.jpg)
ក្រសួងសេដ្ឋកិច្ច និងហិរញ្ញវត្ថុបានដាក់សំណើទៅលោកនាយករដ្ឋមន្ត្រី ហ៊ុន សែន ដើម្បីសុំពន្យារពេលការអនុវត្ត «ពន្ធលើចំណេញមូលធន» រយៈពេល ២ ឆ្នាំ គឺចាប់ពីឆ្នាំ ២០២២ ដល់ថ្ងៃទី ១ ខែមករា ឆ្នាំ ២០២៤ ដើម្បីចូលរួមស្តារ និងជំរុញកំណើនសេដ្ឋកិច្ចក្នុងការរស់នៅជាមួយកូវីដ ១៩ តាមគន្លងប្រក្រតីភាពថ្មី។ MEF
ភ្នំពេញៈ ក្រសួងសេដ្ឋកិច្ច និងហិរញ្ញវត្ថុបានដាក់សំណើទៅលោកនាយករដ្ឋមន្ត្រី ហ៊ុន សែន ដើម្បីសុំពន្យារពេលការអនុវត្ត «ពន្ធលើចំណេញមូលធន» រយៈពេល ២ ឆ្នាំ គឺចាប់ពីឆ្នាំ ២០២២ ដល់ថ្ងៃទី ១ ខែមករា ឆ្នាំ ២០២៤ ដើម្បីចូលរួមស្តារ និងជំរុញកំណើនសេដ្ឋកិច្ចក្នុងការរស់នៅជាមួយកូវីដ ១៩ តាមគន្លងប្រក្រតីភាពថ្មី។ នេះបើតាមអ្នកនាំពាក្យក្រសួងសេដ្ឋកិច្ច និងហិរញ្ញវត្ថុ។
លោក មាស សុខសេនសាន អ្នកនាំពាក្យក្រសួងសេដ្ឋកិច្ច និងហិរញ្ញវត្ថុបានប្រាប់ភ្នំពេញប៉ុស្តិ៍ក្នុងថ្ងៃទី ២៦ ខែមករាថា រដ្ឋាភិបាលបានចេញសេចក្តីសម្រេចលេខ ១២២ សសរ ចុះថ្ងៃទី ១៦ ខែធ្នូ ឆ្នាំ ២០២១ ពីការដាក់ឱ្យប្រើប្រាស់នូវក្របខ័ណ្ឌយុទ្ធសាស្ត្រ និងកម្មវិធីស្តារ និងជំរុញកំណើនសេដ្ឋកិច្ចកម្ពុជាក្នុងការរស់នៅជាមួយកូវីដ-១៩ តាមគន្លងប្រក្រតីភាពថ្មី សម្រាប់ឆ្នាំ ២០២១-២០២៣។
លោកបន្តថា សម្រាប់ការកែលម្អបរិយាកាសធុរកិច្ចនៃក្របខ័ណ្ឌយុទ្ធសាស្ត្រ និងកម្មវិធីស្តារ និងជំរុញកំណើនសេដ្ឋកិច្ចកម្ពុជាក្នុងការរស់នៅជាមួយកូវីដ ១៩ តាមគន្លងប្រក្រតីភាពថ្មីសម្រាប់ឆ្នាំ ២០២១-២០២៣ ដែលរដ្ឋាភិបាលបានដាក់ចេញកាលពីថ្ងៃទី ១៦ ខែធ្នូ ឆ្នាំ ២០២១ បានបញ្ជាក់ថា ក្នុងរយៈពេល ២ ឆ្នាំ កន្លងមកនេះ រាជរដ្ឋាភិបាលបានដាក់ចេញនូវវិធានការជាច្រើន ដើម្បីជួយសម្រាលបន្ទុកសារពើពន្ធរបស់វិស័យឯកជន ពិសេសវិស័យដែលរងផលប៉ះពាល់ខ្លាំងពីវិបត្តិជំងឺកូវីដ ១៩ ដើម្បីរក្សាលំនឹងអាជីវកម្ម។
លោកថ្លែងថា៖ «ក្នុងន័យនេះក្រសួងសេដ្ឋកិច្ច និងហិរញ្ញវត្ថុបានលើកសំណើគោរពជូនសម្តេចតេជោនាយករដ្ឋមន្ត្រីដើម្បីសុំពន្យារពេលការអនុវត្តពន្ធលើចំណេញមូលធនរយៈពេល ២ ឆ្នាំទៀតដោយកំណត់ថ្ងៃទី ១ ខែមករា ឆ្នាំ ២០២៤ ជាកាលបរិច្ឆេទនៃការអនុវត្តពន្ធនេះ តាមរយៈលិខិតលេខ ២៥៧ សហវ.អពដ ចុះថ្ងៃទី ១៩ ខែមករា ឆ្នាំ ២០២២»។
លោកបន្តថា៖ «ហេតុនេះមូលដ្ឋានដែលក្រសួងសេដ្ឋកិច្ច និងហិរញ្ញវត្ថុ លើកសំណើគោរពជូនសម្ដេចតេជោនាយករដ្ឋមន្ត្រីដើម្បីសុំពន្យារពេលការអនុវត្តពន្ធលើចំណេញមូលពន្ធគឺដើម្បីចូលរួមអនុវត្តក្របខ័ណ្ឌយុទ្ធសាស្ត្រ និងកម្មវិធីស្តារ និងជំរុញកំណើនសេដ្ឋកិច្ចកម្ពុជាក្នុងការរស់នៅជាមួយកូវីដ-១៩ តាមគន្លងប្រក្រតីភាពថ្មីសម្រាប់ឆ្នាំ ២០២១-២០២៣ ដើម្បីជំរុញការវិនិយោគ និងជួយសម្រួលជីវភាពរបស់ប្រជាពលរដ្ឋ»។
ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក ច្រឹក សុខនឹម បានសាទរចំពោះចំណាត់ការរបស់ក្រសួងសេដ្ឋកិច្ច និងហិរញ្ញវត្ថុ ក្នុងការដាក់សំណើទៅរាជរដ្ឋាភិបាលដើម្បីពន្យារពេលក្នុងការអនុវត្តពន្ធលើចំណេញមូលធននេះ ដើម្បីជួយស្តារ និងជំរុញសកម្មភាពសេដ្ឋកិច្ច។
លោកនិយាយថា៖ «យើងពិតជារីករាយជាមួយនឹងសំណើសុំពន្យាររយៈពេល ២ ឆ្នាំសម្រាប់ការអនុវត្តពន្ធលើចំណេញមូលធន ដោយសារតែវិស័យអចលនទ្រព្យ និងសំណង់ ក៏ជាវិស័យដែលរងផលប៉ះពាល់ពីការរីករាលដាលជំងឺកូវីដ ១៩ ផងដែរ ដែលធ្វើឱ្យសកម្មភាពទិញ-លក់អចលនទ្រព្យនៅទ្រឹង ឬមានសកម្មភាពតិចតួច»។
លោក សុខនីម បានបន្តទៀតថា បណ្តាប្រទេសនានាដូចជា វៀតណាម ថៃ និងជាពិសេសសិង្ហបុរី បានអនុវត្តរួចហើយចំពោះពន្ធប្រភេទនេះ។
ពន្ធលើចំណេញមូលធននឹងត្រូវអនុវត្តចំពោះការលក់ ឬផ្ទេរ ឬក៏បង្កើតឱ្យមានសិទ្ធិគ្រប់គ្រងលើទ្រព្យ ឬចុះបញ្ជីសម្រាប់ការផ្ទេរកម្មសិទិ្ធ ឬសិទ្ធិកាន់កាប់ទ្រព្យ។
យោងតាមប្រកាសរបស់ក្រសួងសេដ្ឋកិច្ចចុះកាលពីថ្ងៃទី ១ ខែមេសា ឆ្នាំ ២០២០ ការបង់ពន្ធនេះគឺបានមកពីការលក់នៃអចលនទ្រព្យមួយចំនួនដូចជា ដី អគារ ភាគហ៊ុន អាជ្ញាប័ណ្ណ ប៉ាតង់ សញ្ញាបណ្ណបំណុល និងរូបិយប័ណ្ណក្នុងអត្រា ២០ ភាគរយ។
រដ្ឋាភិបាលក៏សម្រេចលើកលែងពន្ធលើចំណេញមូលធនចំពោះការលក់ និងផ្ទេរដីកសិកម្មជាកម្មសិទ្ធិ ឬសិទ្ធិកាន់កាប់របស់ប្រជាពលរដ្ឋដែលជាកសិករកំពុងបង្កបង្កើនផលពិតប្រាកដ និងមានអាសយដ្ឋានរស់នៅស្ថិតនៅក្នុងឃុំសង្កាត់លើដីកំពុងធ្វើកសិកម្ម។
ទន្ទឹមនឹងនេះ អចលនទ្រព្យក្នុងរង្វង់ញាតិដូចមានចែងក្នុងបទប្បញ្ញត្តិស្តីពីពន្ធប្រថាប់ត្រា លើកលែងតែការផ្ទេរកម្មសិទ្ធិ ឬសិទ្ធិកាន់កាប់អចលនទ្រព្យរវាងបងប្អូនបង្កើត និងបងប្អូនបង្កើតរវាងឪពុកម្តាយក្មេក និងកូនប្រសា និងរវាងយាយតាក្មេក និងចៅប្រសា និងទ្រព្យដែលត្រូវបានលក់ ឬផ្ទេរ ដើម្បីប្រយោជន៍សាធារណៈស្របតាមច្បាប់អស្សាមិករណ៍។ ចំពោះការគណនាប្រាក់ពន្ធលើចំណេញមូលធន គឺយកប្រាក់ចំណេញពីការលក់ ឬផ្ទេរមូលធនគុណនឹងអត្រាពន្ធ ២០ ភាគរយ ហើយសម្រាប់មូលធនជាអចលនទ្រព្យ ម្ចាស់អចលនទ្រព្យអាចជ្រើសរើសវិធីសាស្ត្រកាត់កងចំណាយចំនួន ២ គឺតាមវិធីសាស្ត្រកាត់កងចំណាយតាមការកំណត់ និងវិធីសាស្ត្រកាត់កងតាមចំណាយជាក់ស្តែង៕ LA
