.jpg)
ថ្នាក់ដឹកនាំរបស់ BIDC និងថ្នាក់ដឹកនាំរបស់ Sonatra Group ពេលចុះកិច្ចព្រមព្រៀង។ រូបថត សហការី
ភ្នំពេញៈ ធនាគារពាណិជ្ជ BIDC និងក្រុមហ៊ុន Sonatra Group បានចុះកិច្ចព្រមព្រៀងសហប្រតិបត្តិការលើការផ្តល់សេវាធនាគារ និងឥណទានដំណាក់កាលដំបូង ៣៥ លានដុល្លារសម្រាប់អ្នកទិញផ្ទះ ដើម្បីការលើកកម្ពស់សកម្មភាពអាជីវកម្មគាំទ្រ និងបំពេញតម្រូវការរបស់ប្រជាជនកម្ពុជាក្នុងការធ្វើជាម្ចាស់គេហដ្ឋានទំនើប។
ការចុះហត្ថលេខាលើកិច្ចព្រមព្រៀងសហប្រតិបត្តិការនេះធ្វើឡើងកាលពីថ្ងៃទី ៥ ខែមករា ឆ្នាំ ២០២២ រវាងលោក Lam Van Hai អគ្គនាយកធនាគារវិនិយោគ និងអភិវឌ្ឍន៍កម្ពុជា (BIDC) និងលោក ស៊ន សុខណា ប្រធានក្រុមហ៊ុន Sonatra Group។
ការចុះហត្ថលេខានេះ គឺជាសញ្ញាថ្មីក្នុងសកម្មភាពអាជីវកម្មរបស់ធនាគារ BIDC និងក្រុមហ៊ុន Sonatra Group ដែលបានអនុវត្តចាប់ពីថ្ងៃដំបូងក្នុងឆ្នាំ ២០២២។ កិច្ចព្រមព្រៀងនេះបង្ហាញពីការខិតខំប្រឹងប្រែងរបស់ភាគីទាំង ២ ក្នុងការលើកកម្ពស់សកម្មភាពអាជីវកម្ម ការគាំទ្រ និងបំពេញតម្រូវការរបស់ប្រជាជនកម្ពុជាក្នុងការធ្វើជាម្ចាស់គេហដ្ឋានទំនើប។
កិច្ចព្រមព្រៀងសហប្រតិបត្តិការនេះត្រូវបានរំពឹងថា នឹងនាំឱ្យដៃគូទាំង ២ ឈានដល់ការអភិវឌ្ឍកម្រិតថ្មីៗលើវិស័យជាច្រើន ដែលភាគីនីមួយៗនឹងទទួលបានអត្ថប្រយោជន៍រួមចំណែកដល់ការអភិវឌ្ឍទីផ្សារអចលនទ្រព្យ និងទីផ្សារហិរញ្ញវត្ថុប្រទេសកម្ពុជាបន្ថែមទៀតនាពេលខាងមុខ។
សេចក្តីប្រកាសព័ត៌មានភ្នំពេញប៉ុស្តិ៍ទទួលបានកាលពីថ្ងៃទី ៩ ខែមករា ឱ្យដឹងថា ភាគីទាំង ២ បានប្តេជ្ញានឹងពង្រឹងកិច្ចសហប្រតិបត្តិការឆ្ពោះទៅរកគោលដៅនៃការក្លាយជាដៃគូយុទ្ធសាស្ត្រគ្រប់ជ្រុងជ្រោយ ធានាកិច្ចសហប្រតិបត្តិការរយៈពេលវែង និងនិរន្តរភាពដោយពឹងផ្អែកលើការផ្ដល់អត្ថប្រយោជន៍ឱ្យគ្នាទៅវិញទៅមក។
សេចក្តីប្រកាសព័ត៌មានបន្តទៀតថា អាស្រ័យហេតុនេះធនាគារ BIDC ផ្តល់ការកម្រិតប្រាក់កម្ចីរហូតទៅដល់ ៣៥ លានដុល្លារសម្រាប់អ្នកទិញផ្ទះនៅគម្រោងបុរី Borey Sonatra ដែលមានផ្ទៃដីរាប់រយហិកតានៅភូមិកោះក្របី សង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ ហើយនឹងបង្កើននៅដំណាក់កាលជាបន្តបន្ទាប់ទៀត។
BIDC ក៏នឹងផ្តល់គោលការណ៍អនុគ្រោះសម្រាប់ប្រាក់កម្ចីទាក់ទងនឹងអត្រាការប្រាក់ (ចាប់ពី ៧ ភាគរយក្នុង ១ ឆ្នាំ) រយៈពេលអនុគ្រោះ (១ ឆ្នាំ) រយៈពេលកម្ចី (២០ ឆ្នាំ) វត្ថុបញ្ចាំជាកិច្ចសន្យាទិញ និងរយៈពេលអនុម័តឆាប់រហ័ស។ ក្រុមហ៊ុន Sonatra Group ប្តេជ្ញាថា នឹងបង្កើនការប្រើប្រាស់យ៉ាងពេញលេញនូវសេវាកម្មធនាគារហិរញ្ញវត្ថុ និងធានារ៉ាប់រងដែលផ្តល់ដោយធនាគារ BIDC និងក្រុមហ៊ុនធានារ៉ាប់រង CVI Insurance Company (ក្រុមហ៊ុនបុត្រសម្ព័ន្ធរបស់ធនាគារ BIDC)។
ជាមួយគ្នានេះក្រុមហ៊ុន Sonatra នឹងជួយសម្រួលដល់ការប្រឹក្សាយោល់ និងណែនាំអតិថិជនឱ្យប្រើប្រាស់សេវាធនាគារ និងយកប្រាក់កម្ចីនៅធនាគារ BIDC និងប្តេជ្ញាធានារយៈពេលវែងនូវអត្ថប្រយោជន៍សម្រាប់អ្នកទិញផ្ទះក៏ដូចជាសម្រាប់ធនាគារ BIDC ផងដែរ។
លោក ឃាង ពុទ្ធី ប្រធានសមាគមអចលនទ្រព្យកម្ពុជា (CREA) បានប្រាប់ភ្នំពេញប៉ុស្តិ៍កាលពីថ្ងៃទី ៩ ខែមករាថា ក្រុមហ៊ុនអភិវឌ្ឍន៍អចលនទ្រព្យ និងវិស័យធនាគារដែលចុះកិច្ចព្រមព្រៀងលើកិច្ចសហប្រតិបត្តិការនេះផ្តល់កម្ចីសម្រាប់អ្នកទិញផ្ទះ គឺល្អសម្រាប់គ្រប់ភាគី ព្រោះពួកគេនឹងទទួលបានអត្ថប្រយោជន៍ដូចគ្នា។
លោកបានបន្តថា បច្ចុប្បន្នក្រុមហ៊ុនអភិវឌ្ឍន៍អចលនទ្រព្យ ធនាគារ និងប្រជាពលរដ្ឋ បានយល់ដឹងអំពីហានិភ័យនៃការបង់រំលស់ផ្ទាល់ចំពោះក្រុមហ៊ុនអភិវឌ្ឍន៍អចលនទ្រព្យ ដូច្នេះហើយទើបពួកគេសម្រេចចិត្តសហការគ្នាដើម្បីទទួលបានអត្ថប្រយោជន៍ដូចគ្នា ជាពិសេសធានាបានអត្រាការប្រាក់ល្អ និងប្លង់ផ្ទះស្របច្បាប់ចំពោះអ្នកទិញផ្ទះ។
លោកបានថ្លែងថា៖ «យើងឃើញថាធនាគារទទួលបានអត្ថប្រយោជន៍ ហើយក្រុមហ៊ុនអភិវឌ្ឍន៍ក៏ទទួលបានអត្ថប្រយោជន៍ដែរ ដោយពួកគេទទួលបានហិរញ្ញវត្ថុកាន់តែលឿន ដើម្បីអភិវឌ្ឍគម្រោងផ្សេងទៀត ហើយអ្នកទិញផ្ទះក៏ទទួលបានអត្ថប្រយោជន៍ផងដែរ ដោយសារពួកគេទទួលបានអត្រាការប្រាក់ទាបជាងគេ»។
លោកបន្ថែមថា៖ «ប្រសិនបើពួកគេទូទាត់ដោយការបង់រំលស់ជាមួយនឹងក្រុមហ៊ុនអភិវឌ្ឍន៍ពួកគេនឹងត្រូវបង់ ១ ភាគរយក្នុង ១ ខែដែលស្មើនឹង ១២ ភាគរយក្នុង ១ ឆ្នាំ ប៉ុន្តែបើពួកគេទូទាត់ដោយការបង់រំលស់ជាមួយនឹងធនាគារ គឺត្រឹម ៧-៨ ភាគរយប៉ុណ្ណោះក្នុង ១ ឆ្នាំ ដែលមានអត្រាការប្រាក់កាន់តែទាប»។
យោងតាមសេចក្តីប្រកាសព័ត៌មាន BIDC បច្ចុប្បន្នគឺជាធនាគារឈានមុខគេមួយនៅកម្ពុជាដែលមានដើមទុន ១០០ លានដុល្លារ និងទ្រព្យសកម្មសរុបប្រហែល ៨៥០ លានដុល្លារ។ ឥណទានមានចំនួនជាង ៦០០ លានដុល្លារ។ ប្រព័ន្ធបណ្តាញនេះមាន ៩ សាខានៅក្នុងតំបន់សេដ្ឋកិច្ចសំខាន់ៗ នៅប្រទេសកម្ពុជា និងវៀតណាម។ ក្នុងអំឡុងពេលកន្លងមកធនាគារនេះតែងតែជាចំណុចស្នូលនៃការរៀបចំការផ្តល់សេវាឥណទាន និងធនាគារសម្រាប់គម្រោងធំៗ និងដៃគូជាច្រើន នៅក្នុងប្រទេសកម្ពុជា។
ចំណែកក្រុមហ៊ុន Sonatra Group បច្ចុប្បន្នកំពុងប្រតិបត្តិការលើវិស័យជាច្រើនតាមរយៈក្រុមហ៊ុនបុត្រសម្ព័ន្ធចំនួន ១៣ ដែលប្រតិបត្តិការដូចជា អចលនទ្រព្យ ហិរញ្ញវត្ថុ ភោជនីយដ្ឋាន មូលបត្រ និងកសិកម្ម៕ LA
