ភ្នំពេញៈ ក្រសួងពាណិជ្ជកម្ម រួមជាមួយអង្គការ Swisscontact ដែលជាតំណាងរបស់សម្ព័ន្ធសកលសម្រាប់កិច្ចសម្រួលពាណិជ្ជកម្ម (Global Alliance for Trade Facilitation) បានចុះអនុស្សរណៈនៃការយោគយល់គ្នា (MoU) ដើម្បីធ្វើឱ្យប្រសើរឡើងនូវពាណិជ្ជកម្មតាមប្រព័ន្ធអេឡិចត្រូនិកនៃកញ្ចប់ទំនិញខ្នាតតូចសម្រាប់សហគ្រាសខ្នាតតូច និងមធ្យម (SeT4SME) នៅកម្ពុជា។
សេចក្តីប្រកាសព័ត៌មានក្រសួងពាណិជ្ជកម្មឱ្យដឹងថា MoU នេះមានគោលបំណងសំខាន់ចំនួន ២ រួមមាន ១. ការរួមចំណែកនៅក្នុងការអនុវត្តកិច្ចសម្រួលពាណិជ្ជកម្ម និងការធ្វើពាណិជ្ជកម្មតាមប្រព័ន្ធអេឡិចត្រូនិកដើម្បីធ្វើឱ្យប្រសើរឡើងនូវបរិយាកាសពាណិជ្ជកម្មឆ្លងកាត់ព្រំដែន តាមរយៈការតភ្ជាប់ប្រព័ន្ធផ្លាស់ប្តូរទិន្នន័យជាមុនរបស់អគ្គនាយកដ្ឋានគយ និងរដ្ឋាករកម្ពុជា និងប្រៃសណីយ៍កម្ពុជាជាមួយប្រទេសដៃគូពាណិជ្ជកម្ម, និងទី ២ ការពង្រឹងបរិយាកាសពាណិជ្ជកម្មតាមប្រព័ន្ធអេឡិចត្រូនិកសម្រាប់សហគ្រាសធុនតូច មីក្រូ និងមធ្យម (MSMEs) ដោយបង្កើតថ្នាលអេឡិចត្រូនិកសម្រាប់ការដឹកជញ្ជូនកញ្ចប់តូចៗ ដើម្បីជួយ MSMEs កម្ពុជាអាចទាញយកប្រយោជន៍ពីពាណិជ្ជកម្មតាមប្រព័ន្ធអេឡិចត្រូនិកជាអតិបរមា។
តំណាង Swisscontact បានលើកឡើងថា «គម្រោង SeT4SME ស្ថិតក្រោមគំនិតផ្តួចផ្តើមរបស់សម្ព័ន្ធសកលសម្រាប់កិច្ចសម្របសម្រួលពាណិជ្ជកម្ម (GATF) និងត្រូវបានអនុវត្តផ្ទាល់ដោយ Swisscontact និងមានទិសដៅលើកកម្ពស់កិច្ចសម្រួលពាណិជ្ជកម្មសម្រាប់ការនាំចេញនាំចូលកញ្ចប់ទំនិញខ្នាតតូចផ្ញើតាមប្រៃសណីយ៍នៅកម្ពុជា និងជំរុញឱ្យមានការអភិវឌ្ឍជាបរិយាប័ន្ន តាមរយៈការធ្វើឱ្យប្រសើរឡើងនូវដំណើរការនីតិវិធីបញ្ចេញទំនិញកញ្ចប់ខ្នាតតូចទាំងនេះ ដែលឈានទៅដល់ការកាត់បន្ថយពេលវេលា និងថវិកាសម្រាប់សហគ្រាសធុនតូច និងមធ្យម ដែលភាគច្រើនគ្រប់គ្រងដោយស្ត្រី។ សូមតាមដានសកម្មភាពផ្សេងៗទៀតពីបេសកកម្មថ្មីរបស់ពួកយើង»។
លោកស្រី តឹករ៉េត កំរង បានឱ្យដឹងថា កិច្ចព្រមព្រៀងនេះនឹងផ្តល់ជាប្រយោជន៍ច្រើនដល់សហគ្រាសធុនតូច និងមធ្យមកម្ពុជា ក្នុងការប្រើប្រាស់ការធ្វើពាណិជ្ជកម្មតាមប្រព័ន្ធអេឡិចត្រូនិក និងធ្វើឱ្យប្រសើរឡើងនូវបរិយាកាសពាណិជ្ជកម្មនៅកម្ពុជា និងឆ្លងកាត់ព្រំដែនតាមរយៈការអនុវត្តកិច្ចព្រមព្រៀងកិច្ចសម្រួលពាណិជ្ជកម្ម។
លោកស្រីថ្លែងថា៖ «ដើម្បីអនុវត្តគម្រោងនេះឱ្យមានប្រសិទ្ធភាព និងជោគជ័យ ក្រសួងពាណិជ្ជកម្ម និងអង្គការ Swisscontact នឹងបង្កើតគណៈកម្មការតម្រង់ទិសអនុវត្តគម្រោងនេះឱ្យស្របតាមគោលបំណង និងផែនការការងាររបស់គម្រោង»។
បើយោងតាម លោកស្រី តឹករ៉េត កំរង ក៏បានរំលេចឡើងអំពីគម្រោង Go4eCAM ដែលក្រសួងពាណិជ្ជកម្មកំពុងអនុវត្តយ៉ាងសកម្ម ដែលទាក់ទងនឹងពាណិជ្ជកម្មតាមប្រព័ន្ធអេឡិចត្រូនិក ជាពិសេសការបង្កើតផ្សារ ខេមបូឌាត្រេដ (Cambodiatrade.com) សម្រាប់ជួយគាំទ្រទៅដល់សហគ្រាសធុនតូច និងមធ្យមរបស់កម្ពុជាក្នុងការលក់ផលិតផលកម្ពុជាទាំងក្នុងស្រុក និងនាំចេញទៅទីផ្សារក្រៅប្រទេស៕ LA