.jpg)
ការចុះហត្ថលេខាលើ MoU រវាងតំណាងក្រសួងកសិកម្មជាមួយក្រុមហ៊ុនចំនួន ៣ ក្នុងវិស័យកសិកម្ម។ រូបថត សហការី
ភ្នំពេញៈ ក្រសួងកសិកម្ម រុក្ខាប្រមាញ់ និងនេសាទបានចុះអនុស្សរណ:នៃការយោគយល់គ្នា (MoU) ស្តីពី «ការអភិវឌ្ឍហ្គ្រីនហៅស៍ កសិបច្ចេកវិទ្យា ៤.០» ជាមួយក្រុមហ៊ុនចំនួន៣ នៅក្នុងគោលបំណងដើម្បីផលិតបន្លែបន្ថែមឱ្យបានជាអប្បបរមាចំនួន ៤០០ តោនក្នុង ១ ឆ្នាំ សម្រាប់ផ្គត់ផ្គង់ទីផ្សារក្នុងស្រុក និងនាំចេញ។
ក្រុមហ៊ុនចំនួន ៣ ដែលចុះ MoU ជាមួយក្រសួងកសិកម្ម កាលពីថ្ងៃទី ២១ ខែមករា រួមមាន ក្រុមហ៊ុន Agri-Sambathkhmer Co., Ltd, PLMP Venture Capital Co., Ltd និង ISBP Group-Sun Business Investment Globe Co., Ltd។
រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន បានថ្លែងក្នុងពិធីចុះ MoU ថា ការបង្កើតភាពជាដៃគូរវាងរដ្ឋ និងឯកជន គឺជាការឆ្លើយតបអភិក្រម «រដ្ឋ-ឯកជន-ដៃគូអភិវឌ្ឍន៍ និងសហគមន៍»។ MoU នេះធ្វើឡើងក្នុងបំណងជំរុញ និងលើកកម្ពស់ខ្សែចង្វាក់តម្លៃបន្លែតាមស្តង់ដាការអនុវត្តកសិកម្មល្អកម្ពុជា ដើម្បីធានាបាននូវបរិមាណផ្គត់ផ្គង់ គុណភាព និងសុវត្ថិភាព រួមចំណែកបង្កើនផលិតភាព ពិពិធភាវូបនីយកម្ម និងពាណិជ្ជបនីយកម្មកសិកម្ម។
លោកបន្តថា MoU នេះប្រាកដជានឹងជួយបំពេញនូវអត្ថប្រយោជន៍ឱ្យគ្នាទៅវិញទៅមករវាងគូភាគីទាំងអស់ក្នុងការកសាងភាពជាដៃគូអភិវឌ្ឍន៍ខ្សែចង្វាក់តម្លៃផលិតកម្មបន្លែ ប្រកបដោយចីរភាព និរន្តរភាព វិបុលភាព បរិយាប័ន្ន ការប្រកួតប្រជែង ការប្រែប្រួលអាកាសធាតុ និងនវានុវត្តន៍ ជាពិសេសវានឹងចូលរួមចំណែកអនុវត្តផែនការយុទ្ធសាស្ត្ររបស់ក្រសួងក្នុងការជំរុញផលិតភាព និងពិពិធកម្មដំណាំបន្លែសុវត្ថិភាពឱ្យកាន់តែល្អ ព្រមទាំងចូលរួមលើកកម្ពស់ខ្សែចង្វាក់ផលិតកម្មបន្លែ ការកែច្នៃ តម្លៃបន្ថែម និងទីផ្សារក្នុង និងក្រៅប្រទេស បង្កើតឱកាសការងារ និងបង្កើនប្រាក់ចំណូល។
លោក វេង សាខុន ថ្លែងថា៖ «នេះក៏ជាយន្តការមួយក្នុងការចូលរួមដោះស្រាយបញ្ហាប្រឈមដែលកសិករកំពុងជួបប្រទះ និងកែលម្អ ដើម្បីលើកកម្ពស់សមត្ថភាពផលិត និងឆ្លើយតបតាមតម្រូវការទីផ្សារក្នុងការប្រែក្លាយកសិករទៅជាកសិសហគ្រិន ឆ្លើយតបនឹងផែនទីបង្ហាញផ្លូវស្តីពីប្រព័ន្ធស្បៀងប្រកបដោយចីរភាពសម្រាប់ឆ្នាំ ២០៣០ និងគោលនយោបាយការធ្វើទំនើបកម្មវិស័យកសិកម្ម ២០២១-២០៣០»។
លោកបន្ថែមទៀតថា៖ «ជាងនេះទៅទៀត គឺស្របទៅនឹងចក្ខុវិស័យរបស់រាជរដ្ឋាភិបាលក្នុងការធ្វើទំនើបកម្មកសិកម្មឱ្យមានលក្ខណៈប្រកួតប្រជែង បរិយាប័ន្ន ភាពធន់នឹងការប្រែប្រួលអាកាសធាតុ និងនិរន្តរភាពសំដៅបង្កើនប្រាក់ចំណូល និងលើកកម្ពស់សុខុមាលភាពរបស់ប្រជាពលរដ្ឋ»។
បើតាមលោក វេង សាខុន MoU ស្តីពីការអភិវឌ្ឍហ្គ្រីនហៅស៍ បច្ចេកវិទ្យា ៤.០ នឹងអាចឱ្យភាគីទាំងអស់ធ្វើកិច្ចសហប្រតិបត្តិការរួមគ្នា សំដៅសម្រេចឱ្យបានតាមគោលដៅសាងសង់ ហ្គ្រីនហៅស៍កសិបច្ចេកវិទ្យា ៤.០ ឱ្យបានចំនួន ១០ ០០០ ខ្នងក្នុងរយៈពេល ១០ ឆ្នាំបន្ទាប់ទៀត ដើម្បីផលិតបន្ថែមជាអប្បបរមាចំនួន ៤០០ តោនក្នុង ១ ឆ្នាំៗ។
លោក ដេម ឌីណា នាយកគ្រប់គ្រងវិនិយោគនៃក្រុមហ៊ុន PLMP Venture Capital Co., Ltd ប្រាប់ភ្នំពេញ-ប៉ុស្តិ៍នៅថ្ងៃទី ២៤ ខែមករា ថា MoU នេះសំដៅដល់ការបង្កើត ហ្គ្រីនហៅស៍តាមបែបបច្ចេកវិទ្យារបស់ប្រទេសអ៊ីស្រាអែលសម្រាប់អនុវត្តក្នុងប្រទេសកម្ពុជា។ លោកបន្តថា មិនមែនមានតែក្រុមហ៊ុន ៣ ខាងលើនេះទេ សរុបទាំងអស់មាន ៩ ក្រុមហ៊ុនដែលបានសហការធ្វើកិច្ចការ និងមានតួនាទីរៀងខ្លួន ប៉ុន្តែក្រោយមកក្រសួងកសិកម្មបានប្តូរកម្មវិធី ក៏សម្រេចយកតែ ៣ ក្រុមហ៊ុនមកចុះ MoU ដើម្បីជំរុញការងារនេះឱ្យសម្រេចទៅតាមគម្រោងដ៏ធំមួយ គឺការកសាងឱ្យបាន ១០ ០០០ ហ្គ្រីនហៅស៍ ក្នុងរយៈពេល ១០ ឆ្នាំចាប់ពីឆ្នាំ ២០២០ ដល់ឆ្នាំ ២០៣០។
លោកបានបន្តថា គម្រោងនេះក៏នឹងបញ្ជូននិស្សិតកម្ពុជាទៅបណ្តុះបណ្តាលនៅក្នុងប្រទេសអ៊ីស្រាអែលរយៈពេល ១១ ខែផងដែរ ហើយនៅពេលវិលមកវិញ និស្សិតទាំងនេះនឹងធ្វើការនៅក្នុងគម្រោងនេះតែម្តង។
លោកនិយាយថា៖ «បច្ចុប្បន្នគម្រោងនេះផ្តោតសំខាន់ទីផ្សារក្នុងស្រុកសិន ហើយសម្រាប់ទីផ្សារនៅខាងក្រៅមិនទាន់មានគ្រប់តម្រូវការទេ ប៉ុន្តែអាចក្នុងរយៈពេលត្រឹម ២ ឆ្នាំទៀតយើងនឹងអាចនាំចេញបានហើយ»។
បើតាម លោក ដេម ឌីណា បច្ចុប្បន្នទីផ្សារបន្លែសុវត្ថិភាពកំពុងពេញនិយមខ្លាំង ព្រោះបន្លែប្រភេទនេះត្រូវបានបញ្ជាទិញពីផ្សារទំនើបនានា។
លោក គី សេរីវឌ្ឍន៍ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជាបាននិយាយថា ប្រទេសកម្ពុជាដល់ពេលដែលត្រូវធ្វើទំនើបកម្មវិស័យកសិកម្មហើយ ដោយមិនអាចបន្តធ្វើកសិកម្មតាមបែបបុរាណទេ។ ដូច្នេះការបង្កើតឱ្យមាន ហ្គ្រីនហៅស៍កសិបច្ចេកវិទ្យា ៤.០ វានឹងធ្វើឱ្យវិស័យកសិកម្មរបស់កម្ពុជាកាន់តែទំនើបដោយការពារបានសត្វល្អិត និងបាក់តេរីផ្សេងៗ និងការប្រើប្រាស់សរីរាង្គដើម្បីឈានទៅតម្លៃបន្ថែមខ្ពស់ជាងមុន។
លោកបន្តថា បញ្ហានេះត្រូវតែចងជាសហគមន៍ឱ្យបាន ព្រោះនៅពេលមានក្រុមហ៊ុនរួចហើយ ប្រជាកសិករត្រូវតែចងជាសហគមន៍ដើម្បីកុំឱ្យក្រុមហ៊ុនកេងចំណេញពីកសិករបាន។
លោកថ្លែងថា៖ «អ៊ីចឹងតាមកសិដ្ឋានបន្លែនៅតំបន់នីមួយៗដែលដាំដំណាំប្រហាក់ប្រហែលគ្នា គឺត្រូវចងក្រងគ្នាដើម្បីឱ្យមានការផ្គត់ផ្គង់កាន់តែច្រើន។ ចំពោះបន្លែដែលគាត់ (MoU) អាចផលិតបាន ៤០០ តោនបន្ថែមក្នុង ១ ឆ្នាំនេះ គឺជាកសិផលដ៏តិចមួយ ព្រោះយើងនាំចូលមកពីក្រៅប្រទេសក្នុងថ្ងៃៗរាប់រយតោនឯណោះ»៕ LA
