.jpg)
លោក អ៊ិន ចាន់នី ផ្តល់បទសម្ភាសឱ្យសារព័ត៌មាននាពេលកន្លងមក។ ហ៊ាន រង្សី
ភ្នំពេញៈ លោក អ៊ិន ចាន់នី ប្រធាននាយកប្រតិបត្តិធនាគារអេស៊ីលីដា ភីអិលស៊ី បានឱ្យដឹងថា លោកកំពុងរៀបចំផែនការពង្រីកសេវាទូទាត់ឆ្លងប្រទេសជាមួយប្រទេស ២ បន្ថែមទៀតក្នុងតំបន់អាស៊ាន គឺប្រទេសឡាវ និងវៀតណាម ដើម្បីសម្រួលដល់ការទូទាត់នៃរំហូរទំនិញ និងសេវាកម្មរវាងកម្ពុជា និងប្រទេសទាំង ២ បន្ទាប់ពីខ្លួនទទួលបានជោគជ័យ ជាមួយការទូទាត់នេះជាមួយប្រទេសថៃ។
ថ្លែងទៅកាន់អ្នកសារព័ត៌មានក្នុងពិធីខួប ៣០ ឆ្នាំនៃការបង្កើតធនាគារអេស៊ីលីដា ពីក្រុងបាត់ដំបង លោក ចាន់នី បានលើកឡើងថាជាមួយនឹងផែនការពង្រីកហេដ្ឋារចនាសម្ព័ន្ធឌីជីថលឱ្យកាន់តែទូលំទូលាយ និងមានភាពបត់បែនឆ្លើយតបនឹងតម្រូវការមហាជន អេស៊ីលីដា មានផែនការក្នុងការតភ្ជាប់ការទូទាត់ឆ្លងប្រទេសទៅកាន់ប្រទេសជិតខាងនាពេលឆាប់ៗ។
លោកបានថ្លែងថា៖ «យើងសម្រិតសម្រាំងហេដ្ឋារចនាសម្ព័ន្ធឌីជីថលយើងឱ្យមានភាពទន់ភ្លន់ បត់បែនទៅគ្រប់មជ្ឈដ្ឋានមហាជនទាំងអស់ទាំងជនបទ និងទីក្រុង។ យើងនឹងផ្សារភ្ជាប់នូវអ្វីដែលយើងមាននូវហេដ្ឋារចនាសម្ព័ន្ធនេះជាមួយថ្នាក់តំបន់ គឺយើងបានធ្វើរួចហើយដោយតភ្ជាប់ជាមួយប្រទេសថៃ ហើយយើងនឹងតភ្ជាប់ជាមួយប្រទេស ២ ទៀត គឺសាធារណរដ្ឋប្រជាធិបតេយ្យឡាវ និងសាធារណរដ្ឋសង្គមនិយមវៀតណាម សម្រាប់ការជំរុញការទូទាត់ឆ្លងប្រទេស (Cross-border payment) ដែលនេះគឺជាផែនការ យុទ្ធសាស្ត្ររបស់យើងបានសម្រិតសម្រាំងនូវហេដ្ឋារចនាសម្ព័ន្ធឱ្យមានភាពទន់ភ្លន់ និងជ្រាបជ្រៅទៅក្នុងមហាជនគ្រប់ស្រទាប់ និងថ្នាក់តំបន់ ដែលនេះជាចំណុចសំខាន់»។
លោកបន្ថែមទៀតថា៖ «យើងមានផែនការក្នុងការធ្វើសមាហរណកម្មប្រព័ន្ធទូទាត់ឆ្លងប្រទេសរបស់យើងទៅកាន់ប្រទេសទាំង ២ នេះនៅក្នុងឆ្នាំ ២០២២ នេះដោយសារពេលនេះយើងនៅមានកិច្ចការជាច្រើនទៀតត្រូវបញ្ជប់។ គម្រោងតភ្ជាប់នេះនឹងចាប់ផ្តើមឆាប់ៗបន្ទាប់ពីធនាគារកណ្តាលនៃប្រទេសទាំង ២ នេះបានធ្វើការផ្លាស់ប្តូរអនុស្សរណៈនៃការយោគយល់គ្នារួចរាល់លើគម្រោងទូទាត់ឆ្លងប្រទេសនេះ»។
លោកស្រី ជា សិរី អគ្គនាយិកាបច្ចេកទេស ធនាគារជាតិនៃកម្ពុជាកាលពីពេលថ្មីៗបាននិយាយថា បច្ចុប្បន្នការរីកចម្រើននៃបច្ចេកវិទ្យា និងការប្រកួតប្រជែងក្នុងវិស័យហិរញ្ញវត្ថុបានផ្តល់ឱកាស និងជំរុញឱ្យគ្រឹះស្ថានធនាគារ និងមីក្រូហិរញ្ញវត្ថុដាក់ចេញនូវឧបករណ៍ និងសេវាទូទាត់ប្រកបដោយនវានុវត្តន៍ដល់សាធារណជន ដូចជា ការទូទាត់តាមប្រព័ន្ធអ៊ីនធឺណិត, ទូរស័ព្ទចល័ត និងតាមឃ្យូអរកូត ជាដើម។
លោកស្រីថ្លែងថា៖ «ទោះជាយ៉ាងនេះក៏ដោយ ការទូទាត់តាមឃ្យូអរកូតកន្លងមកនៅពុំទាន់មានប្រសិទ្ធភាព និងផ្តល់ភាពងាយស្រួលសម្រាប់អតិថិជននៅឡើយ ព្រោះអតិថិជនមិនអាចធ្វើការទូទាត់សងប្រាក់ឆ្លងគ្រឹះស្ថានទៅវិញទៅមកបាន»។
«ឆ្លើយតបនឹងបញ្ហានេះ និងដើម្បីអនុវត្តស្របតាមយុទ្ធសាស្ត្រអភិវឌ្ឍន៍វិស័យហិរញ្ញវត្ថុរបស់រាជរដ្ឋាភិបាលកម្ពុជា ធនាគារជាតិនៃកម្ពុជាបានដាក់ចេញនូវប្រកាសស្តីពីគំរូបរិច្ឆិនភាពបច្ចេកទេសខេអេចឃ្យូអរកូត (KHQR Code) សម្រាប់ទូទាត់សងប្រាក់កាលពីថ្ងៃទី ២៦ ខែមិថុនា ឆ្នាំ ២០២០ កន្លងមក» ។ នេះបើយោងតាមការថ្លែងបញ្ជាក់របស់លោកស្រី ជា សិរី។
បច្ចុប្បន្ននេះមានអតិថិជនជាច្រើនបានធ្វើការទូទាត់កម្មវិធីទូទាត់ KHQR Code របស់ធនាគារអេស៊ីលីដានៅប្រទេសថៃរួចរាល់ហើយ។
លោកបានបញ្ជាក់ថា៖ «កម្ពុជាបានដាក់ឱ្យដំណើរការការស្គែន Thai QR Code នៅចំពេលនៃការផ្ទុះការរីករាលដាលនៃជំងឺកូវីដ ១៩ ហើយយើងនៅតែមានការទូទាត់តាម QR Code ជាទឹកប្រាក់ប្រមាណ ៤ ១៣៥ ៣១៣ បាតស្មើនឹង ៦៨៨ ប្រតិបត្តិការ។ យើងសង្ឃឹមថា ចំនួនប្រតិបត្តិការនឹងមានការកើនឡើងនៅពេលប្រទេសបើកសេដ្ឋកិច្ចជាប្រក្រតីកម្មដោយគ្មានការបិទខ្ទប់។ បច្ចុប្បន្នយើងធ្វើការអនុវត្តការស្គែន Cambodian QR Code នៅស្រុកថៃ បើទោះបីជានៅមានចំនួនតិច ប៉ុន្តែយើងនៅតែមានកំណើន។ សម្រាប់ជំហានបន្ទាប់យើងមានផែនការក្នុងការអនុវត្តការផ្ញើលុយត្រឡប់មកស្រុក និងការទូទាត់តាមកាតដែលត្រឹមត្រូវម្តង»៕ LA
