.jpg)
អគ្គនាយកដ្ឋានពន្ធដារ។ ហុង មិនា
ភ្នំពេញៈ រដ្ឋាភិបាលនឹងចាប់អនុវត្តការយកអាករលើតម្លៃបន្ថែមសម្រាប់ប្រតិបត្តិការពាណិជ្ជកម្មតាមប្រព័ន្ធអេឡិចត្រូនិក (E-Commerce VAT) ដោយនឹងត្រូវអនុវត្តចាប់ពីថ្ងៃទី ១ ខែមេសា ឆ្នាំ ២០២២ តទៅ ខណៈអគ្គនាយកដ្ឋាន (GDT) បានធ្វើទំនើបកម្មប្រព័ន្ធបច្ចេកវិទ្យាជាច្រើនសម្រាប់ដាក់ឱ្យអ្នកជាប់ពន្ធអនុវត្ត។
លោក អេង រតនា ប្រធាននាយកដ្ឋានគ្រប់គ្រងអ្នកជាប់ពន្ធធំនៃ GDT បានលើកឡើងក្នុងសិក្ខាសាលាផ្សព្វផ្សាយតាមអនឡាញស្តីពី «ការអនុវត្តអាករលើតម្លៃបន្ថែមចំពោះប្រតិបត្តិការពាណិជ្ជកម្មតាមប្រព័ន្ធអេឡិចត្រូនិក (E-Commerce)» កាលពីថ្ងៃទី ១៨ ខែមករា ថា ការបញ្ជ្រាបចំណេះដឹងដល់អ្នកជាប់ពន្ធពាក់ព័ន្ធនឹងការអនុវត្តអាករលើតម្លៃបន្ថែម គឺពិតជាមានសារៈសំខាន់ក្នុងការឆ្លើយតបទៅនឹងយុទ្ធសាស្ត្រកៀរគរចំណូល ២០១៩-២០២៣ ដែលរាជរដ្ឋាភិបាលមានគោលនយោបាយមិនបង្កើនអត្រាពន្ធ ឬបង្កើតពន្ធថ្មី ដោយត្រូវពង្រឹងច្បាប់ និងបទប្បញ្ញត្តិស្តីពីពន្ធដារដែលមានស្រាប់ និងពង្រឹងការគ្រប់គ្រងប្រមូលចំណូលពន្ធឱ្យអស់សក្តានុពល។
លោកបន្ថែមថា៖ «ការអនុវត្តអាករលើតម្លៃបន្ថែមចំពោះប្រតិបត្តិការពាណិជ្ជកម្មតាមប្រព័ន្ធអេឡិចត្រូនិកនឹងត្រូវអនុវត្តពីថ្ងៃទី ១ ខែមេសា ឆ្នាំ ២០២២ ខាងមុខនេះតទៅ។ កាតព្វកិច្ចអាករលើតម្លៃបន្ថែមចំពោះពាណិជ្ជកម្មតាមប្រព័ន្ធអេឡិចត្រូនិក ត្រូវបានអគ្គនាយកដ្ឋានពន្ធដារ ប្រកាសដាក់ចេញតាមរយៈសេចក្តីណែនាំលេខ ២០៥២២ អពជ ចុះថ្ងៃទី ៨ ខែធ្នូ ឆ្នាំ ២០២១»។
ក្រសួងពាណិជ្ជកម្មកាលពីថ្ងៃទី ១ ខែធ្នូ ឆ្នាំ ២០២១ ក៏បានជូនដំណឹងពីការពន្យារពេលការដាក់ពាក្យស្នើសុំលិខិតអនុញ្ញាត ឬអាជ្ញាប័ណ្ណពាណិជ្ជកម្មតាមប្រព័ន្ធអេឡិចត្រូនិកនេះរហូតដល់ថ្ងៃទី ១ ខែមីនា ឆ្នាំ ២០២២ ដោយសារក្រសួងសង្កេតឃើញថា សហគ្រាសក្រុមហ៊ុនទាំងនោះបាននិងកំពុងរៀបចំឯកសារជាមួយក្រសួងប្រៃសណីយ៍ និងទូរគមនាគមន៍។
លោក ឱម តារាឫទ្ធិ ប្រធាននាយកដ្ឋានចុះបញ្ជីពាណិជ្ជកម្មនៃក្រសួងពាណិជ្ជកម្មបានប្រាប់ភ្នំពេញប៉ុស្តិ៍ថា នៅអំឡុងពេលនៃវិបត្តិកូវីដ ១៩ អាជីវកម្មតាមប្រព័ន្ធអនឡាញកាន់តែពេញនិយម និងជួយសម្រួលដល់ការរស់នៅរបស់ប្រជាជនបានច្រើន ជាពិសេសអាជីវកម្មលក់អាហារ ភេសជ្ជៈ សម្លៀកបំពាក់ និងសម្ភារប្រើប្រាស់ ប៉ុន្តែបញ្ហា និងជម្លោះរវាងអ្នកលក់ និងអ្នកទិញយកទៅប្រើប្រាស់ក៏មានមិនតិចដែរ។
លោកលើកឡើងថា៖ «កន្លងមកយើងមានបញ្ហាច្រើនដែលបង្កើតឱ្យមានភាពមិនទុកចិត្តរវាងអ្នកប្រើប្រាស់ និងអ្នកលក់ ពេលខ្លះអ្នកទិញគាត់ទិញទំនិញហើយ ប៉ុន្តែនៅពេលយកដល់ខុសពីការផ្សព្វផ្សាយ និង ពេលខ្លះគេបង់លុយហើយ គេយកអីវ៉ាន់ទៅឱ្យមិនទាន់ពេលជាដើម គឺបញ្ហាកើតមានច្រើនណាស់ ដូចនេះយើងមានច្បាប់ការពារសិទ្ធិអ្នកប្រើប្រាស់ ដើម្បីការពារផលប្រយោជន៍អ្នកប្រើប្រាស់ ឬអ្នកទិញ»។
បើតាមលោកប្រធាននាយកដ្ឋានចុះបញ្ជីពាណិជ្ជកម្មសម្រាប់ក្រុមហ៊ុន និងសហគ្រាសទាំងឡាយណាដែលនៅតែមិនព្រមមកដាក់ពាក្យស្នើសុំទៀតនោះក្រសួងនឹងចាត់វិធានការតាមច្បាប់ ដោយនឹងផ្អាកប្រតិបត្តិការអាជីវកម្មតាមប្រព័ន្ធអេឡិចត្រូនិក (ការលក់តាមអនឡាញ) ហើយនឹងអាចពិន័យជាប្រាក់រហូតដល់ចំនួន ១០ លានរៀលសម្រាប់អាជីវកម្មតាមអនឡាញណា ដែលធ្វើសកម្មលក់ដូរតាមអនឡាញដោយគ្មានច្បាប់អនុញ្ញាតនេះ។
កាលពីចុងខែវិច្ឆិកា ឆ្នាំ ២០២០ រដ្ឋាភិបាលបានសម្ពោធឱ្យដំណើរការជាផ្លូវការយុទ្ធសាស្ត្រពាណិជ្ជកម្មតាមប្រព័ន្ធអេឡិចត្រូនិក (Official Launch E-Commerce Strategy) ក្នុងគោលបំណងដើម្បីឈានទៅសម្រេចបានកំណើននៃភាពប្រកួតប្រជែងទាក់ទងនឹងសេដ្ឋកិច្ចពាណិជ្ជកម្ម ព្រមទាំងការសម្រេចបានចក្ខុវិស័យកម្ពុជានៅឆ្នាំ ២០៣០ និង ២០៥០។
របាយការណ៍របស់ធនាគារអភិវឌ្ឍន៍អាស៊ីបានបង្ហាញថា ប្រាក់ចំណូលឌីជីថលនៅកម្ពុជាកាលពីឆ្នាំ ២០១៩ មានចំនួន ៤៧០ លានដុល្លារ។ ប្រសិនបើគិតតាមវិស័យ ពាណិជ្ជកម្មអេឡិចត្រូនិកមានចំនួន ២៧,៦ ភាគរយ សេវាកម្មអេឡិចត្រូនិក មាន ៧,៨ ភាគរយ ប្រព័ន្ធព័ត៌មានឌីជីថល ១០,២ ភាគរយ បច្ចេកវិទ្យាផ្សព្វផ្សាយពាណិជ្ជកម្ម (AdTech) ១២,៧ ភាគរយ ការដឹកជញ្ជូន ៣,៨ ភាគរយ និងការធ្វើដំណើរអនឡាញ ៣៧,៩ ភាគរយ។
លោកនាយករដ្ឋមន្ត្រី ហ៊ុន សែន កាលពីដើមខែមករា ឆ្នាំ ២០២២ បានលើកឡើងថា ចំណូលដែលកម្ពុជាបានពីពន្ធដារនៅក្នុងឆ្នាំ ២០២១ មាន ២២៤៣ លានដុល្លារ លើសផែនការជាង ២៤ ភាគរយ៕ LA
វីដេអូ៖
