ទីក្រុងសានហ្វ្រានស៊ីស្កូៈ កិច្ចព្រមព្រៀងតម្លៃ ៦៩ ពាន់លានដុល្លាររបស់ក្រុមហ៊ុន Microsoft ដើម្បីទិញ Activision Blizzard ជាក្រុមហ៊ុនវីដេអូហ្គេមឈានមុខគេត្រូវបានគេរំពឹងថានឹងទទួលជោគជ័យលើនិយតករ បើទោះបីជាមានការប្ដេជ្ញានៅអឺរ៉ុប និងអាមេរិកថានឹងគ្រប់គ្រងលើបច្ចេកវិទ្យាឈានមុខគេក៏ដោយ។
ទីភ្នាក់ងារព័ត៌មាន AFP បានសម្ភាសក្រុមអ្នកវិភាគបន្ទាប់ពីផែនការច្របាច់បញ្ចូលគ្នាត្រូវបានប្រកាសកាលពីថ្ងៃអង្គារបានឱ្យដឹងថា កិច្ចព្រមព្រៀងនេះ ពិតប្រាកដណាស់ នឹងត្រូវបានត្រួត-ពិនិត្យយ៉ាងហ្មត់ចត់ ប៉ុន្តែទំនងជាមិនសូវខ្លាំងដូចជាការទិញដោយក្រុមហ៊ុន Amazon ក្រុមហ៊ុន Google ឬក្រុមហ៊ុន Meta ដែលជាក្រុមហ៊ុនមេរបស់ក្រុមហ៊ុន Facebook នោះទេ។
លោក Dan Ives អ្នកវិភាគនៅក្រុមហ៊ុន Wedbush បានថ្លែងថា៖ «តាមទស្សនៈនិយតកម្ម ក្រុមហ៊ុន Microsoft មិនស្ថិតក្រោមការត្រួតពិនិត្យកម្រិតដូចគ្នាទៅនឹងភាពខ្លាំងផ្នែកបច្ចេកវិទ្យាផ្សេងទៀតនោះទេ»។
លោក Ives បានបន្ថែមថា៖ «លោក Satya Nadella នាយកប្រតិបត្តិក្រុមហ៊ុន Microsoft បានមើលឃើញឱកាស ក្នុងការវិនិយោគដ៏សំខាន់លើអ្នកប្រើប្រាស់ ខណៈពេលដែលក្រុមហ៊ុនផ្សេងទៀតត្រូវជាប់ពាក់ព័ន្ធនឹងបទប្បញ្ញត្តិ ហើយមិនអាចដំណើរការទៅមុខបាន បន្ទាប់ពីមានលក្ខណៈគួរឱ្យចាប់អារម្មណ៍»។
អ្នកវិភាគបានកត់សម្គាល់ថាមាន «ឧបសគ្គក្នុងការឆ្ពោះទៅមុខនៃភាគីទាំង ២» ដោយសារតែកិច្ចព្រមព្រៀងនេះមានភាពពិបាកខ្លាំងពេក។
ក្រុមហ៊ុន Microsoft បានជំរុញខ្លួនឯងចូលទៅក្នុងសម្ព័ន្ធដ៏ធំមួយនៅក្នុងទីផ្សារដែលរកប្រាក់ចំណូលបានច្រើនបំផុតរបស់ពិភពលោកតាមរយៈការប្រកាសកិច្ចព្រមព្រៀង ដើម្បីគ្រប់គ្រងក្រុមហ៊ុន Activision-Blizzard ដែលជាការទិញភាគហ៊ុនដ៏ធំបំផុតនៅក្នុងប្រវត្តិសាស្ត្រនៃវិស័យវីដេអូហ្គេម។
កិច្ចព្រមព្រៀងនេះនឹងនាំយកហ្គេមល្បីៗបំផុតលើពិភពលោកមួយចំនួនចូលទៅក្នុងការគ្រប់គ្រងរបស់ ក្រុមហ៊ុន Microsoft រួមមានវីដេអូហ្គេម «Call of Duty» វីដេអូហ្គេម «Candy Crush» និង វីដេអូហ្គេម «Warcraft» ហើយធ្វើឱ្យក្រុមហ៊ុនមួយនេះក្លាយជាក្រុមហ៊ុនហ្គេមធំជាងគេទី ៣នៅលើពិភពលោក បន្ទាប់ពីក្រុមហ៊ុន Sony និងក្រុមហ៊ុន Tencent តែប៉ុណ្ណោះ។
ការមិនលោតចូលទៅក្នុងកន្លែងកំពូលនៅក្នុងទីផ្សារមួយនេះ គួរតែជាការពេញចិត្តរបស់ក្រុមហ៊ុន Microsoft បើនិយាយពីនិយតករដែលព្រួយបារម្ភអំពីសក្តានុពលដោយសារតែអំណាចផ្តាច់មុខ។
ទោះជាយ៉ាងណាក៏ដោយ មានការព្រួយបារម្ភថា ក្រុមហ៊ុន Microsoft អាចនឹងបង្កើតឈ្មោះក្រុមហ៊ុន Activision ផ្ដាច់មុខនៅពេលអនាគត ចំពោះម៉ាស៊ីនលេងហ្គេម Xbox និងកុំព្យូទ័រដែលដំណើរការដោយកម្មវិធី Windows របស់ខ្លួន ដោយរារាំងដល់ហាដវែរ ម៉ាស៊ីនលេងហ្គេម PlayStation ជាដៃគូប្រកួតប្រជែងដែលផលិតដោយក្រុមហ៊ុន Sony មានមូលដ្ឋាននៅជប៉ុន។
ក្រុមហ៊ុន Activision បានបង្កើតហ្គេមដ៏ពេញនិយមជាច្រើនដូចជា «Call of Duty» សម្រាប់ម៉ាស៊ីនហ្គេមទាំង ២។
លោក Michael Hewson ប្រធានផ្នែកវិភាគទីផ្សារនៅក្រុមហ៊ុន CMC Markets បានថ្លែងថា៖ «ខណៈពេលដែលអ្នកខ្លះបានអះអាងថា ការណ៍នេះអាចផ្ទុយនឹងផលប្រយោជន៍ផ្ទាល់ខ្លួន»៕ LA
វីដេអូ៖