.jpg)
ការបកសម្បកស្វាយចន្ទីដោយប្រើដៃ និងមានជំនួយតិចតួចពីគ្រឿងម៉ាស៊ីនរបស់កសិករនៅខេត្តកំពង់ធំនាពេលកន្លងមក។ ហេង ជីវ័ន
ភ្នំពេញៈ ក្រុមហ៊ុន TPJ របស់ប្រទេសជប៉ុនគ្រោងសាងសង់រោងចក្រកែច្នៃគ្រាប់ស្វាយចន្ទីចំនួន ២ ដោយរោងចក្រ ១ ស្ថិតនៅក្នុងខេត្តកំពង់ធំ និង ១ ទៀតក្នុងខេត្តកំពង់ចាមក្នុងផែនការឆ្នាំ ២០២២-២០២៥ ដើម្បីបង្កើនការនាំចេញទៅកាន់ប្រទេសជប៉ុន និងទីផ្សារផ្សេងទៀត។
លោក អួន ស៊ីឡុត ប្រធានសមាគមស្វាយចន្ទីកម្ពុជាប្រាប់ភ្នំពេញប៉ុស្តិ៍នៅថ្ងៃទី ១៣ ខែមករា ឆ្នាំ ២០២២ នេះឱ្យដឹងថា ក្រុមហ៊ុន TPJ បានទទួលការអនុញ្ញាតពីក្រុមហ៊ុនធំប្រចាំនៅប្រទេសជប៉ុនរួចហើយក្នុងការសាងសង់រោងចក្រនៅក្នុងខេត្តទាំង ២ នេះកាលពីឆ្នាំ ២០២០ ដោយទីតាំងនៅក្នុងខេត្តទាំង ២នេះត្រូវបានសិក្សា និងកំណត់រួចហើយលើផ្ទៃដីចំនួន ៦ ហិកតានៃគម្រោងរោងចក្រនីមួយៗ ប៉ុន្តែការរីករាលដាលនៃជំងឺកូវីដ ១៩ ក៏ផ្អាកទៅវិញ។
លោកបន្តថា ការដែលក្រុមហ៊ុនជប៉ុនជ្រើសរើសយកខេត្តទាំង ២គឺខេត្តកំពង់ចាម និងកំពង់ធំនេះសម្រាប់ធ្វើការសាងសង់រោងចក្រកែច្នៃគ្រាប់ស្វាយចន្ទីនេះ ដោយសារតែខេត្តទាំង ២ នេះសម្បូរការដាំដុះស្វាយចន្ទីមានចំនួនច្រើន និងងាយស្រួលក្នុងការប្រមូលទិញពីកសិករយកមកកែច្នៃ។ ទោះជាយ៉ាងណា លោកមិនដឹងពីទំហំទុនវិនិយោគនោះទេ។
លោកថ្លែងថា៖ «ខ្ញុំបានរៀបចំទីតាំង និងកន្លែងរួចអស់ហើយ សម្រាប់ធ្វើការសាងសង់ ប៉ុន្តែដោយសារតែកូវីដក៏ផ្អាកទៅវិញ ប៉ុន្តែបើជំងឺកូវីដធូរស្រាល អាចនឹងចាប់ផ្តើមនៅឆ្នាំនេះ ឬឆ្នាំបន្តបន្ទាប់ទៀត។ ក្រុមហ៊ុននេះគ្រោងនឹងកែច្នៃស្វាយចន្ទីឱ្យបាន ២ ម៉ឺនតោនក្នុង ១ ឆ្នាំៗសរុប ៤ ម៉ឺនតោនពីរោងចក្រក្នុងការនាំចេញទៅកាន់ជប៉ុន»។
ទោះជាយ៉ាងណា បើតាម លោក អួន ស៊ីឡុត រោងចក្រទាំង ២ នេះផលិតបាន ៤ ម៉ឺនតោនក្នុង ១ ឆ្នាំក៏មិនទាន់ឆ្លើយតបដែរ ព្រោះកម្ពុជាគ្រាន់តែនាំចេញទៅកាន់ប្រទេសវៀតណាមមានចំនួន ១ ១០០ ០០០ តោនក្នុង ១ ឆ្នាំៗ ខណៈនៅឆ្នាំ ២០២១ កម្ពុជាបានឈរលំដាប់លេខ ១ នៃការនាំស្វាយចន្ទីចេញទៅកាន់ទីផ្សារនៅក្រៅប្រទេស។
លោកថ្លែងថា៖ «ក្នុងគោលដៅសមាគមស្វាយចន្ទីរបស់យើង គឺមិនចង់នាំគ្រាប់ស្វាយចន្ទីឆៅទៅលក់នៅក្រៅប្រទេសទេ យើងខាតទី ១ បាត់បង់តម្លៃបន្ថែមជូនកសិករ និងទី ២ ខាតបង់កម្លាំងពលកម្មក្នុងសហគមន៍។ បើមានរោងចក្រក្នុងស្រុកយើង អាចជួយកសិករ និងកាត់បន្ថយពលករចំណាកស្រុកដែរ»។
លោកស្រី អ៊ិន ឡៃហ៊ួត ម្ចាស់សិប្បកម្មកែច្នៃគ្រាប់ស្វាយចន្ទីជ័យសំបូរនៅខេត្តកំពង់ធំបានប្រាប់ភ្នំពេញប៉ុស្តិ៍ថា ទីផ្សារស្វាយចន្ទីនៅប្រទេសកម្ពុជាសម្រាប់ការនាំចេញទៅក្រៅប្រទេសកំពុងដំណើរការល្អប្រសើរស្របពេលមានក្រុមហ៊ុនជាច្រើនក៏បានទាក់ទងបញ្ជាទិញជាច្រើនជាពិសេសបណ្តាក្រុមហ៊ុនជប៉ុន។
ប៉ុន្តែនៅឆ្នាំខាងមុខទៀត ពេលដែលមានរោងចក្រ និងមានការពង្រីកទីផ្សារបន្ថែមទៀត សហគ្រាសរបស់លោកស្រីនឹងបន្តសហការវិនិយោគរួមគ្នា ដើម្បីនាំចេញស្វាយចន្ទីឱ្យបានកាន់តែច្រើនបន្ថែមទៀត។
លោកស្រីថ្លែងថា៖ «តាមខ្ញុំដឹង ក្រុមហ៊ុន TPJ នេះមានផែនការបង្កើតរោងចក្រខ្នាតធំនៅកម្ពុជាក្នុងឆ្នាំរង្វង់ឆ្នាំ ២០២២ នេះ ដល់ឆ្នាំ ២០២៥ ព្រោះរាល់ថ្ងៃនេះ ក្រុមហ៊ុន TPJ នេះ គាត់បានបញ្ជាទិញពីខាងយើងមិនទាន់ទូលំទូលាយទេ ប្រហែលឆ្នាំក្រោយ យើងមានការសហការគ្នា ដើម្បីនាំចេញស្វាយចន្ទីកាន់តែច្រើនទៀត»។
បើតាមលោក អ៊ិន ឡៃហ៊ួត ការបង្កើតរោងចក្រកែច្នៃគ្រាប់ស្វាយចន្ទីរបស់ក្រុមហ៊ុនជប៉ុននោះមានបំណងជួយលើកស្ទូយផលិតផលស្វាយចន្ទីរបស់ប្រទេសកម្ពុជាឱ្យមានឈ្មោះបោះសំឡេងលើឆាកអន្តរជាតិ ដែលជួយកសិករឱ្យមានជីវភាពធូរធារ និងផ្តល់កម្លាំងពលកម្មដល់ប្រជាជនកម្ពុជាដើម្បីកាត់បន្ថយចំណាកស្រុក។
បើតាមលោក អួន ស៊ីឡុត កម្ពុជានាពេលបច្ចុប្បន្ននេះមានរោងចក្រ និងសិប្បកម្មកែច្នៃស្វាយចន្ទីចំនួនជិត ១០ មូលដ្ឋាននៅទូទាំងប្រទេស ប៉ុន្តែវាស្ថិតនៅខ្នាតតូចមិនទាន់ឆ្លើយតបតាមតម្រូវការនោះទេ ខណៈនៅក្នុងប្រទេសវៀតណាមមានរោងចក្រជាង ១០០ កំពុងប្រតិបត្តិការកែច្នៃ៕
