.jpg)
លោក ស៊ូ សុជាតិ អគ្គនាយកនិយតករមូលបត្រកម្ពុជា (SERC)។ ហេង ជីវ័ន
ភ្នំពេញៈ និយតករមូលបត្រកម្ពុជា (ន. ម.ក.) បានស្នើឱ្យក្រុមហ៊ុនសាជីវកម្មធានាឥណទានកម្ពុជា (CGCC) និងសាជីវកម្មធានាឥណទាន និងវិនិយោគ (CGIF) សហការគ្នា ដើម្បីលើកកម្ពស់ដល់យន្តការធានាឥណទានក្នុងគោលដៅអភិវឌ្ឍន៍ទីផ្សារមូលបត្របំណុលនៅកម្ពុជា។
លោក ស៊ូ សុជាតិ អគ្គនាយកនិយតករមូលបត្រកម្ពុជា (SERC) បានប្រាប់ភ្នំពេញ-ប៉ុស្តិ៍ថា កិច្ចប្រជុំតាមប្រព័ន្ធអនឡាញកាលពីថ្ងៃទី ១០ ខែមករា គឺជាការបើកច្រក និងសម្របសម្រួលឱ្យក្រុមហ៊ុនធានាឥណទាន ២ បើកកិច្ចសហការគ្នាលើការធានាឥណទានលើមូលបត្របំណុល ដើម្បីធ្វើឱ្យទីផ្សារមូលបត្របំណុលនៅកម្ពុជាកាន់តែមានសម្ទុះថែមទៀត។
ទោះបីជាយ៉ាងណា លោក សុជាតិ បញ្ជាក់ថា ការប្រជុំនេះនៅមិនទាន់ទទួលបានលទ្ធផលផ្លែផ្កាអ្វីនៅឡើយទេ ព្រោះនិយតករមូលបត្រកម្ពុជាគ្រាន់តែសម្របសម្រួល ដើម្បីឱ្យមានកិច្ចសហការកើតឡើង ប៉ុន្តែការសហការតាមរបៀបណា ឬបន្តធ្វើការងារយ៉ាងណាទៀតនោះក្រុមហ៊ុនទាំង ២ នឹងបន្តកិច្ចពិភាក្សាជាមួយគ្នាបន្ថែមនៅពេលក្រោយ។
លោកបន្ថែមថា៖ «នៅក្នុងឆ្នាំ ២០២២ នេះមានសញ្ញាវិជ្ជមានល្អ ដោយសារមានការបញ្ជាក់ពីក្រសួងសេដ្ឋកិច្ច និងហិរញ្ញវត្ថុថា នឹងមានការបោះផ្សាយសញ្ញាបណ្ណរដ្ឋ ក្នុងឆ្នាំ ២០២២ ហើយជាមួយគ្នានេះទំនោរពីខាងវិស័យឯកជនក៏មានសម្ទុះនៃការរៀបចំបោះផ្សាយលក់សញ្ញាបណ្ណនេះផងដែរ ដូចនេះមានសញ្ញាវិជ្ជមានច្រើន ដោយទំហំនៃការបោះផ្សាយក៏នឹងមានច្រើនដែរ»។
លោក ហុង សុហួរ អគ្គនាយកនៃក្រុមហ៊ុនផ្សារមូលបត្រកម្ពុជា (CSX) ប្រាប់ថា ការជួញដូរជាមធ្យមប្រចាំថ្ងៃរបស់ក្រុមហ៊ុនផ្សារមូលបត្រកម្ពុជា ក្នុងឆ្នាំ ២០២១ បានកើនឡើងពី ១១ ម៉ឺនដុល្លារដល់ ២៧ ម៉ឺនដុល្លារក្នុងមួយថ្ងៃ កើន ១៤៥ ភាគរយធៀបនឹងឆ្នាំ ២០២០ ខណៈថ្នាក់ដឹកនាំក្រុមហ៊ុនផ្សារមូលបត្រកម្ពុជារំពឹងថានឹងមានក្រុមហ៊ុនថ្មីចំនួន ៥ ចុះបញ្ជីនៅផ្សារមូលបត្រកម្ពុជាក្នុងឆ្នាំនេះ បើទោះបីកាលពីឆ្នាំ ២០២១ មានក្រុមហ៊ុនចុះបញ្ជីត្រឹមតែ ២ ក៏ដោយ។
លោកបន្តទៀតថា កាលពីឆ្នាំ ២០២១ គណនីដែលបានបើកមានប្រមាណ ៨ ពាន់គណនី ដែលចំនួននេះនឹងមានកំណើនជាបន្តបន្ទាប់ទៀត។
លោកប្រាប់ទៀតថា ទោះបីកាលពីឆ្នាំមុន មានក្រុមហ៊ុនចុះបញ្ជីត្រឹមតែចំនួន ២ ដែលទាបជាងការរំពឹងទុកឆ្ងាយក៏ពិតមែន ប៉ុន្តែការចាប់អារម្មណ៍របស់សាធារណជនគឺមានការកើនឡើង ព្រោះឃើញថា ចំនួនអ្នកបើកគណនីកើនឡើងខ្លាំង ដូចនេះនៅពេលមានក្រុមហ៊ុនថ្មីៗចុះបញ្ជីនៅឆ្នាំនេះថែមទៀត វានឹងធ្វើឱ្យផ្សារមូលបត្រកម្ពុជា កាន់តែមានភាពគគ្រឹកគគ្រេងជាមិនខាន។
លោកបញ្ជាក់ថា៖ «យើងរំពឹងថា នឹងមានក្រុមហ៊ុនថ្មីចំនួន ៥ ទៀត (បោះផ្សាយលក់ភាគហ៊ុន និងសញ្ញាបណ្ណ) ចុះបញ្ជីនៅផ្សារមូលបត្រកម្ពុជានៅឆ្នាំនេះ ហើយឆាប់ៗនេះយើងនឹងទទួលបានក្រុមហ៊ុនមួយទៀត ដូចនេះគោលដៅរបស់យើង ក្នុងការសម្រេចឱ្យបាននូវទំហំជួញដូរក្នុង ១ ថ្ងៃឱ្យបាន ១ លានដុល្លារក្នុងរយៈពេល ៣ ទៅ ៤ ឆ្នាំខាងមុខ គឺមានទំនោរអាចសម្រេចបាន»។
បើតាមអគ្គនាយកនិយតករមូលបត្រកម្ពុជា ទោះមានការរីករាលដាលជំងឺកូវីដ ១៩ កាលពីឆ្នាំ ២០២១ ក៏ផ្សារហ៊ុនកម្ពុជា (CSX) បានឃើញពីការបោះផ្សាយលក់មូលបត្រកម្មសិទ្ធិលើកដំបូងជាសាធារណៈ (IPO) របស់សហគ្រាសធុនតូច និងមធ្យម ដែលមិនធ្លាប់មាន ដោយបានចុះបញ្ជីលើទីផ្សារកំណើន។ គិតត្រឹមឆ្នាំ ២០២១ មានក្រុមហ៊ុនចុះបញ្ជីនៅលើទីផ្សារកំណើនចំនួន ១៥ ដែលក្នុងនោះក្រុមហ៊ុនចំនួន ៨ បានចុះបញ្ជីមូលបត្រកម្មសិទ្ធិ និងក្រុមហ៊ុនផ្សេងៗទៀតចុះបញ្ជីសញ្ញាបណ្ណសាជីវកម្ម។ នៅក្នុងឆ្នាំ ២០២១ ផ្សារមូលបត្រកម្ពុជា ប្រមូលមូលនិធិបានចំនួនប្រហែល ២៧៧,៧៩ លានដុល្លារ៕ LA
