ហៅ​ ស្រីមុំ​។

  • បន្ទាយមានជ័យៈ ក្នុង​មួយ​ថ្ងៃៗ​មាន​ប្រជាពលរដ្ឋ​នៅតាម​ព្រំដែន ជាពិសេស​ពលករ​ខ្មែរ​ពី ​៤០០ ទៅ​ ៥០០​ នាក់​បាន​ទៅ​ស្នើសុំ​ធ្វើ​បណ្ណ​ឆ្លងដែន ដើម្បី​បាន​ចូលទៅ​ធ្វើការ ឬ​លក់ដូរ​ស្របច្បាប់ នៅក្នុង​ប្រទេស​ថៃ បន្ទាប់ពី​ភាគី​ទាំង​ ២​ បាន​ឯកភាព​គ្នា​បើក​ច្រកព្រំដែន​ឡើងវិញ កាលពី​ថ្ងៃទី​ ១ ខែឧសភា ក្នុង​កម្រិត​ថ្នាក់​តំបន់​។