ភ្នំពេញៈ ដំឡូងមី និងផលិតផលដំឡូងមី ប្រមាណជិត ២,៨ លានតោន ត្រូវបាននាំចេញពីកម្ពុជាទៅលក់នៅទីផ្សារអន្តរជាតិ។ នេះបើយោងតាមរបាយការណ៍ក្រសួងកសិកម្ម រុក្ខាប្រមាញ់ និងនេសាទ។
ទិន្នន័យក្រសួងកសិកម្ម ដែលចេញផ្សាយកាលពីថ្ងៃទី១៣ ខែមករា បានឱ្យដឹងថា ចាប់ពីខែមករា ដល់ខែធ្នូ ឆ្នាំ២០២១ ការនាំចេញដំឡូងមី និងផលិតផលដំឡូងមី សម្រេចបាន ២ ៧៩៣ ៧២៩,៩២តោន ក្នុងនោះចំណិតដំឡូងមីក្រៀម ចំនួន ១ ៦៤៤ ៥៩១,៦៨តោន កើនឡើង ៨,៤៥ភាគរយធៀបឆ្នាំ២០២០, ដំឡូងមីស្រស់ចំនួន ១ ១០៤ ២២០តោន កើនឡើង ៥២,៦ភាគរយ, ម្សៅដំឡូងមី ៣៥ ៨៦២,៧៤តោន កើនឡើង ២,៦៦ភាគរយ, និងកាកសំណល់ដំឡូងមី ៩ ០៥៤,៥០តោន ថយចុះ -៣៣,០៦ភាគរយ។
យោងតាមទិន្នន័យ វៀតណាម គឺជាប្រទេសទទួលទិញដំឡូងមី និងផលិតផលដំឡូងមី កម្ពុជាច្រើនជាងគេ ដោយមានចំនួន ១ ៣៨១ ២៧១,៥៦តោន, ប្រទេសថៃ ១ ២៩៨ ១៩៥,៨តោន, ប្រទេសចិន ២០៣ ៩១៨,៧១តោន និងប្រទេសមួយចំនួនទៀតដូចជា អ៊ីតាលី, ប៊ែលហ្ស៊ិក, និងសហរដ្ឋអាមេរិក ជាដើម។
ដំឡូងមី គឺជាដំណាំកសិ-ឧស្សាហកម្មឈានមុខគេមួយរបស់កម្ពុជា។ កាលពីឆ្នាំ ២០២០ កម្ពុជាបានប្រកាសដាក់ចេញជាផ្លូវការនូវ «គោលនយោបាយជាតិស្តីពីដំឡូងមី ២០២០-២០២៥» ក្នុងគោលបំណង ដើម្បីបង្កើនផលិតកម្ម និងធ្វើឱ្យវាកាន់តែមានលក្ខណៈពាណិជ្ជកម្មសម្រាប់ការនាំចេញទៅទីផ្សារអន្តរជាតិ។
ប្រធានមន្ទីរពាណិជ្ជកម្មខេត្តបាត់ដំបង លោក គឹម ហួត បានប្រាប់ភ្នំពេញប៉ុស្តិ៍កាលពីពេលថ្មីៗនេះថា តម្លៃដំឡូងមីនៅក្នុងខេត្តបាត់ដំបង នាចុងឆ្នាំ២០២១ គឺមានភាពប្រហាក់ប្រហែលនឹងឆ្នាំ២០២០ ដែរ ដោយតម្លៃដំឡូងមីក្រៀមមានតម្លៃជាមធ្យមចន្លោះពី ៧៨៦ - ៨៦៩រៀលក្នុង១គីឡូក្រាម និងដំឡូងមីស្រស់ មានតម្លៃពី ២៦០- ៣៦០រៀល។
លោក គឹម ហួត បានប្រាប់ថា ដំឡូងមី និងផលិតផលដំឡូងមី នៅក្នុងខេត្តបាត់ដំបង និងខេត្តជិតខាងប្រហែល ៧០ភាគរយ ត្រូវបាននាំទៅលក់នៅប្រទេសជិតខាង ខណៈ ៣០ភាគរយទៀតសម្រាប់ប្រើប្រាស់ក្នុងស្រុក៕