.jpg)
ស្ត្រីម្នាក់បានយកត្រីដែលប្រឡាក់រួចទៅដាក់ហាលឱ្យស្ងួត។ ហេង ជីវ័ន
ភ្នំពេញៈ អ្នកពាក់ព័ន្ធនៅក្នុងវិស័យវារីវប្បកម្ម សមាគមអ្នកចិញ្ចឹមសត្វ និងសិប្បករបានសាទរចំពោះការប្រកាសរបស់ក្រសួងសេដ្ឋកិច្ច និងហិរញ្ញវត្ថុ ដែលបានចាត់ទុកអាករលើតម្លៃបន្ថែមសម្រាប់មុខទំនិញមួយចំនួនដែលជា «អាហារជាមូលដ្ឋាន» សម្រាប់ការរស់នៅប្រចាំថ្ងៃរបស់ប្រជាពលរដ្ឋ គឺជាបន្ទុករបស់រដ្ឋ ដោយរំពឹងថានឹងអាចកាត់បន្ថយការចំណាយ និងជំរុញឱ្យផលិតផលក្នុងស្រុកមានលទ្ធភាពប្រកួតប្រជែងក្នុងទីផ្សារកាន់តែច្រើន។
ក្រសួងសេដ្ឋកិច្ច និងហិរញ្ញវត្ថុ បានចេញប្រកាសស្តីពីការចាត់ជាបន្ទុករបស់រដ្ឋនូវអាករលើតម្លៃបន្ថែមលើមុខទំនិញដែលជាអាហារជាមូលដ្ឋានសម្រាប់ការរស់នៅប្រចាំថ្ងៃរបស់ប្រជាពលរដ្ឋកាលពីថ្ងៃទី ១១ ខែមករា ឆ្នាំ ២០២២។
យោងតាមសេចក្តីប្រកាសព័ត៌មានរបស់ក្រសួងសេដ្ឋកិច្ច មុខទំនិញមួយចំនួនដែលជាអាហារជាមូលដ្ឋានត្រូវបានកំណត់ជាបន្ទុករបស់រដ្ឋនូវអាករលើតម្លៃបន្ថែម រួមមាន សាច់សត្វចិញ្ចឹមមានជាអាទិ៍ សាច់គោ ក្របី ពពែ ចៀម ជ្រូក មាន់ ទា ទោះបីមានលក្ខណៈជាសាច់ស្រស់ ឬកែច្នៃតាមវិធីប្រឡាក់ ឬឆ្អើរ, ស៊ុតសត្វចិញ្ចឹមគ្រប់ប្រភេទ, ត្រីទឹកសាប និងទឹកប្រៃគ្រប់ប្រភេទរួមទាំង បង្កង បង្គា កំពឹស ក្ដាម និងសិប្បីជាតិគ្រប់ប្រភេទ, ស្ករគ្រប់ប្រភេទ ដែលមិនមានលក្ខណៈជាស្ករគ្រាប់, អំបិលគ្រប់ប្រភេទ, ទឹកត្រី និងទឹកស៊ីអ៊ីវគ្រប់ប្រភេទ។
លោក ចាន់ ស៊ីថា អគ្គនាយកក្រុមហ៊ុនផលិតទឹកត្រីអ៊ីឆេ ង៉ូវហេង កំពត បានប្រាប់ភ្នំពេញប៉ុស្តិ៍ថា ការចាត់ទុកអាករលើតម្លៃបន្ថែមសម្រាប់មុខទំនិញមួយចំនួនជាបន្ទុករបស់រដ្ឋ ដែលក្នុងនោះរួមមានទឹកត្រី ទឹកស៊ីអ៊ីវ ផងនោះ គឺជាការជួយកាត់បន្ថយការចំណាយបានមួយចំនួនរបស់អ្នកបរិភោគ ថែមទាំងជំរុញឱ្យសិប្បកម្មក្នុងស្រុកមានលទ្ធភាពក្នុងការប្រកួតប្រជែងជាមួយផលិតផលនាំចូល។
លោកបញ្ជាក់ថា៖ «សព្វថ្ងៃនេះ ការចំណាយថ្លៃដើមលើការផលិតទឹកត្រី និងទឹកស៊ីអ៊ីវបានកើនឡើង ដោយសារវត្ថុធាតុដើមផលិតចាប់ផ្តើមខ្សត់ និងសម្បកវេចខ្ចប់មានការឡើងថ្លៃ ខណៈតម្លៃត្រូវដាក់លក់គឺមានការប្រកួតប្រជែងខ្លាំងជាមួយផលិតផលនាំចូលថែមទៀត ដូចនេះការអនុគ្រោះអាករលើតម្លៃបន្ថែមនឹងជួយសម្រួលដល់ការផលិតរបស់សិប្បកម្មបាន ១ កម្រិត ព្រមទាំងជំរុញដល់ការបង្កើនផលិតភាពចំពោះផលិតផលទឹកត្រីនេះ»។
ប្រធានសមាគមអ្នកចិញ្ចឹមសត្វកម្ពុជា លោក ស្រ៊ុន ពៅ បានចាត់ទុកការអនុគ្រោះរបស់រដ្ឋចំពោះផលិតផលសាច់សត្វ គឺជាការជួយសម្រាលការចំណាយបាន ១ ផ្នែកដល់អ្នកចិញ្ចឹម និងអ្នកទទួលទាន។
លោកបានប្រាប់ថា ចំពោះអាករលើតម្លៃបន្ថែមនេះនៅប្រទេសជិតខាងគេមិនតម្រូវឱ្យបង់ទេ ប៉ុន្តែសម្រាប់កម្ពុជារយៈពេលជាង ១០ ឆ្នាំមកហើយដែលក្រសួងសេដ្ឋកិច្ច បានសម្រេចផ្តល់ការអនុគ្រោះចំពោះអាករលើតម្លៃបន្ថែម ១០ ភាគរយនេះ ព្រោះនៅរៀងរាល់ ២ ឆ្នាំម្តង សមាគមតែងតែស្នើសុំដល់រាជរដ្ឋាភិបាលឱ្យបន្តការលើកលែងអាករលើតម្លៃបន្ថែមនេះ ព្រោះបើមិនដូច្នេះទេ អ្នកចិញ្ចឹមសត្វក្នុងស្រុកនឹងជួបបញ្ហាខ្លាំងចំពោះការចំណាយថ្លៃដើមច្រើន ដែលនាំឱ្យសាច់សត្វនៅទីផ្សារឡើងថ្លៃទៅតាមហ្នឹងដែរ។
លោកអះអាងថា៖ «នៅរៀងរាល់ ២ ឆ្នាំ នៅខែធ្នូ សមាគមតែងធ្វើការស្នើសុំទៅរដ្ឋាភិបាលឱ្យលើកលែងចំពោះអាករលើតម្លៃបន្ថែមនេះ ដោយការលើកលែងនេះ បានជួយសម្រួលយ៉ាងច្រើនដល់អ្នកចិញ្ចឹមសត្វក្នុងស្រុក ជាពិសេសមាន់ ដែលកំពុងតែមានការចុះថ្លៃយ៉ាងខ្លាំង»។
លោក សុខ រ៉ាដែន ប្រធានសមាគមវារីវប្បករកម្ពុជាបានប្រាប់ថា កន្លងមកត្រីទឹកសាបក៏ត្រូវបង់អាករលើតម្លៃបន្ថែម ១០ ភាគរយនេះដែរ ដូច្នេះការសម្រេចរបស់រដ្ឋនឹងផ្តល់ប្រយោជន៍យ៉ាងច្រើនសម្រាប់អ្នកចិញ្ចឹម។
លោក រ៉ាដែន បានបញ្ជាក់ថា៖ «ការចំណេញនេះ គឺមិនត្រឹមតែអ្នកចិញ្ចឹមនោះទេ តែអ្នកទទួលទានក៏បានអត្ថប្រយោជន៍ពីការលើកលែងនេះដែរ ជាពិសេសក្នុងអំឡុងវិបត្តិកូវីដ ១៩»។
ការកំណត់អាករលើតម្លៃបន្ថែមជាបន្ទុករបស់រដ្ឋត្រូវបានកំណត់ជាបន្ទុករបស់រដ្ឋនូវអាករលើតម្លៃបន្ថែមលើការផ្គត់ផ្គង់ក្នុងស្រុកនូវអាហារជាមូលដ្ឋាន គឺសម្រាប់រយៈពេល ២ ឆ្នាំចាប់ពីថ្ងៃទី ១ ខែមករា ឆ្នាំ ២០២២ ដល់ថ្ងៃទី ៣១ ខែធ្នូ ឆ្នាំ ២០២៣។ ការចាត់ទុកជាបន្ទុករបស់រដ្ឋនូវអាករលើតម្លៃបន្ថែម មិនរាប់បញ្ចូលការផ្គត់ផ្គង់ម្ហូបអាហារដោយភោជនីយដ្ឋានឡើយ៕ LA
