.jpg)
ក្បាលរថភ្លើងល្បឿនលឿនដែលភ្ជាប់ការដឹកជញ្ជូនរវាងឡាវ-ចិន ដែលគេរំពឹងលើកំណើនទេសចរ។ AFP
ទីក្រុងវៀងចន្ទន៍ៈ រដ្ឋាភិបាលឡាវបានសន្យាថានឹងលុបចោលរបាំងដែលរារាំងដល់ប្រតិបត្តិការអាជីវកម្មនៅក្នុងប្រទេសឡាវ ខណៈពេលដែលបង្កើនល្បឿននៃការបង្កើតរូបិយប័ណ្ណឌីជីថល bitcoin ដោយក្រុមហ៊ុនដែលទទួលបានការអនុញ្ញាត។
ការផ្តោតដែលពង្រឹងលើអាជីវកម្ម គឺជាផ្នែកមួយនៃគោលនយោបាយរបស់រដ្ឋាភិបាលក្នុងការដោះស្រាយការលំបាកផ្នែកសេដ្ឋកិច្ច និងហិរញ្ញវត្ថុរបស់ប្រទេសមួយនេះ និងគាំទ្រដល់ការស្ទុះងើបឡើងវិញនៃសេដ្ឋកិច្ច បន្ទាប់ពីការរីករាលដាលជំងឺកូវីដ ១៩។
ការកាត់បន្ថយចំនួនការិយាធិបតេយ្យ និងការកែលម្អបរិយាកាសវិនិយោគគឺស្ថិតក្នុងចំណោមប្រធានបទចម្បងទាំង ៥ ដែលត្រូវបានពិភាក្សានៅក្នុងកិច្ចប្រជុំប្រចាំខែរបស់គណៈរដ្ឋមន្ត្រីដែលបានធ្វើឡើងកាលពីថ្ងៃទី ២០ ដល់ថ្ងៃទី ២១ ខែមករា។
កិច្ចប្រជុំរយៈពេល ២ ថ្ងៃនេះដឹកនាំដោយលោកនាយករដ្ឋមន្ត្រី Phankham Viphavanh និងមានការចូលរួមពីសមាជិកគណៈរដ្ឋមន្ត្រីជាច្រើនទៀត។
លោក Thipphakone Chanthavongsa អ្នកនាំពាក្យរដ្ឋាភិបាលបានប្រាប់សន្និសីទសារព័ត៌មានថា៖ «កិច្ចប្រជុំនេះ បានណែនាំឱ្យក្រសួងផែនការ និងវិនិយោគធ្វើការងារជាមួយក្រសួងឧស្សាហកម្ម និងពាណិជ្ជកម្ម និងវិស័យផ្សេងទៀត ដើម្បីពិនិត្យមើលគោលនយោបាយ និងច្បាប់ និងត្រួតពិនិត្យគោលនយោបាយនេះ និងច្បាប់ទាំងនេះឡើងវិញ»។
ទន្ទឹមនឹងនេះ សភាពាណិជ្ជកម្ម និងឧស្សាហកម្មជាតិឡាវបានណែនាំឱ្យពង្រឹងតួនាទីរបស់ខ្លួន ជាពិសេសក្នុងការបង្កើតក្រុមផលិតកម្ម និងសមាគមនានា ដើម្បីបង្កើនអំណាចចរចារបស់ពួកគេនៅក្នុងប្រតិបត្តិការធុរកិច្ច។
មេដឹកនាំធុរកិច្ចត្រូវបានណែនាំឱ្យកែលម្អវិធីសាស្ត្រប្រតិបត្តិការបង្កើនសមត្ថភាពប្រកួតប្រជែង និងធ្វើទំនើបកម្មប្រតិបត្តិការរបស់ពួកគេ ដើម្បីទទួលបានអត្ថប្រយោជន៍ពីការធ្វើសមាហរណកម្មសេដ្ឋកិច្ចក្នុងតំបន់។
លើសពីនេះ សមាជិកគណៈរដ្ឋមន្ត្រីបានព្រមព្រៀងគ្នាក្នុងការព្យាយាមបង្កើនចំនួនប្រាក់ចំណូលដែលទទួលបានពីការជីកយករ៉ែ និងពាណិជ្ជកម្មជារូបិយប័ណ្ណឌីជីថលក៏ដូចជាបានពីពន្ធ និងតម្លៃហូតពន្ធនៅតាមច្រកព្រំដែន។
លោក Bounchom Ubonpaseuth រដ្ឋមន្ត្រីក្រសួងហិរញ្ញវត្ថុបានប្រាប់រដ្ឋសភាជាតិ កាលពីឆ្នាំមុនថា រដ្ឋាភិបាលរំពឹងថានឹងរកប្រាក់ចំណូលបាន ២ ០០០ ពាន់ពាន់លានគុប (១៧៦ លានដុល្លារ) ពីដំណើរការបង្កើតរូបិយប័ណ្ណឌីជីថល bitcoin។
លោក Thipphakone បានថ្លែងថា៖ «យើងក៏នឹងសង្កត់ធ្ងន់បន្ថែមទៀតលើការបង្កើនផលិតភាពឧស្សាហកម្មកែច្នៃសេវាកម្ម និងទេសចរណ៍ដោយភ្ជាប់ជាមួយផ្លូវដែកឡាវជាមួយនឹងប្រទេសចិន»។
ប្រទេសឡាវបានដាក់ដំណើរការផ្លូវរថភ្លើងភ្ជាប់ទៅកាន់ប្រទេសចិនកាលពីចុងឆ្នាំ ២០២១ ដោយរំពឹងថា នឹងបង្កើនសក្តានុពលទេសចរណ៍ និងការដឹកជញ្ជូន។
គេមើលឃើញថា វាមានសារៈសំខាន់ផងដែរ ក្នុងការកែលម្អសេវាផ្លូវដែក និងសម្រួលការដឹកជញ្ជូនទំនិញទ្រង់ទ្រាយធំ និងឡូជីស្ទិកឆ្លងកាត់ព្រំដែន ដើម្បីជំរុញកំណើនសេដ្ឋកិច្ចបន្ថែមទៀត។
ក្នុងកិច្ចប្រជុំនោះ សមាជិកគណៈរដ្ឋមន្ត្រីបានស្តាប់របាយការណ៍ស្តីពីវឌ្ឍនភាពក្នុងការអនុវត្តវិធានការនានាក្នុងការទប់ស្កាត់ជំងឺកូវីដ ១៩។
កិច្ចប្រជុំនេះបានណែនាំដល់ក្រុមការងារពិសេសថ្នាក់ជាតិទទួលបន្ទុកទប់ស្កាត់ និងត្រួតពិនិត្យជំងឺកូវីដ ១៩ ត្រូវតាមដានឱ្យបានដិតដល់អំពីស្ថានភាពជុំវិញការរីករាលដាលវីរុសនេះ និងដើម្បីធានាឱ្យមានតុល្យភាពរវាងវិធានការត្រួតពិនិត្យការឆ្លងជំងឺ និងកិច្ចខិតខំប្រឹងប្រែងនៃស្តារសេដ្ឋកិច្ចឡើងវិញរបស់់រដ្ឋាភិបាល។
ក្រុមអ្នកចូលរួម ក្នុងកិច្ចប្រជុំគណៈរដ្ឋមន្ត្រីនេះបានឯកភាពគ្នាជាគោលការណ៍ជាមួយនឹងសេចក្តីព្រាងច្បាប់ផ្សេងៗពិសេសពាក់ព័ន្ធនឹងដី ដែលបម្រុងទុកសម្រាប់ផ្លូវល្បឿនលឿន និងការសម្លាប់សត្វ៕Vientiane Times-ANN/LA
