The Phnom Penh Post Search

Search form




Logo of Phnom Penh Post newspaper Phnom Penh Post - លោក វេង សាខុន៖ ជំរុញ​ឱ្យ​វិនិយោគិន​ចិន​បណ្តាក់ទុន​ផ្នែក​កសិកម្ម

លោក វេង សាខុន៖ ជំរុញ​ឱ្យ​វិនិយោគិន​ចិន​បណ្តាក់ទុន​ផ្នែក​កសិកម្ម

Content image - Phnom Penh Post
លោក វេង សាខុន​ (​កណ្តាល​) ក្នុងជំនួប​ជាមួយ​ថ្នាក់ដឹកនាំ​ក្រុមហ៊ុន ហ័រឡុង​។ រូបថត សហការី

លោក វេង សាខុន៖ ជំរុញ​ឱ្យ​វិនិយោគិន​ចិន​បណ្តាក់ទុន​ផ្នែក​កសិកម្ម

ភ្នំពេញៈ រដ្ឋមន្ត្រីក្រសួង​កសិកម្ម រុក្ខាប្រមាញ់ និង​នេសាទ​បាន​លើកឡើងថា សកម្មភាព​វិនិយោគ​របស់​ក្រុមហ៊ុន​ចិន​នឹងចូលរួម​បំពេញបន្ថែម​ខ្សែចង្វាក់​ផលិតកម្ម​ផ្លែឈើ ខ្សែចង្វាក់​តម្លៃ និរន្តរភាព​ផលិតកម្ម និង​ទីផ្សារ​នាំចេញ​ផលិតផល​របស់​កម្ពុជា​។

ក្នុងជំនួប​ជាមួយ​ក្រុមការងារ​ក្រុមហ៊ុន ហ័រឡុង កាលពី​ថ្ងៃទី​ ១៧ ខែមករា លោក សាខុន បាន​និយាយថា កិច្ចព្រមព្រៀង​ភាពជា​ដៃគូ​យុទ្ធសាស្ត្រ​គ្រប់​ជ្រុងជ្រោយ​រវាង​ប្រទេស​ទាំង​ ២ ​កម្ពុជា​-​ចិន បាននិង​កំពុង​ទាក់ទាញ​វិនិយោគិន​ចិន​ជាច្រើន​ឱ្យ​ចូលមក​វិនិយោគ​វិស័យ​កសិកម្ម​នៅ​កម្ពុជា​។ លោក​បាន​បន្ថែមថា ជាក់ស្តែង​មាន​ក្រុមហ៊ុន​មួយ​ឈ្មោះ ហ៊ុន ទី ដែល​កំពុង​ដាក់ទុន​វិនិយោគ​បង្កើត​មជ្ឈមណ្ឌល​កសិឧស្សាហកម្ម​នៅ​កម្ពុជា​លើ​ផ្ទៃដី​ទំហំ ៨០​ ហិកតា​ដោយ​ធ្វើការ​បែងចែក​ទីផ្សារ​ផ្លែឈើ អគារ​កែច្នៃ អគារ​វេចខ្ចប់ ឃ្លាំង​ស្តុក (Cold storage) អគារ​ពិព័រណ៍​កសិផល កន្លែង​សម្លាប់​មេរោគ និង​សត្វល្អិត​ចង្រៃ​លើ​ផ្លែឈើ​ដូចជា ស្វាយ ចេក ដូង មៀន​ប៉ៃលិន និង​ផលិតផល​វារីវប្បកម្ម​ផងដែរ​។

លោក​បញ្ជាក់ថា​៖ «​កិច្ចសហប្រតិបត្តិការ​គ្រប់​ជ្រុងជ្រោយ​រវាង​រដ្ឋាភិបាល​ទាំង​ ២ (​កម្ពុជា​-​ចិន​)​ នឹង​ផ្តល់​កាលានុវត្តភាព​សម្រាប់​វិនិយោគិន កសិករ ម្ចាស់​ចម្ការ និង​អាជីវករ ឱ្យមាន​ឱកាស​ពង្រីក​សក្តានុពល​កែច្នៃ និង​នាំចេញ​ស្របតាម​គន្លង​ប្រក្រតីភាព​ថ្មី ដោយ​ក្រសួង​កសិកម្ម​នឹង​រង់ចាំ​ផ្តល់​កិច្ចសហការ ធ្វើយ៉ាងណា​ឱ្យ​ការវិនិយោគ​សម្រេចបាន​ជោគជ័យ​»​។

នាយក​ក្រុមហ៊ុន ហ័រ ឡុង បាន​និយាយថា បច្ចុប្បន្ន​មាន​ក្រុមហ៊ុន​ចិន​ជាច្រើន​កំពុង​ធ្វើការ​វិនិយោគ​លើ​វិស័យ​កសិកម្ម​នៅ​កម្ពុជា មានដូចជា ផលិតកម្ម​ដំណាំ វារីវប្បកម្ម មជ្ឈមណ្ឌល​ទីផ្សារ​កសិផល ពិព័រណ៍​កសិផល កន្លែង​កែច្នៃ វេចខ្ចប់ ធ្វើ​អនាម័យ និង​កន្លែង​សម្លាប់​សត្វល្អិត​ចង្រៃ​។

លោក​បញ្ជាក់ថា ការវិនិយោគ​ទាំងនេះ គឺមាន​បំណង​អភិវឌ្ឍ​វិស័យ​កសិកម្ម​កម្ពុជា​ដើម្បី​ធានាបាន​បរិមាណ​ផ្គត់ផ្គង់ គុណភាព សុវត្ថិភាព និង​ស្តង់ដា​ទីផ្សារ​នាំ​ចេញទៅ​ទីផ្សារ​អន្តរជាតិ​។

លោក​សង្ឃឹមថា អនាគត​ដ៏ខ្លី​ខាងមុខ សកម្មភាព​វិនិយោគ​របស់​ក្រុមហ៊ុន​ចិន​ដែល​បាននិង​កំពុង​ដំណើរការ​នឹង​ធ្វើឱ្យ​ផលិតផល​កសិកម្ម​កម្ពុជា​មាន​វត្តមាន​នៅលើ​ទីផ្សារ​អន្តរជាតិ ជាពិសេស​ទីផ្សារ​ចិន​កាន់តែ​ច្រើនឡើង​ថែមទៀត​។

លោក លឹម ហេង អនុប្រធាន​សភាពាណិជ្ជកម្ម​កម្ពុជា​ប្រាប់​ភ្នំពេញ​ប៉ុស្តិ៍​ថា ក្នុង​បរិបទ​កូវីដ​ ១៩ រដ្ឋាភិបាល​កម្ពុជា​បាន​រើសយក​វិស័យ​កសិកម្ម​ធ្វើជា​ចន្ទល់​សេដ្ឋកិច្ច ដូច្នេះ​ការវិនិយោគ​លើ​វិស័យ​កសិកម្ម គឺជា​កត្តា​ចម្បង​ដើម្បី​ស្តារ និង​ជំរុញ​កំណើន​សេដ្ឋកិច្ច​ឡើងវិញ​។

លោក​បន្ថែមថា ការទាក់ទង​វិនិយោគិន​ពី​ក្រៅប្រទេស​ឱ្យមក​វិនិយោគ​គឺជា​រឿង​សំខាន់ ប៉ុន្តែ​កម្ពុជា​ក៏​ត្រូវតែ​គិតគូរ​លើ​បញ្ហា​មួយចំនួន​ដែរ ដើម្បី​បង្កលក្ខណៈ​ងាយស្រួល និង​ផ្តល់​ភាពទាក់ទាញ​ដូចជា ការគិតគូរ​ដល់​ផ្ទៃដី​កសិកម្ម ប្រព័ន្ធ​ធារាសាស្ត្រ ធនធានមនុស្ស ការដឹក​ជញ្ជូន តម្លៃ​អគ្គិសនី​ជាដើម​។

លោក​បាន​បញ្ជាក់ថា​៖ «​ច្បាប់​វិនិយោគ​ថ្មី និង​កិច្ចព្រមព្រៀង​ពាណិជ្ជ​សេរី​ទ្វេភាគី និង​តំបន់ យើង​មាន​ហើយ ដូចនេះ យន្តការ​ទាំងនេះ​សុទ្ធតែ​ជា​ការរួម​ចំណែក​ក្នុងការ​ទាក់ទាញ​អ្នក​វិនិយោគ ជាពិសេស​វិនិយោគិន​ចិន​ឱ្យ​ចូលមក​វិនិយោគ​នៅ​កម្ពុជា ក្រោយ​ស្ថានភាព​កូវីដ-១៩ ធូរស្រាល​»៕ LA

អត្ថបទគួរចាប់អារម្មណ៍