.jpg)
ធនធានមនុស្សដែលមានចំណេះដឹងផ្នែកឌីជីថល និងមានតម្រូវការកាន់តែខ្ពស់។
អស់រយៈពេលជាច្រើនសតវត្សរ៍មកហើយ ការអប់រំផ្ដោតសំខាន់ទៅលើមធ្យោបាយបំពាក់បំប៉នមនុស្សជំនាន់ក្រោយឱ្យមានជំនាញ និងចំណេះដឹងជាមូលដ្ឋានសម្រាប់ការប្រកបរបរចិញ្ចឹមជីវិត ប៉ុន្តែនៅពេលដែលឧស្សាហកម្មមានការវិវឌ្ឍឥតឈប់ឈរការអប់រំបែបប្រពៃណីគឺលែងគ្រប់គ្រាន់ទៀតហើយ។
មនុស្សវ័យក្មេងគឺជាកម្លាំងពលកម្មនាពេលអនាគតរបស់ប្រទេសនីមួយៗ ហើយការវិនិយោគបរទេស គឺពឹងផ្អែកលើធនធានមនុស្សដែលអាចរកបាន។ កម្ពុជាគឺជាប្រទេសកំពុងអភិវឌ្ឍន៍ដែលត្រូវការចាំបាច់បំផុតនូវធនធានមនុស្សកាន់តែច្រើនបន្ថែមទៀត។ ជាមួយនឹងវិនិយោគបរទេស អនាគតរបស់ប្រទេសនេះមានសក្ដានុពលខ្លាំង ប្រសិនបើខ្លួនអាចសម្របទៅតាមបដិវត្តន៍ឧស្សាហកម្មទាំងឡាយ។
នាពេលកន្លងមក ពិភពលោកបានឆ្លងកាត់ដំណាក់កាលបដិវត្តន៍ឧស្សាហកម្មជាច្រើនដូចជា៖
• បដិវត្តន៍ឧស្សាហកម្មលើកទី ១ បានចាប់ផ្ដើមឡើងជាមួយនឹងការបង្កើតនូវម៉ាស៊ីនប្រើចំហាយទឹក ដែលគេប្រើប្រាស់ទៅលើការផលិតផលិតផលជាច្រើននៅតាមរោងចក្រ។
• បដិវត្តន៍ឧស្សាហកម្មលើកទី ២ គឺជារបកគំហើញថ្មីផ្នែកឧស្សាហកម្មនៅក្នុងផលិតកម្មដែលមានបរិមាណធំៗ ជាមួយនឹងការប្រើប្រាស់អគ្គិសនី ឥន្ធនៈ និងការផលិតដែកថែបកម្រិតខ្ពស់។
• បដិវត្តន៍ឧស្សាហកម្មលើកទី ៣ គឺជាការចាប់ផ្ដើមនៃយុគឌីជីថលដែលជាសម័យកាលមួយដែលគេចាប់ផ្ដើមប្រើប្រាស់កុំព្យូទ័រ អ៊ីនធឺណិត និងបណ្ដាញទូរស័ព្ទចល័ត។
• បដិវត្តន៍ឧស្សាហកម្មលើកទី ៤ គឺជាអនុផលនៃបច្ចេកវិទ្យាជំនាន់ទី ៣ ដែលជាការធ្វើស្វ័យប្រវត្តិកម្មដោយប្រព័ន្ធកុំព្យូទ័រ និងមនុស្សយន្ត ដើម្បីបំពេញទៅតាមសេចក្ដីត្រូវការជាបុគ្គល។
ប្រព័ន្ធអប់រំជាប្រពៃណីផលិតនូវជំនាញ និងចំណេះដឹងដែលប្រព័ន្ធនោះរំពឹងចង់ឱ្យអ្នកសម្រេចឱ្យបាន។ ការអប់រំប្រភេទនេះបង្កើតបាននូវធនធានមនុស្សទូទៅធម្មតា ដែលមិនមានសមត្ថភាពសម្របខ្លួនទៅតាមបដិវត្តន៍ឧស្សាហកម្មបន្ទាប់នាពេលខាងមុខនោះឡើយ ដូចជាមនុស្សយន្តដែលគេបញ្ជាដោយកម្មវិធីកុំព្យូទ័រ និងការប្រើប្រាស់ AI នៅក្នុងវិស័យធ្វើដំណើរ ផលិតកម្ម និងការដឹកជញ្ជូនទំនិញ ជាដើម។
ចំណេះធ្វើផ្នែកឌីជីថលនឹងមានសារៈសំខាន់កាន់តែខ្លាំង ពីព្រោះពិភពលោកនឹងប្រែប្រួល។ បច្ចេកវិទ្យា គឺជាសសរស្ដម្ភនៅក្នុងការកំណត់អនាគត។ ភាពប្រឈម គឺការអភិវឌ្ឍជំនាញឌីជីថលរបស់សិស្សនិស្សិត ដើម្បីឱ្យពួកគេអាចប្រើប្រាស់ជំនាញឌីជីថលទាំងនេះបាននៅពេលដែលពួកគេចូលក្នុងកម្លាំងពលកម្ម។
SIS Cambodia ជាប្រព័ន្ធដែលធ្វើឌីជីថលូបនីយកម្មការអប់រំសម្រាប់សាលារៀនទាំងអស់នៅកម្ពុជា។ កម្មវិធីនេះមានបំណងប្រែក្លាយសាលារៀនបែបប្រពៃណីឱ្យទៅជាកម្មវិធីអនឡាញដ៏ទំនើបទាន់សម័យ។
នៅក្នុងដំណាក់កាលដំបូងៗ កម្មវិធីនេះផ្ដោតទៅលើវិស័យបច្ចេកវិទ្យាចំនួន ៥ គឺ ទី ១ ព័ត៌មាន និងទិន្នន័យ, ទី ២ ទំនាក់ទំនង និងកិច្ចសហប្រតិបត្តិការ, ទី ៣ ការបង្កើតមាតិកា, ទី ៤ ការការពារ និងសន្តិសុខ និងទី ៥ គឺបរិយាកាសឌីជីថល។
ជាមួយនឹងអំណះអំណាងដូចបានរៀបរាប់ទាំងនេះ ឥឡូវនេះជាពេលវេលាដ៏សំខាន់ក្នុងការងាកមកណែនាំបច្ចេកវិទ្យាឌីជីថលដល់សិស្សានុសិស្សក្នុងលក្ខណៈមួយដែលងាយស្រួលប្រើជាទីបំផុត និងមិនធ្វើឱ្យសិស្សភ័យខ្លាច។ ជាមួយនឹងការអប់រំបែបឌីជីថល និង SIS Cambodia សិស្សានុសិស្សគ្រប់រូបអាចសម្រេចក្ដីសុបិនរបស់ពួកគេតាមអនឡាញបាន។
ក្រសួងអប់រំ យុវជន និងកីឡាបានចាប់ដៃគូសហការជាមួយក្រុមហ៊ុន មិត្តហ្វូន ដើម្បីធ្វើឌីជីថលូបនីយកម្មការអប់រំ និងជំរុញសាលារៀនទាំងអស់ឱ្យងាកមករកប្រព័ន្ធអនឡាញ។
មិត្តហ្វូនបានចែកចាយស៊ីមកាតដែលអាចប្រើអ៊ីនធឺណិតដោយមិនគិតថ្លៃ ហើយកម្មវិធី SIS Cambodia អាចដោនឡូតចូលទូរស័ព្ទដៃបានយ៉ាងងាយស្រួលជាទីបំផុត បន្ទាប់មកកម្មវិធីសិក្សារបស់សាលានឹងត្រូវដាក់បញ្ចូលនៅក្នុងកម្មវិធីនេះ ដើម្បីជួយសម្រាលបន្ទុកការចំណាយរបស់សិស្សានុសិស្សមកពីគ្រួសារដែលមានជីវភាពមិនសូវធូរធារ៕
