ភ្នំពេញៈ គម្រោងសាងសង់កំពង់ផែទេសចរណ៍អន្តរជាតិ នៅខេត្តកំពតមកដល់ពេលនេះសម្រេចបានប្រមាណ ៩០ ភាគរយហើយ ដោយគ្រោងបញ្ចប់នៅត្រឹមដំណាច់ខែមីនាខាងមុខ ខណៈគម្រោងមួយនេះនឹងរួមចំណែកយ៉ាងច្រើនក្នុងការជួយលើកកម្ពស់វិស័យទេសចរណ៍នៅកម្ពុជា ពិសេសរមណីយដ្ឋាននានាក្នុងខេត្តកំពត និងទិសដៅតំបន់ឆ្នេរផ្សេងៗទៀត។
លោក សុខ សុគុណ អគ្គនាយករងអភិវឌ្ឍន៍ទេសចរណ៍នៃក្រសួងទេសចរណ៍ បានឱ្យដឹងថា គម្រោងនេះមានការយឺតយ៉ាវខ្លះដែលបណ្តាលពីវិបត្តិនៃជំងឺកូវីដ ១៩ និងបញ្ហាអាកាសធាតុ ហើយត្រូវបានធនាគារអភិវឌ្ឍន៍អាស៊ី (ADB) ឯកភាពឱ្យពន្យារពេលអនុវត្តគម្រោងរហូតដល់ថ្ងៃទី ៣០ ខែមិថុនា ឆ្នាំ ២០២២ ប៉ុន្តែការសាងសង់ជាក់ស្តែងនឹងត្រូវបញ្ចប់ត្រឹមថ្ងៃទី ៣១ ខែមីនា ឆ្នាំ ២០២២។
គម្រោងសាងសង់កំពង់ផែនេះស្ថិតក្រោមហិរញ្ញប្បទានធនាគារអភិវឌ្ឍន៍អាស៊ី (ADB) ដែលជាចំណែកមួយនៃគម្រោងអភិវឌ្ឍន៍ហេដ្ឋារចនាសម្ព័ន្ធទេសចរណ៍សម្រាប់ការរីកចម្រើនប្រកបដោយចីរភាពក្នុងមហាអនុតំបន់មេគង្គ (GMS)។ ការសាងសង់បានចាប់ផ្តើមកាលពីថ្ងៃទី ៨ ខែសីហា ឆ្នាំ ២០១៨ ដែលអនុវត្តដោយអង្គភាព គ្រប់គ្រងគម្រោងរបស់ក្រសួងសាធារណការ និងដឹកជញ្ជូន។
បើតាមលោក សុគុណ តាមផែនការដំបូង គម្រោងនេះត្រូវបញ្ចប់តាំងពីពាក់កណ្តាលខែវិច្ឆិកា ឆ្នាំ ២០២១។
លោក សុគុណ និយាយថា៖ «កំពង់ផែទេសចរណ៍អន្តរជាតិនេះនឹងក្លាយជាច្រកសមុទ្រអន្តរជាតិដ៏សំខាន់ដែលតភ្ជាប់ឆ្នេរសមុទ្រភាគខាងត្បូងរបស់ប្រទេសកម្ពុជា ពីខេត្តកំពតទៅកាន់ពិភពលោក។ ម្យ៉ាងទៀតកំពង់ផែនេះក៏នឹងលើកស្ទួយវិស័យទេសចរណ៍កម្ពុជាថែមទៀត ជាពិសេសរមណីយដ្ឋាននានាក្នុងខេត្តកំពត និងទិសដៅតំបន់ឆ្នេរផ្សេងៗទៀត»។
ប្រធានមន្ទីរទេសចរណ៍ខេត្តកំពត លោក សយ ស៊ីណុល ប្រាប់ភ្នំពេញប៉ុស្តិ៍ថា ក្រោយពេលបញ្ចប់ការសាងសង់ និងដាក់ឱ្យដំណើរការ ជាពិសេសក្រោយស្ថានភាពជំងឺកូវីដ ១៩ មានស្ថានភាពល្អប្រសើរ កំពង់ផែនេះនឹងរួមចំណែកយ៉ាងច្រើនក្នុងការទាក់ទាញភ្ញៀវទេសចរពីប្រទេសជិតខាងឱ្យចូលមកកម្សាន្តនៅកម្ពុជា។
លោកបន្តថា ក្នុងខេត្តកំពត មិនទាន់មានទេសចរណ៍ផ្លូវទឹកទេ ដូច្នេះវត្តមានកំពង់ផែនេះនឹងជួយឱ្យមានការផ្លាស់ប្តូរ។
លោកថ្លែងថា៖ «តាមរយៈនេះខ្ញុំសង្ឃឹមថា ភ្ញៀវទេសចរនឹងធ្វើដំណើរតាមផ្លូវទឹកមកកាន់ខេត្តកំពតច្រើន ព្រោះនៅខេត្តកំពតមានកន្លែងស្នាក់នៅ និងគោលដៅទេសចរណ៍ច្រើន»។
បើតាម លោក ស៊ីណុល នៅពេលមានភ្ញៀវទេសចរប្រទេសជិតខាង និងក្នុងតំបន់ មកកាន់ខេត្តកំពតវានឹងរួមចំណែកផ្តល់ឱកាសការងារ ប្រាក់ចំណូលនិងសេដ្ឋកិច្ចខេត្តផងដែរ។
លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា បានស្វាគមន៍ការសាងសង់កំពង់ផែនេះ ដែលអាចបម្រើឱ្យទេសចរណ៍តាមផ្លូវទឹក ព្រោះនៅកម្ពុជាបច្ចុប្បន្ន មិនមានកំពង់ផែច្រើនទេ ដែលធ្វើឱ្យមានការអភិវឌ្ឍយឺតនៅតាមតំបន់កោះមួយចំនួន។
លោកបន្តថា បើរដ្ឋាភិបាលមានផែនការក្នុងការភ្ជាប់កំពង់ផែនេះទៅកោះផ្សេងៗទៀតនៅខេត្តព្រះសីហនុ និងកោះកុង វានឹងជួយឱ្យមានដំណើរជើងទឹកកាន់តែច្រើនថែមទៀត។ ដូច្នេះការអភិវឌ្ឍកំពង់ផែនេះនឹងធ្វើឱ្យចរន្តធ្វើដំណើរកើនឡើង និងទាក់ទាញទេសចរណ៍ពីតំបន់ និងអន្តរជាតិទៀតផង។
លោកនិយាយថា៖ «មិនថាមាន ២ ឬ ៣ ទេសំខាន់មានកាន់តែច្រើនកាន់តែល្អ ព្រោះវាធ្វើឱ្យចរន្តចរាចរណ៍កាន់តែកើនឡើង និងធ្វើឱ្យចំណូលសេដ្ឋកិច្ច និងមនុស្សអ៊ូអរថែមមួយកម្រិត។ ក្រៅពីការតភ្ជាប់ក្នុងស្រុក យើងគួរតភ្ជាប់កិច្ចសហប្រតិបត្តិការទេសចរណ៍ជាមួយប្រទេសវៀតណាម (កោះត្រល់) និងថៃ ឱ្យបានច្រើន គឺជាការល្អថែមទៀត»៕ LA