ភ្នំពេញៈ សមាគមពាណិជ្ជកម្មកម្ពុជា-ជប៉ុន បានស្នើឱ្យអគ្គនាយកដ្ឋានគយ និងរដ្ឋាករកម្ពុជា ជួយដោះស្រាយបញ្ហាមួយចំនួននៅច្រកទ្វារព្រំដែនអន្តរជាតិថ្មី ស្ទឹងបត់បានណុងអៀន បន្ទាប់ពីច្រកថ្មីនេះបានដាក់ឱ្យដំណើរការជាបណ្តោះអាសន្ន។
នៅក្នុងកិច្ចសន្ទនាលើកទី ៥ ស្តីពីការពិនិត្យដោះស្រាយនូវបញ្ហា និងសំណូមពរមួយចំនួនរវាងអគ្គនាយកដ្ឋានគយ និងរដ្ឋាករកម្ពុជា (អគរ) និងសមាគមពាណិជ្ជកម្មកម្ពុជា-ជប៉ុន (JBAC) តាមប្រព័ន្ធវីដេអូ កាលពីថ្ងៃទី ២៤ មករា លោក KANDA Yogo ប្រធានសមាគមពាណិជ្ជកម្មកម្ពុជា-ជប៉ុន (JBAC) បានលើកឡើងថា ក្រោយពីច្រកទ្វារព្រំដែនអន្តរជាតិថ្មី ស្ទឹងបត់បានណុងអៀនបានដាក់ឱ្យដំណើរការជាណ្តោះអាសន្នមកសមាគមបានជួបប្រទះបញ្ហាប្រឈមមួយចំនួនដូចជា ការរៀបចំការិយាល័យធ្វើការបណ្តោះអាសន្ន និងហេដ្ឋារចនាសម្ព័ន្ធសម្រាប់ Single Stop Inspection, ការងារពង្រីកមុខងារប្រព័ន្ធអាស៊ីគូដា កាត់បន្ថយឯកសារភ្ជាប់ក្នុងទម្រង់ក្រដាស, ការវាយបញ្ចូលទិន្នន័យស្ទួនគ្នា ២ ដង ក្នុងប្រតិវេទន៍តម្លៃគិតពន្ធគយក្នុងប្រព័ន្ធ CVDS និងប្រតិវេទន៍ SAD នាពេលបំពេញបែបបទបញ្ចេញទំនិញពីគយនាមាត់ច្រកព្រំដែន។
លោកបន្ថែមថា៖ «នៅមានបញ្ហាមួយចំនួនទៀត ដែលសមាគមស្នើឱ្យអគ្គនាយកដ្ឋានគយជួយដោះស្រាយផងដែរ មានដូចជា ការអនុវត្តនីតិវិធី Pre-arrival processing ក្រោមគម្រោងជំនួយរបស់ ARISE Plus, ការកែសម្រួលអំពីរយៈពេលនៃការរក្សាទុកឯកសារ ការទូទាត់តាមប្រព័ន្ធអេឡិចត្រូនិក និងមន្ត្រីទំនាក់ទំនងរបស់អគ្គនាយកដ្ឋានគយ»។
ចំពោះសំណើ និងបញ្ហាប្រឈមនេះដែរ លោក គុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករកម្ពុជាបានបញ្ជាក់ថា អគរ នឹងពិនិត្យដោះស្រាយនូវបញ្ហា និងសំណូមពរមួយចំនួនរបស់វិស័យឯកជនពាក់ព័ន្ធនឹងការអនុវត្តនីតិវិធីគយ និងការបំពេញបែបបទគយដែលសមាគមបានស្នើ។
លោកបានបន្ថែមថា ក្រៅពីការដោះស្រាយបញ្ហាប្រឈមទាំងនេះហើយ អគរ ក៏ទទួលយកសំណើរបស់ JBAC ក្នុងការរៀបចំសិក្ខាសាលាផ្សព្វផ្សាយ (Briefing Session) អំពីវឌ្ឍនភាពនៃបទប្បញ្ញត្តិជាធរមាន ជាពិសេសការពង្រីកមុខងារប្រព័ន្ធអាស៊ីគូដាជំនាន់ចុងក្រោយ និងការងារពាក់ព័ន្ធផ្សេងទៀតជូនសមាជិក JBAC ដោយអគរ នឹងធ្វើការបន្តជាមួយ JBAC ដើម្បីកំណត់យកប្រធានបទ និង ពេលវេលា ដើម្បីរៀបចំសិក្ខាសាលាផ្សព្វផ្សាយនាពេលឆាប់ៗនេះ។
លោក ឈឿង ឈីវអៀន ប្រធានសភាពាណិជ្ជកម្មខេត្តបន្ទាយមានជ័យបានប្រាប់ភ្នំពេញប៉ុស្តិ៍ថា ដោយសារតែច្រកអន្តរជាតិប៉ោយប៉ែត មានការកកស្ទះចំពោះការដឹកជញ្ជូនទំនិញទើបរាជរដ្ឋាភិបាលរៀបចំឱ្យមានច្រកស្ទឹងបត់បានណុងអៀនបន្ថែម ដើម្បីដោះស្រាយបញ្ហានេះ ដោយសព្វថ្ងៃនេះច្រកនេះបានបើកដំណើរការបណ្តោះអាសន្នហើយ។
លោកបានបន្តថា ចាប់តាំងពីមានផ្ទុះកូវីដ ១៩ រយៈពេល ២ ឆ្នាំមកមិនសូវមានបញ្ហាទាំងនេះកើតនោះទេ ដោយសារមិនមានការចេញចូលរវាងទេសចរនៃប្រទេសទាំង ២ ទើបការដឹកទំនិញមិនចោទជាបញ្ហាខ្លាំង។
លោកបានបញ្ជាក់ថា៖ «មូលហេតុ ដែលរាជរដ្ឋាភិបាលរៀបចំឱ្យមានច្រកនេះគឺដើម្បីសម្រួលជាចម្បងដល់ការដឹកជញ្ជូនទំនិញដោយរថយន្តធំៗ ខណៈច្រកទ្វារប៉ោយប៉ែតនឹងត្រូវទុកសម្រាប់ការចេញភ្ញៀវទេសចរវិញ»។
ក្រសួងសាធារណការ និងដឹកជញ្ជូនគ្រោងនឹងបំពាក់គ្រឿងម៉ាស៊ីនត្រួតពិនិត្យកាំរស្មើអ៊ិចលើទំនិញដែលឆ្លងកាត់ច្រកទ្វារព្រំដែនអន្តរជាតិថ្មី ស្ទឹងបត់បានណុងអៀន ទិសដៅដើម្បីធ្វើទំនើបកម្ម និងពន្លឿននីតិវិធីត្រួតពិនិត្យទំនិញឆ្លងកាត់ព្រំដែន ដើម្បីកុំឱ្យការងារត្រួតពិនិត្យទំនិញឆ្លងកាត់ព្រំដែនមានភាពយឺតយ៉ាវ និងបង្កភាពស្មុគស្មាញបន្ថែមទៀតដល់ការដឹកជញ្ជូន។
កាលពីដើមឆ្នាំ ២០២០ កម្ពុជា និងថៃបានព្រមព្រៀងគ្នាថានឹងបើកច្រកទ្វារព្រំដែនស្ទឹងបត់ភ្ជាប់ខេត្តបន្ទាយមានជ័យនៃប្រទេសកម្ពុជា និងខេត្តស្រះកែវនៃប្រទេសថៃ ជាបណ្តោះអាសន្ន សម្រាប់ការដឹកជញ្ជូនទំនិញក្នុងពេលឆាប់ៗនេះ ដោយគម្រោងសាងសង់នេះត្រូវចំណាយជាង ២៤ លានដុល្លារ ហើយគ្រោងនឹងបញ្ចប់នៅដើមឆ្នាំ ២០២៣៕ LA