ការកើនឡើងទិន្នផលសញ្ញាបណ្ណបាន និងកំពុងទាញការចាប់អារម្មណ៍ពីអ្នកជួញដូរចេញពីការទិញមាស ដែលជាលោហធាតុមានតម្លៃសំខាន់ធៀបទៅនឹងរូបិយប័ណ្ណដុល្លារអាមេរិក ខណៈពេលដែលទិសដៅកើនឡើងនៅតែអាចកើតមាន បើផ្អែកទៅតាមការវិភាគផ្នែកបច្ចេកទេស។
Kitco News បានរាយការណ៍កាលពីថ្ងៃចន្ទថា គិតត្រឹមសប្តាហ៍ទី ២ នៃឆ្នាំ ២០២២ តម្លៃមាសបានកំពុងជួបឧបសគ្គធំៗ ២ គឺការកើនឡើងទិន្នផលរតនាគារសហរដ្ឋអាមេរិក និងការរឹតបន្តឹងគោលនយោបាយចាក់បញ្ចូលសាច់ប្រាក់ទៅក្នុងទីផ្សាររបស់ធនាគារកណ្ដាលសហរដ្ឋអាមេរិក។ ក្នុងការឆ្លើយតបទៅនឹងទំនោរខ្ពស់នៃការដំឡើងអត្រាការប្រាក់ ទិន្នផលសញ្ញាបណ្ណបានកើនឡើងដល់កម្រិតកំពូលក្នុងរយៈពេលជាច្រើនឆ្នាំ និងកំពុងបន្ថែមសម្ពាធទៅលើតម្លៃមាស។ ការកើនឡើងទិន្នផលសញ្ញាបណ្ណរដ្ឋាភិបាលបានធ្វើឱ្យតម្លៃមាសធ្លាក់ចុះពី ១ ៨៣០ ទៅ ១ ៧៨២ ដុល្លារក្នុង ១ អោនស៍ កាលពីថ្ងៃចន្ទ ដោយបង្កើតបានតម្លៃមធ្យមត្រឹម ១ ៨០០ ដុល្លារ។
តាមលក្ខណៈបច្ចេកទេសវិញ តម្លៃមាសនៅតែប្រែប្រួលប្រចាំសប្តាហ៍ក្នុងចន្លោះពី ១ ៧៦២ ទៅ ១ ៨៣០ ដុល្លារក្នុង ១ អោនស៍ ដែលបង្ហាញថាទីផ្សារមិនទាន់បំបែកទៅរកទំនោរមួយណានៅឡើយទេ។ នៅក្នុងតារាងតម្លៃប្រចាំថ្ងៃវិញ តម្លៃមាសក៏នៅមិនទាន់បង្ហាញទំនោរឡើង ឬចុះដែរ ប៉ុន្ដែទម្រង់ Symmetric Triangle កាន់តែតូចជាងមុន ដែលរង់ចាំការបំបែកចេញ ដែលមានន័យថាទីផ្សារអាចបំបែកទៅរបារតម្លៃតម្លៃទាប ឬរបារតម្លៃខ្ពស់។
ដូច្នេះសម្រាប់ការវិភាគជួញដូរក្នុងសប្តាហ៍នេះ អ្នកជួញដូរអាចពិចារណាលក់មាសក្នុងតម្លៃ ១ ៨២០ ដុល្លារ ដោយកំណត់មុខងារកាត់យកប្រាក់ចំណេញនៅតម្លៃ ១ ៨០២ ដុល្លារ និងមុខងារបញ្ឈប់ហានិភ័យនៅតម្លៃ ១ ៨៣១ ដុល្លារ ឬរង់ចាំទិញនៅតម្លៃ ១ ៨០០ ដុល្លារ (Psychological Support) ដោយកំណត់តម្លៃ ១ ៨២៣ ដុល្លារ សម្រាប់ការកាត់យកប្រាក់ចំណេញ និងតម្លៃ ១ ៧៨៥ ដុល្លារ សម្រាប់ការការពារហានិភ័យ៕