.jpg)
វិភាគដោយ៖ លោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុនៃក្រុមហ៊ុន ហ្គោលដេន អេហ្វអិកស៍ លីង ឃែភីថល
ចាប់ពីថ្ងៃព្រហស្បតិ៍សប្តាហ៍មុន មាសបានស្ថិតនៅក្នុងទំនោរធ្លាក់ចុះ ដោយបានធ្លាក់ចុះពីតម្លៃខ្ពស់ថ្ងៃព្រហស្បតិ៍ ១ ៨២២,៧៧ ដុល្លារក្នុង ១ អោនស៍ មកដល់តម្លៃបើកផ្សារ ១៨១៨,២១ ដុល្លារ គិតត្រឹមថ្ងៃអង្គារសប្តាហ៍នេះ។ ទីផ្សារតម្លៃមាសបានបន្ដរងសម្ពាធដោយសារប្រាក់ដុល្លារបានឡើងថ្លៃ និងទិន្នផលរតនាគារសហរដ្ឋអាមេរិកបានកើនឡើង។
ឥឡូវនេះ ទិសដៅតម្លៃមាស ដែលជាធម្មតាប្រែប្រួលបញ្ច្រាសទៅនឹងតម្លៃប្រាក់ដុល្លារត្រូវបានវិនិយោគិនកំពុងរង់ចាំមើលទំនោរបន្ទាប់របស់វា ស្របពេលកំពុងរង់ចាំមើលការសម្រេចចិត្តរបស់ធនាគារកណ្តាលអាមេរិកលើគោលនយោបាយអត្រាការប្រាក់ថ្មីដែលនឹងត្រូវសម្រេចនៅថ្ងៃទី ២៦ ខែមករា ខាងមុខនេះ។ នៅដើមខែមករា ឆ្នាំ ២០២២ នេះ តម្លៃមាសបានរំកិលពីចន្លោះ ១ ៨៣១, ៦១ មកដល់ ១ ៧៨២,៤៦ ដុល្លារ។
សប្តាហ៍មុនវិញ តម្លៃហាងឆេងមាសបានរត់ក្នុងចន្លោះ ១ ៨២៨ មកដល់ ១ ៧៩០ ដុល្លារ ដែលបញ្ជាក់ឱ្យឃើញថា តម្លៃហាងឆេងមាសកំពុងរត់ក្នុងចន្លោះទិសដៅឡើងចុះទៀងទាត់ (Sideway)។ លោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុនៃក្រុមហ៊ុន ហ្គោលដេន អេហ្វអិកស៍ លីង ឃែភីថល បានយល់ឃើញថា៖ «តម្លៃហាងឆេងមាសហាក់បីដូចជាកំពុងរង់ចាំការសម្រេចពីធនាគារកណ្ដាលសហរដ្ឋអាមេរិក ដើម្បីបំបែកទៅរកទិញដៅធំណាមួយ។
ប៉ុន្ដែបើទោះបីជាអត្រាការប្រាក់ (០,២៥%) នឹងត្រូវបានដំឡើង ទម្លាក់ ឬក៏រក្សាទុកក៏ដោយ តម្លៃមាសអាចនឹងធ្លាក់ចុះ មុនការសម្រេចចិត្តរបស់ធនាគារកណ្ដាល និងត្រឡប់មកកើនឡើងវិញ បន្ទាប់ពីការសម្រេចហើយ ពីព្រោះថា បើទោះជាមានការដំឡើងអត្រាការប្រាក់ក្ដី វាអាចជួយបានត្រឹមរយៈពេលខ្លីតែប៉ុណ្ណោះ ពោលគឺមិនទាន់អាចកាត់បន្ថយអត្រាអតិផរណាដែលកំពុងកើនឡើងខ្ពស់បានទាំងស្រុងនោះទេ»។
សម្រាប់ការវិភាគជួញដូរក្នុងសប្តាហ៍នេះ វិនិយោគិនអាចពិចារណាលក់តម្លៃហាងឆេងមាសមុនការសម្រេចចិត្ដរបស់ធនាគារកណ្ដាលក្នុងតម្លៃ ១ ៨១៥ ដុល្លារជាមួយមុខងារទាញយកប្រាក់ចំណេញនៅតម្លៃ ១ ៨០០ ដុល្លារ និងមុខងារការពារហានិភ័យនៅតម្លៃ ១ ៨២៨ ដុល្លារ៕
