បាត់ដំបងៈ ប្រធាននាយកប្រតិបត្តិធនាគារអេស៊ីលីដា ភីអិលស៊ី លោក អ៊ិន ចាន់នី លើកឡើងថា ការដាក់ពាក្យស្នើសុំឥណទានតាមប្រព័ន្ធឌីជីថលតាមរយៈធនាគារអេស៊ីលីដាមានការកើនឡើងគួរឱ្យកត់សម្គាល់នៅក្នុងរយៈពេល ២ ឆ្នាំចុងក្រោយនេះ ដោយធនាគាររបស់លោកទទួលបានការស្នើសុំតាមប្រព័ន្ធអនឡាញក្នុងរង្វង់ ៤០ ម៉ឺននាក់គិតចាប់ពីឆ្នាំ ២០២០។
ការថ្លែងបែបនេះរបស់លោក អ៊ិន ចាន់នី ត្រូវបានធ្វើឡើងក្នុងឱកាសចុះត្រួតពិនិត្យការិយាល័យធនាគារអេស៊ីលីដា សាខាស្រុកបាណន់នៃខេត្តបាត់ដំបង ដោយលោកកត់សម្គាល់ថា ចាប់ពីឆ្នាំ ២០២០ ចំនួនអ្នកស្នើសុំឥណទានតាមបញ្ជរ ឬទីភ្នាក់ងារទូទាំងប្រទេសរបស់ អេស៊ីលីដា មិនសូវមានច្រើនទេ។ ការធ្លាក់ចុះនេះ គឺបន្ទាប់ពីអតិថិជនភាគច្រើនបានងាកមកប្រើប្រាស់សេវាស្នើសុំឥណទានតាមឌីជីល ដោយសារមានភាពងាយស្រួលមិនស្មុគស្មាញ និងចំណាយពេលខ្លី។
លោក ចាន់នី បានថ្លែងថា៖ «គិតពីឆ្នាំ ២០២០ មកទល់បច្ចុប្បន្ន ចំនួនអ្នកស្នើសុំឥណទានតាមអេឡិចត្រូនិករបស់អេស៊ីលីដាមានចំនួន ៤០ ម៉ឺននាក់ដែលជាចំនួនមួយដ៏ខ្ពស់។ ការកើនឡើងចំនួនអ្នកស្នើសុំឥណទានតាមឌីជីថលនេះកើតឡើងក្រោយពីធនាគារអេស៊ីដា បានខិតខំអភិវឌ្ឍន៍ផលិតផល និងសេវាកម្មឌីជីថលជាបន្តបន្ទាប់ក្នុងការបម្រើអតិថិជនឱ្យស្របតាមការរីកចម្រើននៃបច្ចេកវិទ្យាហិរញ្ញវត្ថុ»។
លោក អឿ សុធារ័ត្ន នាយកប្រតិបតិ្តការិយាល័យឥណទានកម្ពុជា (CBC) ធ្លាប់និយាយថា ជាមួយនឹងការទទួលយកយ៉ាងឆាប់រហ័សនៃឌីជីថលនីយកម្ម ធនាគារចល័ត និង Fintech មានទិន្នន័យជាច្រើនដែលបានបង្កើតនូវចរិតលក្ខណៈរបស់អតិថិជននៃអាជីវកម្មដែលគេអាចវិភាគដើម្បីបង្កើតការយល់ដឹងអំពីអាជីវកម្មឆ្លាតវៃ។
ជាមួយនឹងប្រភពទិន្នន័យថ្មីៗជាច្រើនដែលកំពុងវិវឌ្ឍ អាជីវកម្មនៅក្នុងប្រទេសកម្ពុជាស្ថិតក្នុងទីតាំងមួយដែលពួកគេអាចទទួលបានអត្ថប្រយោជន៍ពីការជីកយកទិន្នន័យ និងផលិតផលវិភាគទិន្នន័យកម្រិតខ្ពស់ ដើម្បីកំណត់គោលដៅក្នុងការបង្កើតចំណែកទីផ្សាររបស់អតិថិជន។
លោកបានថ្លែងថា៖ «ពិន្ទុឥណទានរបស់យើង គឺជាផលិតផលមួយដែលប្រើបច្ចេកទេសស្វែងរកទិន្នន័យ និងការវិភាគកម្រិតខ្ពស់។ យើងផ្តោតលើការបង្កើនជំនាញកម្លាំងពលកម្មរបស់យើងជានិច្ច ដើម្បីធានាថា ពួកគេអាចអនុវត្តជំនាញស្របតាមតម្រូវការទីផ្សារដែលផ្លាស់ប្តូរយ៉ាងឆាប់រហ័ស»។
«យើងក៏បើកចំហផងដែរនៅក្នុងការសហការជាមួយអ្នកជំនាញ និងស្ថាប័នខាងក្រៅ ដែលជាការរួមផ្សំគ្នាក្នុងការនាំមកនូវអត្ថប្រយោជន៍ដល់ប្រព័ន្ធអេកូឡូស៊ី»។ នេះបើយោងតាមលោក សុធារ័ត្ន។
យោងតាមលោក ចាន់នី ចំនួនអ្នកប្រើប្រាស់ប្រព័ន្ធឌីជីថលរបស់ អេស៊ីដាបច្ចុប្បន្នមានរហូតដល់ ៩៤ ភាគរយ ខណៈអ្នកប្រើប្រាស់សេវាទីភ្នាក់ងារ និងបញ្ជរមានតែ ៦ ភាគរយប៉ុណ្ណោះ។
ទោះបីយ៉ាងនេះក្តីលោក ចាន់នី បញ្ជាក់ថា អេស៊ីលីដា នឹងបន្តពង្រីកការិយាល័យនៅតាមរាជធានី-ខេត្តឱ្យកាន់តែច្រើនបន្ថែមទៀតក្នុងឆ្នាំ ២០២២ នេះ ដើម្បីឆ្លើយតបនឹងកំណើនរបស់អ្នកប្រើប្រាស់។ លោកបន្ថែមទៀតថា ក្នុងចំណោមប្រាក់បញ្ញើសន្សំសរុបរបស់អេស៊ីលីដា ជាង ៥,៤ ពាន់លានដុល្លារ មានការរួមចំណែក ៧០ ភាគរយពីអតិថិជននៅរាជធានីភ្នំពេញ រីឯទំហំឥណទានដែលមានជាង ៥ ពាន់លានដុល្លារដូចគ្នា ៧០ ភាគរយត្រូវបានក្តោបក្តាប់ដោយអតិថិជននៅតាមបណ្តាខេត្ត។
យោងតាមលោកស្រី ម៉ារ អមរា អនុប្រធាននាយកប្រតិបត្តិធនាគារអេស៊ីលីដា នៅក្នុងឆ្នាំ ២០២១ អេស៊ីលីដាបានទទួលការទូទាត់តាមប្រព័ន្ធអេឡិចត្រូនិក ចំនួន ៨៥ លានប្រតិបត្តិការកើនឡើង ៦១ ភាគរយ ដែលមានទំហំទឹកប្រាក់ ៣៤ ពាន់លានដុល្លារកើនឡើង ៩០ ភាគរយបើធៀបនឹងឆ្នាំ ២០២០។ ការទូទាត់ប្រាក់តាមប្រព័ន្ធអេឡិចត្រូនិករបស់អេស៊ីលីដា បានរួមចំណែកទីផ្សារប្រតិបត្តិការ ១២,១៩ ភាគរយ និងទំហំប្រតិបត្តិការ ១៧,១៦ ភាគរយនៃចំនួនប្រតិបត្តិការសរុបរបស់វិស័យធនាគារ និងហិរញ្ញវត្ថុនៅឆ្នាំ ២០២១។
របាយការណ៍របស់ធនាគារជាតិនៃកម្ពុជា (NBC) កាលពីពេលថ្មីៗនេះឱ្យដឹងថា នៅឆ្នាំ ២០២១ គ្រឹះស្ថានធនាគារ និងហិរញ្ញវត្ថុបានធ្វើប្រតិបត្តិការទូទាត់ប្រាក់តាមអេឡិចត្រូនិកមានជិត ៧០០ លានប្រតិបត្តិការ ដែលមានទំហំទឹកប្រាក់ជិត ២០០ ពាន់លានដុល្លារ ឬស្មើនឹង ៧៨៧ ភាគរយនៃផលិតផលសរុប៕ LA
វីដេអូ៖