.jpg)
វិភាគដោយ៖ លោក ញឹម កុសល ប្រធានផ្នែកប្រឹក្សាយោបល់ហិរញ្ញវត្ថុនៃក្រុមហ៊ុន ហ្គោលដេន អេហ្វអិកស៍ លីង ឃែភីថល
អ្នកវិនិយោគមាសហាក់ដូចជាកំពុងតែចាំមើលពីចេតនារបស់ធនាគារកណ្ដាលសហរដ្ឋអាមេរិកថា វានឹងអាចគ្រប់គ្រងកម្រិតអតិផរណារបស់ខ្លួន ខណៈពេលដែលតម្លៃមាសបានបន្តរក្សាកម្រិតតម្លៃលើសពី ១៨៤០ ដុល្លារ ក្នុង ១ អោនស៍ ចាប់តាំងពីការបំបែកតម្លៃកាលពីសប្តាហ៍មុន។
តម្លៃមាសកំពុងត្រូវបានជួញដូរនៅជិតកម្រិតខ្ពស់ក្នុងរយៈពេល ២ ខែ ប៉ុន្តែការបំបែកតម្លៃកាលពីថ្ងៃពុធបានកើតឡើងនៅពេលដែលទិន្នផលសញ្ញាបណ្ណរបស់សហរដ្ឋអាមេរិកបានឡើងដល់កម្រិតខ្ពស់បំផុតក្នុងរយៈពេលជាង ២ ឆ្នាំ។ បច្ចុប្បន្នទិន្នផលរយៈពេល ១០ ឆ្នាំកំពុងត្រូវបានជួញដូរនៅកម្រិត ១,៨៣% ធ្លាក់ចុះបន្តិចពីការកើនឡើងកាលពីថ្ងៃពុធ ០,០៤%។ អត្រាការប្រាក់ត្រូវបានគេរំពឹងថានឹងកើនឡើងជាពិន្ទុភាគរយ 0,៧៥ នៅឆ្នាំនេះ នេះបើយោងតាមមន្ដ្រីធនាគារកណ្តាលកាលពីខែមុន។ ជាលទ្ធផលកម្រិតអត្រាការប្រាក់គោលរយៈពេលខ្លីរបស់ពួកគេនឹងកើនឡើងដល់ចន្លោះពី ០,៧៥% និង ១% នៅចុងឆ្នាំនេះដែលកើនឡើងពីកម្រិតបច្ចុប្បន្នដែលនៅក្បែរសូន្យ។ ទោះបីជាការកើនឡើងសម្ពាធនៃសន្ទស្សន៍ថ្លៃទំនិញកំពុងធ្វើឱ្យអ្នកប្រើប្រាស់មានការរំពឹងទុកសម្រាប់សកម្មភាពគោលនយោបាយរូបិយវត្ថុកាន់តែខ្លាំងក្លាពីធនាគារកណ្ដាលសហរដ្ឋអាមេរិក។ លោក ញឹម កុសល ប្រធានផ្នែកប្រឹក្សាយោបល់ហិរញ្ញវត្ថុនៃក្រុមហ៊ុន ហ្គោលដេន អេហ្វអិកស៍ លីង ឃែភីថល បានលើកឡើងថា៖ «ខ្ញុំយល់ឃើញថា ការដំឡើងអត្រាការប្រាក់នឹងមានឥទ្ធិពលតិចតួចប៉ុណ្ណោះលើបញ្ហាអតិផរណា ដែលកំពុងត្រូវបានបន្ដជំរុញដោយផ្នែកពីឧបសគ្គនៃខ្សែចង្វាក់ផ្គត់ផ្គង់សកល»។ តាមលក្ខណៈបច្ចេកទេសវិញ លោកបានបន្ថែមថា តម្លៃមាសអាចត្រូវបានជួញដូរក្នុងចន្លោះពី ១ ៨៣០ ទៅ ១ ៨៤៧ ដុល្លារ ខណៈពេលដែលទីផ្សារកំពុងស្វែងរកការបំបែកទិសដៅថ្មី ដើម្បីទិញមាស ប្រសិនបើវាឡើងដល់កម្រិតខ្ពស់ថ្មីលើសពីកម្រិតខ្ពស់មុន ១ ៨៤៧ ដុល្លារ។ សម្រាប់ការវិភាគជួញដូរនៅក្នុងសប្តាហ៍នេះ វិនិយោគិនគួរពិចារណាទិញមាសនៅតម្លៃ ១ ៨៣០ ដុល្លារដោយកំណត់មុខងារការពារហានិភ័យនៅតម្លៃ ១ ៨១៥ ដុល្លារ និងមុខងារកាត់យកប្រាក់ចំណេញនៅតម្លៃ ១ ៨៦៥ ដុល្លារ៕
