.jpg)
ការចុះ MoU រវាងតំណាងក្រសួងពាណិជ្ជកម្មជាមួយក្រុមហ៊ុន PTT ដើម្បីតាំងលក់ផលិតផលខ្មែរ។ រូបថត សហការី
ភ្នំពេញៈ គម្រោងសាកល្បង «ទីផ្សារកសិករ Farmer Market» នឹងត្រូវធ្វើឡើងចាប់ពីចុងខែមករា រហូតដល់ដើមខែកុម្ភៈ ដោយមានការដាក់តាំងលក់នូវផលិតផលខ្មែរនៅតាមស្ថានីយប្រេងឥន្ធនៈ PTT នានាក្នុង ៥ រាជធានីភ្នំពេញ-ខេត្ត។
គំនិតផ្តួចផ្តើមនេះត្រូវបានធ្វើឡើងបន្ទាប់ពីក្រសួងពាណិជ្ជកម្ម និងក្រុមហ៊ុនភីធីធី (ខេមបូឌា) បានចុះហត្ថលេខាលើអនុស្សរណៈនៃការយោគយល់គ្នា (MoU) ស្តីពីកិច្ចសហការជំរុញ និងបង្កើនការលក់ផលិតផលខ្មែរនៅតាមបណ្តាស្ថានីយប្រេងឥន្ធនៈ PTT ចំនួន ៥ នៅរាជធានី-ខេត្តក្នុងរយៈពេល ៧ ថ្ងៃក្នុងគោលបំណង ដើម្បីធ្វើយ៉ាងណាឱ្យផលិតផលខ្មែរត្រូវបានសាធារណជនងាយស្រួលក្នុងការទិញ។
លោក សុខ សុភ័ក្ត្រ រដ្ឋលេខាធិការក្រសួងពាណិជ្ជកម្ម និងលោក Nuttapong Kaewtra-kulpong អភិបាលក្រុមហ៊ុនភីធីធី (ខេមបូឌា) បានចុះហត្ថលេខាលើ MoU នេះកាលពីថ្ងៃទី ២១ ខែមករា ឆ្នាំ ២០២២ នៅទីស្តីការក្រសួងពាណិជ្ជកម្ម។
សេចក្តីប្រកាសព័ត៌មានរបស់ក្រសួងពាណិជ្ជកម្ម លើកឡើងថា៖ «គោលបំណងនៃអនុស្សរណៈនេះ គឺដើម្បីជួយជ្រោមជ្រែងលើកកម្ពស់ផលិតផលខ្មែរលើទីផ្សារក្នុងស្រុក អភិវឌ្ឍវិស័យពាណិជ្ជកម្មកម្ពុជានៅលើមូលដ្ឋាននៃតម្លាភាព និងផលប្រយោជន៍សហគមន៍ជំរុញការប្រើប្រាស់ផលិតផលក្នុងស្រុក បង្កើន និងកសាងសមត្ថភាពសហគ្រិន ក៏ដូចជាបង្កើតឱកាសធុរកិច្ចសម្រាប់ចូលរួមអភិវឌ្ឍពាណិជ្ជកម្ម និងលើកស្ទួយសេដ្ឋកិច្ចសង្គមកម្ពុជាប្រកបដោយបរិយាប័ន្ន»។
«កិច្ចសហប្រតិបត្តិការនេះនឹងរួមចំណែកដល់ការអភិវឌ្ឍវិស័យពាណិជ្ជកម្ម និងអភិវឌ្ឍវិស័យសេដ្ឋកិច្ច ពិសេសជំរុញការប្រើប្រាស់ផលិតផលក្នុងស្រុកឱ្យកាន់តែទូលំទូលាយនៅក្នុងស្រទាប់មហាជន ព្រមទាំងជំរុញឱ្យមានទីផ្សារសម្បូរបែបសម្រាប់ផលិតផលក្នុងស្រុក»។ នេះបើយោងតាមក្រសួងពាណិជ្ជកម្ម។
លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្មបានប្រាប់ភ្នំពេញប៉ុស្តិ៍ នាថ្ងៃទី ២៤ ខែមករា ថា MoU នេះគឺជាគម្រោងសាកល្បងនៃ «ទីផ្សារកសិករ Farmer Market» ដែលនឹងចាប់ផ្ដើមនៅចុងខែមករា ដល់ដើមខែកុម្ភៈឆ្នាំនេះ ដោយអនុវត្តលើស្ថានីយប្រេងឥន្ធនៈ PTT មួយចំនួនក្នុងខេត្តចំនួន ៥ រួមមាន សាខារាជធានីភ្នំពេញ សៀមរាប កំពង់ឆ្នាំង កំពង់ចាម (ស្គន់) និងសាខាខេត្តតាកែវ។
លោកប្រាប់ថា៖ «ក្រុមហ៊ុន PTT នឹងផ្ដល់កន្លែងលក់ដោយមិនយកកម្រៃ ដោយធ្វើជាស្តង់រួមមួយអាចឱ្យអាជីវករដែលរស់នៅក្បែរស្ថានីយនោះចូលលក់មិនលើសពី ១០ នាក់»។
ប្រធានសមាគមក្រុមប្រឹក្សាធុរកិច្ចកម្ពុជា-ថៃ ប្រចាំទីក្រុងបាងកក លោក សម្បត្តិ សុធា បានប្រាប់ភ្នំពេញប៉ុស្តិ៍ថា ផែនការនេះនឹងជួយលើកកម្ពស់ការលក់ផលិតផលខ្មែរឱ្យកាន់តែទូលាយ និងងាយស្រួលដល់ដៃអ្នកទិញក្នុងស្រុក។ នេះ គឺជាយន្តការមួយដែលជួយចូលរួមចំណែកលើកទឹកចិត្តដល់ផលិតករក្នុងស្រុកផងដែរ។
លោកប្រាប់ថា៖ «យើងពិតជាគាំទ្រដែលក្រុមហ៊ុនសាំង PTT បានចូលរួមចំណែកលើកស្ទួយការលក់ផលិតផលខ្មែរនៅតាមការ៉ាស់សាំងរបស់គាត់ដែលធ្វើឱ្យភាពងាយស្រួលដល់អតិថិជនអាចទិញផលិតផលខ្មែរ។ លើសពីនេះ ផលិតករក្នុងស្រុកក៏សប្បាយរីករាយដែលខាងក្រុមហ៊ុន PTT បានជួយដល់ការលក់របស់ពួកគាត់»។
លោក សុវិជាតិ បានពន្យល់ថា ក្រោយពីគម្រោងសាកល្បងរយៈពេល ៧ ថ្ងៃត្រូវបានបញ្ចប់ ក្រុមហ៊ុន PTT នឹងអនុវត្តបន្តចំនួន ៣ ទៀត ដែលនឹងរៀបចំនៅខែឧសភា ខែសីហា និងខែវិច្ឆិកា ឆ្នាំ ២០២២ ដែលនឹងមានអាជីវករចូលរួមលក់ផលិតផលខ្មែរមានចំនួន ៦៣ នាក់»។
លោកបញ្ជាក់ថា៖ «គម្រោងនេះនឹងរៀបចំលក់នៅថ្ងៃសុក្រ ថ្ងៃសៅរ៍ និងថ្ងៃអាទិត្យ នៅតាមបណ្តាស្ថានីយប្រេងឥន្ធនៈ PTT មួយចំនួនក្នុងត្រីមាសទី ២ ឆ្នាំ ២០២២ នៅស្ថានីយចំនួន ១៦, តាមបណ្ដោយផ្លូវជាតិលេខ ២ លេខ ៣ និងលេខ ៤»៕ LA
