.jpg)
បុគ្គលិកធ្វើដំណើរចូលបំពេញការងារនៅទីស្នាក់ការក្រុមប្រឹក្សាអភិវឌ្ឍន៍កម្ពុជា CDC។ ហេង ជីវ័ន
ភ្នំពេញៈ គម្រោងវិនិយោគ ៩ ដែលមានតម្លៃសរុប ៤៣,២៨ លានដុល្លារ និងបង្កើតការងារបាន ១១ ០៤៩ កន្លែងត្រូវបានក្រុមប្រឹក្សាអភិវឌ្ឍន៍កម្ពុជា (CDC) អនុម័ត ដែលភាគច្រើនជារោងចក្រកាត់ដេរសម្លៀកបំពាក់ និងផលិតផលធ្វើដំណើរ។ នេះបើយោងតាមសេចក្តីប្រកាសព័ត៌មាន។
សេចក្តីប្រកាសព័ត៌មានរបស់ CDC ផ្សព្វផ្សាយកាលពីថ្ងៃទី ១២ ខែមករា ឱ្យដឹងថា ស្របតាមសំណើសុំវិនិយោគ ក្រុមប្រឹក្សាអភិវឌ្ឍន៍កម្ពុជាសម្រេចចេញវិញ្ញាបនបត្រចុះបញ្ជីទៅឱ្យគម្រោងមួយចំនួនដូចជា គម្រោងវិនិយោគបង្កើតរោងចក្រកាត់ដេរសម្លៀកបំពាក់របស់ក្រុមហ៊ុន Como Apparel Co., Ltd, គម្រោងបង្កើតរោងចក្រផលិតកាបូបគ្រប់ប្រភេទ និងវ៉ាលិស ក្រុមហ៊ុន Leona (Cambodia) Co., Ltd, គម្រោងបង្កើតរោងចក្រកាត់ដេរសម្លៀកបំពាក់របស់ក្រុមហ៊ុន Sincere Season (Cambodia) Garment Co., Ltd, និងគម្រោងបង្កើតរោងចក្រកាត់ដេរសម្លៀកបំពាក់របស់ក្រុមហ៊ុន Powerful Riches Garment (Cambodia)Co., Ltd។
ចំណែកគម្រោងផ្សេងៗទៀតមានដូចជា គម្រោងបង្កើតរោងចក្រផលិតកាបូប និងថង់យួររបស់ក្រុមហ៊ុន Green Bag (Cambodia) Co., Ltd, គម្រោងបង្កើតរោងចក្រផលិតកាបូបគ្រប់ប្រភេទរបស់ក្រុមហ៊ុន Global Supply Redwood Co., Ltd និងគម្រោងបង្កើតរោងចក្រកាត់ដេរសម្លៀកបំពាក់របស់ Inkyung Wondang Apparel Co., Ltd។
ដោយឡែកគម្រោងវិនិយោគ ២ ទៀត គឺស្ថិតក្នុងតំបន់សេដ្ឋកិច្ចពិសេស ខេមបូឌាន ចេជាង ហ្គ័រជី ខេត្តព្រះសីហនុ រួមមាន គម្រោងបង្កើតរោងចក្រផលិតកេសកាតុង និងផលិតផលប្លាស្ទិករបស់ក្រុមហ៊ុន Cambodian Shenghong Packaging Co., Ltd និងគម្រោងបង្កើតរោងចក្រផលិតសម្ភារសត្វចិញ្ចឹមរបស់ Best-Run Technology (Cambodia) Co., Ltd។
អ្នកស្រាវជ្រាវសេដ្ឋកិច្ចអន្តរជាតិនៃវិទ្យាស្ថានទំនាក់ទំនងអន្តរជាតិនៃកម្ពុជា (រាជបណ្ឌិត្យសភាកម្ពុជា) លោក ហុង វណ្ណៈ បាននិយាយថា ទោះបីគម្រោងវិនិយោគដែល CDC អនុម័តខាងលើភាគច្រើនជាប្រភេទឧស្សាហកម្មធុនស្រាល (វាយនភណ្ឌ) ប៉ុន្តែវាបង្ហាញថា កម្ពុជាគឺជាប្រទេសមានសក្តានុពលគ្រប់គ្រាន់ក្នុងការទាក់ទាញវិនិយោគិនឱ្យចូលមកបណ្តាក់ទុននៅក្នុងដំណាក់កាលដ៏លំបាកនៃវិបត្តិកូវីដ ១៩។ ការបញ្ចេញទុនវិនិយោគក្នុងដំណាក់កាលនេះ គឺដោយសារអ្នកវិនិយោគមានជំនឿលើសមត្ថភាព និងនិរន្តរភាពការងារដែលកម្ពុជាអាចធ្វើបាន ខណៈអត្រានៃចំនួនប្រជាជនក្នុងប្រទេសដែលបានចាក់វ៉ាក់សាំងប្រឆាំងនឹងជំងឺកូវីដ ១៩ កើនដល់ជិត ៩០ ភាគរយ។
លោកបានប្រាប់ភ្នំពេញប៉ុស្តិ៍នៅក្នុងថ្ងៃទី ១៣ ខែមករា ថា៖ «កំណើននៃការវិនិយោគ គឺជាសូចនាករដែលបង្ហាញថា សេដ្ឋកិច្ចកម្ពុជាចាប់ផ្តើមមានសម្ទុះឡើងវិញហើយ។ ម្យ៉ាងទៀតវាក៏ជួយបង្កើតការងារ និងប្រាក់ចំណូលដល់ប្រជាជនដែរ»។
លោកបន្ថែមថា ចំនួននៃការដាក់ពាក្យស្នើសុំវិនិយោគនៅកម្ពុជានឹងមានកាន់តែច្រើននៅពេលស្ថានភាពនៃការឆ្លងរាលដាលជំងឺកូវីដ ១៩ ថមថយទៅវិញ ព្រោះបច្ចុប្បន្នកម្ពុជាមានលក្ខណៈអំណោយផលច្រើនសម្រាប់ការវិនិយោគ។
បើយោងតាមលោក វណ្ណៈ លក្ខណៈអំណោយផលរបស់កម្ពុជា មានដូចជា ច្បាប់វិនិយោគមានលក្ខណៈអំណោយផល សម្បូរកម្លាំង មានប្រព័ន្ធហេដ្ឋារចនាសម្ព័ន្ធងាយស្រួល និងមានកិច្ចព្រមព្រៀងសម្រួលពាណិជ្ជកម្មជាមួយប្រទេសជាច្រើនលើពិភពលោក។
អនុប្រធានសភាពាណិជ្ជកម្មកម្ពុជាលោក លឹម ហេង បាននិយាយថា ការអនុម័តរបស់ CDC បង្ហាញថាទោះស្ថានភាពនៃការឆ្លងរាលដាលកូវីដ ១៩ នៅលើពិភពលោកមិនទាន់ថមថយ ក៏ចំណាប់អារម្មណ៍របស់អ្នកវិនិយោគក្នុងការបណ្តាក់ទុននៅកម្ពុជានៅតែមាន ខណៈកម្ពុជាកំពុងខិតខំយ៉ាងខ្លាំងដើម្បីបង្កើនសក្តានុពលទាក់ទាញអ្នកវិនិយោគ។ កម្ពុជាស្វាគមន៍និយោគិនគ្រប់ប្រទេស និងគ្រប់វិស័យ ឱ្យតែស្របតាមច្បាប់របស់កម្ពុជា។
លោកលើកឡើងថា៖ «គ្រប់ការវិនិយោគទោះវិស័យណាក៏ដោយ វានឹងជួយធ្វើឱ្យសេដ្ឋកិច្ចកម្ពុជាមានកំណើន»។
អគ្គលេខាធិការក្រុមប្រឹក្សាអភិវឌ្ឍន៍កម្ពុជា (CDC) លោក សុក ចិន្តាសោភា នៅក្នុងសិក្ខាសាលាផ្សព្វផ្សាយច្បាប់ស្ដីពីវិនិយោគថ្មីនៃព្រះរាជាណាចក្រកម្ពុជា ដល់វិនិយោគិនដែលជាសមាជិកសភាពាណិជ្ជកម្មអឺរ៉ុបនៅកម្ពុជាកាលពីថ្ងៃទី១១ ខែមករាបានលើកឡើងថា កម្ពុជាកំពុងធ្វើកិច្ចការជាច្រើនដើម្បីកែលម្អបរិស្ថានវិនិយោគរបស់ខ្លួនសំដៅទាក់ទាញការវិនិយោគក្នុងគន្លងប្រក្រតីភាពថ្មីនៃវិបត្តិជំងឺកូវីដ ១៩ និងឱ្យដើរស្របតាមបដិវត្តន៍នៃឧស្សាហកម្ម ៤.០ និងឌីជីថលូបនីយកម្ម។ បន្ថែមពីលើនេះ រាជរដ្ឋាភិបាលក៏បានប្តេជ្ញាចិត្តក្នុងការជួយសម្រួលដល់ការវិនិយោគ និងសេវាថែទាំវិនិយោគដល់វិនិយោគិនទាំងអស់ដោយគ្មានការរើសអើងទៀតផង។
លោកបញ្ជាក់ថា៖ «ការចូលជាធរមាននៃកិច្ចព្រមព្រៀងពាណិជ្ជកម្មសេរីកម្ពុជា-ចិន, កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ និងការត្រៀមចូលជាធរមានកិច្ចព្រមព្រៀងពាណិជ្ជកម្មសេរីកម្ពុជា-កូរ៉េ នឹងជួយបើកទីផ្សារ និងបង្កើនភាពទាក់ទាញវិនិយោគរបស់កម្ពុជាបន្ថែម»៕ LA
